Fahrush Rexhepi: Falja e kërkuar nga protestuesit nuk e mbyll incidentin para Kuvendit

Deputeti i Lëvizjes Vetëvendosje, Fahrush Rexhepi, ka reaguar për ngjarjen e ndodhur sot para Kuvendit të Kosovës, ku deklaroi se ndaj tij është kryer një veprim i papranueshëm nga disa protestues.

Sipas Rexhepit, incidenti ka marrë një peshë të veçantë edhe për shkak të historisë së familjes së tij, si dhe kontributit të saj në luftën e UÇK-së dhe në procesin që çoi drejt lirisë së Kosovës.

“Ajo që ndodhi sot më dhemb. Jo vetëm për atë që më ndodhi mua, por sepse akte të tilla nuk i bëjnë nder as Kosovës, as sakrificës së popullit tonë dhe as vlerave për të cilat luftuam”, ka shkruar ai.

Deputeti ka theksuar se, në vlerësimin e tij, veprime të tilla nuk nderojnë as personat që ndodhen në Hagë dhe që po përballen me proces gjyqësor.

Rexhepi ka njoftuar se disa prej personave të identifikuar i kanë kërkuar një takim për t’i kërkuar falje, por ka sqaruar se kjo nuk është e mjaftueshme për ta konsideruar çështjen të mbyllur.

“Kërkimi i faljes është zgjedhje personale e secilit, por kjo nuk e mbyll rastin”, ka deklaruar ai.

Po ashtu, Rexhepi ka pretenduar se është identifikuar edhe personi që, sipas tij, ka dhënë urdhrin për sulmin.

Deputeti ka bërë të ditur se do ta përcjellë rastin në organet kompetente të rendit dhe drejtësisë.