Dy të arrestuar për krime lufte në Kosovë, Beogradi dhe Lista Serbe shpërthejnë në akuza

Dy persona janë vënë në pranga nga Prokuroria Speciale e Kosovës dhe u është caktuar masa e ndalimit për 48 orë, pasi dyshohet se kanë kryer krime lufte ndaj civilëve.

Sipas njoftimit zyrtar, të dyshuarit M.J. dhe M.B. akuzohen se gjatë konfliktit të vitit 1999 kanë ushtruar dhunë kundër popullatës civile në rajonin e Mitrovicës.

Prokuroria theksoi se hetimet vazhdojnë dhe se për hir të mbrojtjes së procesit penal, në këtë fazë nuk do të jepen hollësi të tjera.

Nga ana tjetër, Lista Serbe – formacioni kryesor politik i serbëve në Kosovë, që gëzon mbështetjen e Beogradit – i cilësoi akuzat për krime lufte si një instrument presioni ndaj komunitetit të tyre dhe jo si një ndjekje të mirëfilltë të drejtësisë.

Partia i konsideroi arrestimet si pjesë të një fushate të vazhdueshme frikësimi nga autoritetet kosovare, të drejtuara nga kryeministri në detyrë Albin Kurti.

Edhe Zyra për Kosovën në Qeverinë e Serbisë reagoi ashpër, duke e cilësuar ndalimin e kryer në Zubin Potok si një akt terrorizmi, hakmarrjeje dhe kërcënimi ndaj serbëve.

Gjatë luftës së viteve 1998-1999 në Kosovë, më shumë se 13 mijë civilë humbën jetën dhe mijëra të tjerë rezultuan të zhdukur.

Ende vijon kërkimi për rreth 1.600 persona që nuk janë gjetur, shumica dërrmuese e të cilëve janë shqiptarë.

Institucionet e Kosovës kanë intensifikuar së fundmi arrestimet dhe ngritjen e aktakuzave për krime lufte.

Hetimet për këto krime fillimisht u zhvilluan nga Misioni i OKB-së në Kosovë (UNMIK) gjatë periudhës 2000-2008, për t’u kaluar më pas në duart e EULEX-it, misionit të Bashkimit Evropian për sundimin e ligjit.

Në vitin 2018, EULEX-i ia dorëzoi dosjet e krimeve të luftës sistemit gjyqësor vendor të Kosovës.