Dosja e Prokurorisë Speciale: Besarta Jashari rrëfen si u mësua vrasja e Adem Jasharit

Prokuroria Speciale e Kosovës ka ngritur aktakuzë ndaj 35 shtetasve serbë, të dyshuar për kryerjen e krimeve të luftës. Në këtë çështje gjyqësore është përfshirë edhe dëshmia e Besarta Jasharit, një prej anëtarëve të familjes Jashari që i mbijetoi sulmit të marsit të vitit 1998 në Prekaz.

Sipas rrëfimit të saj, në orët e para të mëngjesit të 5 marsit 1998, familjarët u zgjuan nga zhurma e të shtënave dhe u detyruan të strehoheshin në bodrumin e banesës. Sulmi ndaj tyre vijoi me armë të rënda, tanke dhe granata.

Besarta Jashari ka treguar se gjatë ditëve pasuese shtëpia u bombardua në mënyrë të vazhdueshme. Disa prej familjarëve mbetën të plagosur, ndërsa hapësira ku ishin fshehur u dëmtua nga plumbat dhe fragmentet e granatave që hynin përmes dritareve.

Ajo ka dëshmuar se bombardimet nuk u ndalën as më 6 mars 1998. Ndërsa për datën 7 mars, Besarta ka thënë se e kujton momentin kur u vra Adem Jashari. Lajmin e kishte marrë nga Kushtrimi, i cili u kishte thënë: “E paskan vra babushin”.