Eugen Cakolli: LDK-ja është pala me nevojën më të madhe për marrëveshje

Pak para seancës konstituive, Eugen Cakolli nga KDI i ka cilësuar jorealiste pritjet se Lëvizja Vetëvendosje dhe LDK-ja do të arrijnë shpejt një marrëveshje politike.

Ai ka theksuar se rrethanat janë ndryshe nga viti 2019, kur të dyja partitë kishin interes më të madh për bashkëpunim. Sipas Cakollit, LVV-ja tash ka mundësi të presë pa pësuar dëme të mëdha politike, ndërsa LDK-ja dhe kryetari i saj, Lumir Abdixhiku, ndodhen përballë një presioni më të fortë. Në këto kushte, pala që e kërkon më shumë marrëveshjen zakonisht hyn në negociata me më pak fuqi.

Cakolli ka ndarë edhe një analizë të situatës politike.

Pritjet optimiste se një marrëveshje mes LVV-së dhe LDK-së do të arrihej vetëm dy ditë para seancës konstituive duken paksa jorealiste.

Një marrëveshje e tillë, e arritur në kohë përpara seancës konstituive, nuk ishte siguruar as pas zgjedhjeve të vitit 2019. Në atë periudhë, të dyja partitë kishin shumë më tepër nevojë për bashkëpunim, ndërsa bashkimi i tyre konsiderohej gjerësisht si “koalicioni i shpresës”. Në zgjedhje, diferenca mes tyre ishte më pak se 2%. Sot, LVV-ja ka gati trefishin e votave dhe mandateve të LDK-së.

Për momentin, Kurti dhe LVV-ja mund të presin, madje edhe të mos arrijnë fare marrëveshje, pa u ndëshkuar rëndë nga elektorati. Ky luks nuk vlen në të njëjtën masë për LDK-në dhe veçanërisht për Abdixhikun, pasi për ta çështja nuk lidhet vetëm me krijimin e institucioneve, por edhe me të ardhmen e tyre politike.

Në fund, sa më e madhe të jetë nevoja e njërës palë për marrëveshje, aq më pak arsye ka pala tjetër për të vepruar me nxitim.