Franca rikonfirmon mbështetjen për Kosovën dhe Dhomat e Specializuara pas dënimit të ish-krerëve të UÇK-së

Franca ka shprehur sërish mbështetjen e saj të palëkundur për pavarësinë dhe institucionet e Kosovës, pas vendimit dënues të Dhomave të Specializuara ndaj Hashim Thaçit, Kadri Veselit, Rexhep Selimit dhe Jakup Krasniqit.

Përmes një deklarate, Ministria franceze për Evropën dhe Punët e Jashtme njoftoi se ka marrë dijeni për aktgjykimin në çështjen “Thaçi dhe të tjerët”, duke theksuar se të akuzuarit kanë të drejtë të apelojnë.

“Ky vendim, i cili mund të apelohet, shënon përfundimin e proceseve të shkallës së parë para Dhomave të Specializuara, me përjashtim të rasteve që lidhen me pengimin e administrimit të drejtësisë”, thuhet në deklaratën e publikuar në uebfaqen e ministrisë, transmeton KosovaPress.

Autoritetet franceze deklaruan gjithashtu se qëndrojnë në mbështetje të Dhomave të Specializuara të Kosovës dhe të përpjekjeve për luftimin e pandëshkueshmërisë.

“Franca përsërit mbështetjen e saj për Dhomat e Specializuara të Kosovës dhe rikujton angazhimin në luftën kundër pandëshkueshmërisë. Ajo gjithashtu rikonfirmon mbështetjen e palëkundur për pavarësinë e Kosovës dhe institucionet e saj”, thuhet në deklaratë.

Reagimi i Parisit erdhi pasi trupi gjykues shpalli fajtorë katër ish-krerët e Ushtrisë Çlirimtare të Kosovës për krime lufte, përfshirë arrestimin dhe ndalimin e paligjshëm ose arbitrar, trajtimin mizor, torturën dhe vrasjen e paligjshme.

Hashim Thaçi dhe Jakup Krasniqi u dënuan me nga 25 vjet burgim. Kadri Veseli mori një dënim prej 18 vjetësh, ndërsa Rexhep Selimi u dënua me 13 vjet burgim.

Vendimi nuk ka marrë formë të prerë, pasi mund të ankimohet. Mbrojtja e të dënuarve ka njoftuar se do ta çojë çështjen në Apel.