Çitaku kërkon që seanca konstituive të vazhdojë brenda 48 orëve

Sekretarja e përgjithshme e PDK-së, Vlora Çitaku, gjatë një konference për media, e akuzoi kryesuesin e seancës konstituive, Avni Dehari, se nuk po vepron në përputhje me Kushtetutën, aktgjykimet e Gjykatës Kushtetuese dhe Rregulloren e Kuvendit.

Sipas Çitakut, Dehari po ndjek vullnetin politik të partisë së tij, në vend që t’u përmbahet detyrimeve kushtetuese dhe procedurale. Ajo tha se kjo nuk është shkelja e parë, duke kujtuar se Kuvendi fillimisht nuk u konstituua brenda afatit 30-ditor të vendosur nga Gjykata Kushtetuese. Më pas, siç deklaroi ajo, nuk u respektua kërkesa që seanca konstituive të vazhdonte çdo 48 orë, ndërsa tani u refuzua edhe thirrja e saj pas kërkesës së PDK-së.

Deputetja e PDK-së theksoi se funksionimi i institucioneve të Kosovës nuk mund të varet nga vullneti i një subjekti politik. Sipas saj, nuk bëhet fjalë për një rast të izoluar procedural, por për një mënyrë të përsëritur të veprimit politik, ku Kushtetuta respektohet vetëm atëherë kur i konvenon një partie.

Çitaku e cilësoi të papranueshme vendosjen e interesit të një partie mbi Kushtetutën, rregullat dhe institucionet. Ajo deklaroi se një sjellje e tillë përbën suspendim praktik të rendit kushtetues dhe të demokracisë.

Duke folur për gjendjen në legjislativ, Çitaku tha se Kuvendi është praktikisht i mbyllur dhe se deputetëve po u mohohet mundësia për të ushtruar mandatet. Ajo nënvizoi se këto mandate nuk janë dhënë nga Albin Kurti apo Lëvizja Vetëvendosje, por nga qytetarët e Republikës së Kosovës më 7 qershor.

Sekretarja e përgjithshme e PDK-së sqaroi se partia e saj nuk po kërkon pushtet dhe as ndonjë marrëveshje politike për vete, por funksionalizimin e shtetit. Ajo paralajmëroi se pas 48 orësh do të paraqitet sërish kërkesa për seancë, ndërsa veprimtaria e PDK-së nuk do të mbetet vetëm brenda institucionit. Sipas saj, aktiviteti do të shtrihet edhe jashtë Kuvendit përmes formave më të gjera të mobilizimit politik, demokratik dhe qytetar.

Çitaku bëri të ditur se do të zhvillohen bashkëbisedime me qytetarët dhe me përfaqësues të shtresave të ndryshme të shoqërisë, përfshirë studentë, mjekë, biznesmenë dhe ndërmarrës. Ajo tha se kaosi politik dhe ajo që e quajti anarki kushtetuese prekin secilin.

Sipas saj, çështja nuk kufizohet te dhënia e betimit apo te zgjedhja e kryetarit dhe nënkryetarëve të Kuvendit, pasi shteti ndodhet i bllokuar. Çitaku deklaroi se PDK-ja nuk do ta lejojë vazhdimin e kësaj gjendjeje dhe se gjatë ditëve të ardhshme do të jetë aktive çdo ditë.

Ajo njoftoi se përfaqësuesit e PDK-së do të jenë çdo ditë në Kuvend dhe se kërkesa zyrtare do t’i dorëzohet përsëri Avni Deharit. Çitaku shtoi se nesër do të jenë në pritje në Kuvend, ndërsa do të organizohen edhe aktivitete të tjera.

Gjatë ditës, deputetët e PDK-së dhe të Aleancës i kërkuan Lëvizjes Vetëvendosje thirrjen e vazhdimit të seancës konstituive. Në këtë periudhë u shënuan disa raste të shtyrjeve fizike ndërmjet deputetëve të partive ish-opozitare dhe atyre të Lëvizjes Vetëvendosje.