E futur në një qese të zezë, gjendet e vdekur foshnja në pikën e grumbullimit të mbeturinave

Një ngjarje e rëndë raportohet të ketë ndodhur në Kosovë ku një foshnje është gjetur e pajetë në një pikë grumbullimi të mbeturinave.

Sipas asaj që mediat vendase bëjnë me dije mësohet se rreth orës 11:00 të kësaj të hëne, në lagjen Matiqan të Prishtinës, një foshnjë e porsalindur është gjetur e braktisur në rrethana çnjerëzore.

Mësohet se foshnja e pajetë ishte futur në një qese të zezë dhe ishte hedhur në pikën e grumbullimit të mbeturinave.

Në një deklaratë për mediat, zëdhënësi i Policisë, Agron Borovci konfirmoi se mjekët konstatuan vdekjen e foshnjës.

“Sot rreth orës 11:00, policia ka pranuar informatën lidhur me dyshimet për një foshnje të braktisur në afërsi të deponisë së mbeturinave në rrugën “Qëndresa” në Prishtinë. Të gjitha njësitë relevante policore kanë dalë menjëherë në vendin e ngjarjes, po ashtu edhe mjekët emergjent të cilët kanë konstatuar se foshnja e porsalindur është pa shenja jete.

Përderisa trupi i pajetë i foshnjës është dërguar në Institutin e Mjekësisë Ligjore, policia në koordinim me prokurorin e shtetit, me seriozitet është duke u trajtuar rastin dhe ka iniciuar një hetim mbi vdekjen”, ka pohuar Borovci, teksa më tej theksoi se Policia u bën thirrje të gjithë qytetarëve të cilët kanë informacion lidhur me këtë ngjarje të kontaktojnë me efektivët me qëllim zbardhjen e plotë dhe vënien para drejtësisë të personave përgjegjës.