Eurodeputeti çek kërkon pezullimin e negociatave të Serbisë me BE-në pas deklaratës së ministres Paunoviç

Deklarata e ministres serbe Snezhana Paunoviç ka nxitur reagimin e eurodeputetit çek Tomas Zdechovsky, i cili e ka konsideruar atë të papranueshme dhe ka kërkuar që Serbia të largohet nga procesi i negociatave për integrim në Bashkimin Evropian.

“Isha plotësisht i shokuar nga ajo që dëgjova nga ministrja e Serbisë. Nuk ishte vetëm tronditje, por diçka krejtësisht e papranueshme. Nëse kjo grua është vërtet ministre, ne duhet ta nxjerrim Serbinë nga negociatat”, tha ai.

Zdechovsky e krahasoi qëndrimin e ministres serbe me gjenocidin e kryer nga nazistët ndaj hebrenjve pas Luftës së Dytë Botërore.

“Është sikur dikush, pasi viziton Aushvicin pas Luftës së Dytë Botërore, të thotë se Hitleri ishte zgjidhja më e mirë për çështjen hebraike. Kjo është plotësisht e papranueshme. Duhet të dërgojmë një mesazh të qartë: askush me këtë lloj retorike nuk do t’i bashkohet Bashkimit Evropian”, theksoi ai, përcjell Euronews Albania.

Ndërkohë, deputeti shqiptar në Kuvendin e Serbisë, Shaip Kamberi, ka njoftuar se të enjten është paraqitur zyrtarisht kërkesa për shkarkimin e ministres së Administratës Shtetërore dhe Vetëqeverisjes Lokale, Snezhana Paunoviq, për deklaratat e saj mbi spastrimin etnik të shqiptarëve gjatë viteve ’90.

Kërkesa është iniciuar nga Grupi Parlamentar Lëvizja e Qytetarëve të Lirë – SDA e Sanxhakut dhe Partia për Veprim Demokratik. Asaj i janë bashkuar edhe deputetë të tjerë të opozitës.

Pak ditë më parë, Snezhana Paunoviç, ministre e Administratës Publike dhe Vetëqeverisjes Lokale në Qeverinë e Serbisë, bëri deklarata të konsideruara skandaloze për Kosovën në një intervistë për një media serbe.

Ministrja e qeverisë së Vuçiqit deklaroi se, nëse do të kishte pasur lirinë e veprimit që kishte Slobodan Milosheviç, ajo do ta kishte “spastruar etnikisht Kosovën gjatë luftës’.