Fetoshi për reagimet ndaj vizitës së Begajt në Luginë: “Bota Shqiptare” po përdoret për të relativizuar “Botën Serbe”

Arben Fetoshi, drejtori i Institutit Octopus, ka vlerësuar se mënyra se si autoritetet dhe mediat serbe reaguan ndaj vizitës së Presidentit të Shqipërisë, Bajram Begaj, në Luginë të Preshevës, bën pjesë në një strategji komunikimi që synon të zbusë dhe relativizojë projektin e quajtur “Bota Serbe”.

Në një analizë të publikuar në Facebook, Fetoshi shprehet se përshkrimi i vizitës së presidentit Begaj si një kërcënim ekspansionist i një “Bote Shqiptare” nuk mbështetet mbi fakte. Sipas tij, kjo është fryt i një komunikimi strategjik që përdor relativizimin dhe “simetrinë e rrejshme”.

Sipas Fetoshit, pretendimet se Shqipëria ka synime për zgjerim territorial ose se po promovon “Shqipërinë e Madhe” përdoren për ta larguar vëmendjen nga diskriminimi ndaj shqiptarëve në Luginën e Preshevës. Ai përmend edhe praktikën e pasivizimit të adresave, e cila nga organizata ndërkombëtare të të drejtave të njeriut është cilësuar si “spastrim etnik me mjete administrative”.

Ai nënvizon se mesazhet që Presidenti Begaj dha gjatë kësaj vizite ishin të fokusuara te mbështetja për të drejtat e shqiptarëve në Luginën e Preshevës. Megjithatë, në diskursin politik serb, ato janë interpretuar si kërcënim ndaj sovranitetit dhe integritetit territorial të Serbisë.

Fetoshi thekson se një retorikë e tillë synon të krijojë idenë se edhe shqiptarët kanë një projekt të ngjashëm me “Botën Serbe”, me qëllim që të relativizohet projekti hegjemonist i Beogradit dhe të largohet vëmendja nga kritikat e vazhdueshme ndërkombëtare për shkeljen e të drejtave të shqiptarëve në Serbi.

​Vizita e Bajram Begajt në Bujanoc, Vuçiq: I mori të gjitha lejet për vizitën, personat me armë ishin tanët