Bursat për studentë u shtuan si në numër ashtu edhe në shumë, thotë Kurti

Mbështetja që qeveria e udhëhequr prej tij i ka ofruar rinisë së Kosovës u cilësua si jashtëzakonisht e gjerë nga kryeministri në detyrë, Albin Kurti.

Vlerësimet ai i shprehu gjatë pjesëmarrjes në aktivitetin “Zëri yt, e ardhmja jonë”, që u zhvillua në sheshin “Nëna Terezë” në Prishtinë, për nder të Ditës Ndërkombëtare të Rinisë.

Fokusi kryesor i fjalës së Kurtit ishte asistenca e ofruar për të rinjtë në fushën e arsimimit pa pagesë dhe skemën e bursave.

Kryeministri Kurti: Përfitime të dyfishta nga shkollimi falas dhe bursat

“Më tej, me arsimin e lartë pa tarifa, nga i cili dolën fitues dhjetëra mijëra studentë, kësaj i bashkëngjitet përkrahja me më tepër se 18 mijë bursa, shumat e të cilave sillen nga 1,000 deri në 10,000 euro, duke përfshirë periudhën 2021-2026. Vlen të theksohet gjithashtu se vlera e bursës u rrit nga 700 euro, aq sa ishte më parë, në 1,000 euro që është aktualisht. Brenda këtyre masave përfshihen gati 7,300 bursa për degët STEM (shkencë, teknologji, inxhinieri dhe matematikë) si dhe pothuajse 9,700 bursa elitare për ata studentë që kanë notë mesatare mbi 9. Por mbështetja shtrihet edhe te rreth 250 bursa me vlerë 7,500 deri 8,500 euro, dedikuar studentëve të doktoratës në 500 universitetet më të mira globale. Veç kësaj, janë financuar afro 700 studentë të nivelit baçelor dhe master që kanë studiuar ose vijojnë studimet në Shtetet e Bashkuara të Amerikës, Francë, Japoni, Hungari dhe shtete të tjera”, deklaroi Kurti.

Ministri i Sportit dhe Rinisë, Blerim Gashani, u shpreh se është detyrë e institucioneve t’u vënë veshin më shumë të rinjve dhe të hapin shtigje që ata të kyçen në proceset vendimmarrëse dhe në përparimin e shtetit.

Ministri Gashani: Kemi quar përpara projektet për rininë

“Pikërisht në këtë pikë ne e kuptojmë obligimin tonë institucional: jo thjesht t’i ftojmë të rinjtë të marrin pjesë, por të ndërtojmë terrenin dhe rrethanat që ata realisht të integrohen. Gjatë kësaj kohe në krye të Ministrisë së Sportit dhe Rinisë, jemi përqendruar në këtë aspekt. I kemi modernizuar nismat që kanë të bëjnë me lëvizshmërinë e rinisë, sepse bindja jonë është se një i ri ka nevojë të dalë jashtë caqeve, të përthithë eksperienca nga të tjerët, të krijojë lidhje dhe rrjete të reja, e mandej t’i kthejë ato eksperienca në dobi të vendit tonë,” theksoi Gashani.

Ai shtoi se bashkë me ëndrrat dhe vështirësitë, rinia ka edhe historitë e veta.

Ministri Gashani: T’i orientojmë të rinjtë drejt mundësive dhe eksperiencave të freskëta

“Bëhet fjalë për të riun që zotëron një koncept të mirë, por ende nuk ia gjen rrugën realizimit. Fjala është për të riun që zotëron talent, dëshirë dhe vullnet, por ndeshet me barriera që nuk varen thjesht nga angazhimi i tij. Flasim për të riun që ka dëshirë të udhëtojë, të edukojë veten, të fitojë përvojë, të jetë pjesë e vullnetarizmit, të merret me aktivitete sportive apo të ngrejë një biznes, por mbase nuk i ka ende të qarta se ku ta kërkojë mundësinë e volitshme,” shtoi Gashani.

Kjo ngjarje u realizua nën kujdesin e Ministrisë së Sportit dhe Rinisë, me partneritetin e Kartës Rinore Evropiane në Kosovë.