Çfarë parashikohet të ndodhë në seancën konstituive të Kuvendit më 6 gusht?

Seanca konstituive e Kuvendit të ri, të dalë nga zgjedhjet e qershorit, do të mbahet më 6 gusht, duke filluar në orën 10:00. Vendimi është marrë nga ushtruesja e detyrës së presidentit, Albulena Haxhiu.

Vullnet Bugaqku nga KDI-ja ka deklaruar se seanca e caktuar për të enjten duhet të organizohet duke respektuar procedurat e parapara në Rregulloren e Punës së Kuvendit.

Ai ka shpjeguar se, jo më vonë se pesë ditë përpara zhvillimit të seancës konstituive, duhet të mbahet një takim mes kryetarit ose kryetares së legjislaturës së kaluar dhe drejtuesve apo përfaqësuesve të subjekteve politike që kanë siguruar ulëse në Kuvendin e Kosovës.

Sipas Bugaqkut, në këtë takim hartohet rendi i ditës që më pas duhet të procedohet gjatë seancës konstituive.

Duke iu referuar Rregullores së Punës së Kuvendit, ai ka bërë të ditur se axhenda e seancës së 6 gushtit duhet të nisë me formimin e Komisionit të Përkohshëm për Verifikimin e Kuorumit dhe Mandateve të Deputetëve.

Më pas, rendi i ditës duhet të vazhdojë me betimin e deputetëve, zgjedhjen e kryetarit të Kuvendit dhe përzgjedhjen e nënkryetarëve të Kuvendit.

Bugaqku ka nënvizuar se Kuvendi mund të vlerësohet si i konstituuar vetëm nëse të gjitha këto pika përmbyllen me sukses brenda asaj dite.

Ai ka thënë se pret që në seancën e 6 gushtit të zbatohet dhe të respektohet rendi i ditës, i cili tashmë është përcaktuar përmes Rregullores së Punës së Kuvendit.

Në përfundim, Bugaqku ka rikujtuar se drejtimin e seancës konstituive e merr deputeti më i vjetër në moshë, ndërsa ai ndihmohet nga deputeti më i ri në moshë.