Faton Peci: Protesta e disa kryetarëve të komunave ka agjendë politike

Kryetari i Mitrovicës, Faton Peci, ka reaguar ndaj protestës së paralajmëruar nga disa kryetarë komunash, duke vlerësuar se ajo nuk lidhet me shqetësimet e qytetarëve, por me interesa politike.

Sipas Pecit, çështjet ndërinstitucionale duhet të trajtohen përmes dialogut dhe jo përmes protestave. Ai ka theksuar gjithashtu se qindra milionë euro të detyrimeve financiare të komunave nuk i përkasin Qeverisë së Albin Kurtit, por qeverisjeve të mëparshme të PAN-it.

Në reagimin e tij, Peci ka shkruar:

“Protesta e sotme e disa kryetarëve të komunave nuk e ka hallin e qytetarit, por agjendën e pazarit.

Jam kundër protestës së nxitur me agjendë politike.

Komunikimi ndërinstitucional duhet të zgjidhet përmes dialogut. Kjo nismë, përmes së cilës disa kryetarë komunash kanë paralajmëruar pjesëmarrjen në një protestë kundër Qeverisë, është tërësisht politike dhe nuk kontribuon në përmirësimin e shërbimeve për qytetarët.

Qindra milionat euro të barrës financiare të komunave nuk janë obligime të Qeverisë së Albin Kurtit, por janë obligime të qeverisë PAN.”