Crosetto në Prishtinë: Italia po vlerëson vendosjen e radarëve ushtarakë në Ballkan

Italia po shqyrton mundësinë e vendosjes së radarëve ushtarakë në Ballkan, me synim forcimin e mbrojtjes së vendeve të rajonit dhe të vetë Italisë përballë kërcënimeve të së ardhmes. Ministri italian i Mbrojtjes, Guido Crosetto, deklaroi gjithashtu se angazhimi i vendit të tij në Kosovë do të vijojë edhe nëse prania e KFOR-it do të reduktohet.

Sipas agjencisë italiane të lajmeve ANSA, deklaratat u bënë në Prishtinë, gjatë ceremonisë së kalimit të komandës së misionit të KFOR-it, ku gjeneralmajori Roberto Vergori mori drejtimin e forcave.

Crosetto tha se marrja e komandës nga gjenerali Vergori shënon vazhdimin e angazhimit italian në Kosovë. Ai shtoi se Italia e konsideron Ballkanin një pikë të rëndësishme për sigurinë e saj dhe do të jetë e pranishme edhe pas një reduktimi të mundshëm të trupave të KFOR-it.

Ministri italian e cilësoi si thelbësore garantimin e sigurisë në Ballkan dhe përdorimin e kapaciteteve të rajonit për të parandaluar kërcënimet. Në këtë kuadër, ai përmendi edhe mundësinë e vendosjes së radarëve, të cilët sipas tij do të ndihmonin në mbrojtjen e vendeve ballkanike dhe të Italisë.

Duke folur për rreziqet që mund të shfaqen në të ardhmen, Crosetto iu referua raketave që goditën aeroportet në Arabinë Saudite. Ai theksoi se këto armë ishin ndërtuar nga Huthit dhe jo nga inxhinierë të sofistikuar, ndërsa kishin arritur shpejtësinë prej 8.500 kilometrash në orë.

Sipas tij, ky zhvillim tregon përmasat e kërcënimeve me të cilat mund të përballen të gjitha vendet në të ardhmen dhe nevojën për të mbrojtur edhe shtetet kufitare e vendet mike.

Crosetto nënvizoi se bashkëpunimi me aleatët është i domosdoshëm për ngritjen e një mbulimi mbrojtës që do të shërbente në parandalimin e kërcënimeve të ardhshme.