Gjykata shpall fajtor ministrin Xhelal Sveçla për përdorimin e gazit lotsjellës në Kuvend

Gjykata Themelore në Prishtinë e ka gjetur fajtor ministrin në detyrë të Punëve të Brendshme, Xhelal Sveçla, për përdorimin e gazit lotsjellës në sallën e Kuvendit të Republikës së Kosovës më 21 mars 2018.

Sveçla u shpall fajtor për veprën penale “Përdorimi i armës apo mjetit të rrezikshëm”. Vendimi u mor të mërkurën nga gjykatësi i çështjes, Sabit Sadikaj.

Sa i përket akuzës për “Pengimin e personit zyrtar në kryerjen e detyrave zyrtare”, Gjykata nxori aktgjykim refuzues, pasi ndjekja penale për këtë vepër ishte parashkruar.

Dënimi për veprën për të cilën Sveçla u shpall fajtor do të caktohet pas një seance të posaçme, ku palët do të paraqesin rrethanat lehtësuese dhe rënduese. Kjo seancë është caktuar të mbahet më 8 shtator 2026, bëri të ditur gjykatësi Sadikaj.

I akuzuari nuk ishte i pranishëm në seancë, ndërsa në emër të tij mori pjesë avokati Laur Prenaj.

Procedura ndaj Sveçlës ishte veçuar nga ajo ndaj të akuzuarve të tjerë, pasi ai mungoi në seancën e 16 janarit 2026 dhe përmes e-mailit njoftoi Gjykatën se ndodhej jashtë vendit.

Në seancën e 10 prillit 2026, Sveçla ishte deklaruar i pafajshëm për akuzën e ngritur ndaj tij.

Ndërkohë, gjatë seancës së 28 gushtit 2026, prokurori Avni Namani njoftoi se Prokuroria kishte ndryshuar dispozitivin e aktakuzës kundër Sveçlës.

Sipas versionit të ndryshuar të aktakuzës, më 21 mars 2018, nga ora 12:10 deri në 15:40, gjatë një seance të jashtëzakonshme plenare në sallën e Kuvendit të Republikës së Kosovës, Sveçla dyshohej se kishte përdorur një bombolë gazi lotsjellës me përmbajtje të agjentit kimik CS.

Prokuroria pretendon se ai e kishte aktivizuar bombolën në disa raste dhe e kishte hedhur brenda sallës, pa paralajmërim dhe pa u mundësuar personave të pranishëm largimi nga hapësira.

Si pasojë e këtij veprimi, sipas aktakuzës, gazi irritues ishte shpërndarë në ambientet e mbyllura të sallës. Të pranishmit, të frikësuar për shëndetin dhe sigurinë e tyre, ishin detyruar ta braktisnin atë, ndërsa seanca ishte ndërprerë.

Namani deklaroi se Sveçla ndiqet penalisht për “Përdorimin e armës apo mjetit të rrezikshëm”, vepër e paraparë në nenin 375, paragrafin 2 të Kodit Penal të vitit 2012. Prokuroria ka hequr dorë nga ndjekja për veprën “Pengimi i personit zyrtar në kryerjen e detyrave zyrtare”, për shkak të parashkrimit, ndërsa pjesa tjetër e aktakuzës ka mbetur e pandryshuar.

Në të njëjtin rast janë të përfshirë edhe ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli-Dalipi, ish-deputeti i Vetëvendosjes, Salih Zyba, si dhe ish-deputetja e Lidhjes Demokratike të Kosovës (LDK), Drita Millaku.

Aktakuza ndaj Sveçlës, Millakut, Zybës dhe Pacolli-Dalipit ishte konfirmuar nga Gjykata Themelore në Prishtinë më 6 qershor 2024, ndërsa vendimi i saj më pas ishte vërtetuar edhe nga Gjykata e Apelit.

Në seancën fillestare, të mbajtur më 26 mars 2024, të katër të akuzuarit ishin deklaruar të pafajshëm për hedhjen e gazit lotsjellës në Kuvend.

Përveç kësaj vepre, ata akuzoheshin edhe për “Pengimin e personit zyrtar në kryerjen e detyrave zyrtare”. Megjithatë, në seancën fillestare gjykatësi Sabit Sadikaj kishte njoftuar se për këtë vepër kishte arritur parashkrimi absolut i ndjekjes penale.

Sipas aktakuzës së siguruar nga “Betimi për Drejtësi”, e cila ishte ngritur më 29 korrik 2019 dhe për të cilën “Betimi për Drejtësi” kishte raportuar ekskluzivisht në tetor të vitit 2021, Sveçla, Millaku, Zyba dhe Pacolli-Dalipi dyshoheshin se më 21 mars 2018, nga rreth ora 12:10 deri në 15:40, kishin ndezur disa bombola me gaz lotsjellës dhe i kishin hedhur në sallën e Kuvendit të Kosovës gjatë zhvillimit të seancës plenare.

Aktakuza theksonte se, për shkak të gazit, të gjithë deputetët ishin detyruar të dilnin nga salla, duke e pamundësuar vazhdimin e seancës.

Për këtë veprim, secili prej tyre akuzohej veçmas për “Përdorimin e armës apo mjetit të rrezikshëm”, sipas nenit 375, paragrafit 1 të Kodit Penal. Për këtë vepër parashihet dënim me burgim prej një deri në tetë vjet.

Ndërsa, sipas pikës së dytë të aktakuzës, të akuzuarit dyshoheshin veçmas edhe për “Pengimin e personit zyrtar në kryerjen e detyrave zyrtare”, nga neni 409, paragrafi 1 i Kodit Penal, me pretendimin se kishin penguar deputetët e Kuvendit të Kosovës në ushtrimin e detyrave të tyre zyrtare. Për këtë vepër parashihet burgim nga tre muaj deri në tre vjet.