Gashi: Përpjekjet për rrëzimin e Kurtit mund të kenë efekt të kundërt

Analisti Shkëlzen Gashi ka reaguar lidhur me zhvillimet e fundit politike dhe protestën e paralajmëruar para Kuvendit të Kosovës, ku kërkohet votimi në lexim të dytë i ndryshimeve në Ligjin për Dhomat e Specializuara.

Sipas Gashit, ai e kupton se disa aktorë politikë synojnë ta largojnë Albin Kurtin, por vlerëson se mënyra e ndjekur për ta realizuar këtë qëllim mund të prodhojë rezultat të kundërt.

“Po e kuptoj që po dojnë me e rrëzu Albinin, ama çka s’po kuptoj osht qysh s’po e shohin që, me mënyrën qysh po provojnë me e rrëzu, veç po e rrisin”, ka shkruar ai në Facebook.

Reagimi është bërë në një kohë kur qytetarë janë mbledhur para Kuvendit të Kosovës. Protesta e paralajmëruar në sheshin “Skënderbeu” pritet të përqendrohet te kërkesa për miratimin e ndryshimeve në ligjin që rregullon Dhomat e Specializuara.