Buçpapaj pas aktgjykimit në Hagë: Të ndërpritet përplasja me Specialen dhe të respektohet drejtësia

Aktgjykimi i 16 shtatorit në Hagë, me të cilin Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet dhe Rexhep Selimi me 13 vjet, ka nxitur reagime të shumta në opinionin publik dhe në skenën politike.

Pjesë e debatit është bërë edhe publicistja Elida Buçpapaj. Përmes një reagimi në Facebook, ajo ka kërkuar që të ndërpriten fushatat kundër Gjykatës Speciale dhe ka bërë thirrje për respektimin e drejtësisë, pajtim dhe bashkërendim me aleatët e Kosovës.

Buçpapaj kundërshton gjithashtu kërkesat për mbylljen e Speciales, ndërsa vlerëson se rasti i katër të dënuarve duhet të trajtohet vetëm nëpërmjet mekanizmave ligjorë dhe institucionalë, përcjell “Bota sot”.

Në reagimin e saj, ajo e cilëson të turpshme publikimin e listave për të treguar se kush e ka votuar dhe kush nuk e ka mbështetur krijimin e Gjykatës Speciale.

Sipas Buçpapajt, Hashim Thaçi ka vepruar drejt, ashtu si edhe deputetët që votuan pro saj. Ajo përmend pretendimet se Thaçit i ishte krijuar bindja se drejtësia do ta anashkalonte, por thekson se drejtësia duhet të jetë e njëjtë për të gjithë.

Publicistja thotë se ka parë reagimin e Glauk Konjufcës nga Haga, qëndrimet e kryetarit de facto të PDK-së së bashku me Vlora Çitakun, si dhe ato që i quan kore populiste me maska të zeza e kore bretkosash në rrjetet sociale. Sipas saj, këto zëra pretendojnë se mbrojnë vlerat e UÇK-së dhe i bashkohen “marres” së Edvin Ramës kundër Gjykatës Speciale.

Buçpapaj e përshkruan atë si njërin nga dy autorët e nismës për shkëmbimin e territoreve, proces që, sipas saj, e përfshiu dhe e dërgoi Thaçin në Hagë.

Ajo kërkon që fushata kundër Gjykatës Speciale të marrë fund menjëherë dhe që të dëgjohen këshillat e aleates ekzistenciale, të përcjella përmes DASH-it, si dhe qëndrimet e vendeve aleate, deri te Kroacia mike.

Buçpapaj shprehet se është kritike ndaj zonjës Marta Kos, por jo në këtë rast, pasi pajtohet me deklaratën e saj se nevojitet pajtim.

Sipas saj, pajtimi dhe liria duhet të ndërtohen duke e njohur dhe vlerësuar Gjykatën Speciale.

Ajo argumenton se kjo është mënyra për t’i ndihmuar katër të gjykuarit nga Specialja. Buçpapaj thekson se kjo gjykatë i ka të gjithë kryeprokurorët amerikanë dhe kryegjykatësin amerikan, ndërsa prokurorët e gjykatësit e tjerë vijnë nga BE-ja, Anglia dhe Zvicra. Ajo shton se financimi sigurohet drejtpërdrejt nga këto vende, në mënyrë që Kosova të ketë drejtësi me standarde perëndimore dhe të funksionojë si shtet i së drejtës.

Publicistja kërkon të hiqet dorë nga ato që i quan ide të çmendura për mbylljen e Gjykatës Speciale, duke paralajmëruar se një veprim i tillë do ta dëmtonte si Katërshen, ashtu edhe Kosovën.

Ajo bën thirrje gjithashtu të mos kërkohet mbështetje nga Richard Grenell, të cilin e përshkruan si një “sharlatan amerikan antiamerikan”, pasi vlerëson se përkrahja e tij është në dëm të Katërshes dhe Kosovës.

Buçpapaj kërkon distancim edhe nga Edi Rama, duke kujtuar se ai e ka quajtur ish-kryeprokurorin e Gjykatës Speciale “sikar”, ndërsa dje e ka cilësuar Specialen “marre”.

Në reagim kërkohet që të ndalet edhe marrja peng e institucioneve të Kosovës dhe kalimi në tri palë zgjedhje, sepse, sipas saj, kjo situatë dëmton vendin dhe Katërshen.

Ajo kërkon të mos mbulohen me heshtje krimet dhe të mos u mohohet drejtësia viktimave. Buçpapaj përmend ministrin e Mbrojtjes Ahmet Krasniqi nga FARK-u, i vrarë në mes të Tiranës, si dhe viktima të tjera, mes të cilave emra të njohur, veprimtarë, komandantë, aktivistë, deputetë dhe gazetarë. Sipas saj, trajtimi i këtyre rasteve është në interes të Kosovës dhe Katërshes.

Një tjetër kërkesë e saj është ndërprerja e manipulimit dhe shpërdorimit të fjalës së lirë nga klientë të politikës, të cilët i quan mbrojtës të rremë të Katërshes, pasi paraqesin vetëm pjesë të së vërtetës dhe jo pamjen e plotë.

Buçpapaj bën thirrje të përfundojë ajo që e konsideron luftë kundër Republikës së Kosovës përmes ngërçit institucional dyvjeçar. Ajo e quan këtë situatë turp të klasës politike dhe thotë se ajo vepron kundër interesave të Kosovës e Katërshes, ndërsa i shërben Serbisë së Vuçiqit.

Sipas saj, ka mbërritur momenti për pajtim, çka përjashton çdo bllokadë ose shantazh të aktorëve politikë ndaj Republikës së Kosovës dhe, rrjedhimisht, ndaj Katërshes. Ky pajtim, thekson ajo, duhet të mbështetet mbi themelet e drejtësisë.

Buçpapaj shprehet se ndoshta gabon dhe i kërkon falje Zotit kur mendon se 24 vjet paraburgosje do të mjaftonin për secilën viktimë. Megjithatë, ajo këmbëngul se duhet të ketë përgjegjshmëri, pranim të fajit dhe kërkim ndjese, në mënyrë që Kosova të hapë një kapitull të ri, i cili do ta çlironte moralisht Katërshen.

Ajo rikujton mesazhin që James Rubin dha nga Kosova përpara dëshmisë së tij në Hagë: pas kontributit të njohur dhe misionit të përmbushur, Krahu i Luftës duhet të largohet nga skena politike. Sipas Buçpapajt, kjo kohë tashmë ka ardhur.

Publicistja vlerëson se historisë së Kosovës nuk mund t’i shtohet dhe as t’i hiqet asgjë, njësoj siç nuk mund të cenohen meritat e atyre që i kanë fituar ato apo fajet e atyre që ajo i quan çakej.

Sipas saj, mbrojtja e Republikës së Kosovës dhe e Katërshes duhet të bëhet tani duke respektuar, në të gjitha shkallët, drejtësinë me standard perëndimor të Gjykatës Speciale. Ajo kërkon angazhimin e institucioneve shtetërore dhe të diplomacisë, në koordinim me aleatët e dëshmuar të shqiptarëve, të cilët e shpëtuan Kosovën nga gjenocidi dhe spastrimi etnik i shtetit kriminal të kryekasapit të Ballkanit.

Buçpapaj thekson se ky synim nuk realizohet duke ua mbyllur gojën dëshmitarëve, duke i lënë dosjet e viktimave të mbuluara nga pluhuri apo duke kërcënuar Republikën e Kosovës me banda personash që SHBA-ja i ka futur në listën e zezë.

Ajo vlerëson se politika dhe metodologjia e deritanishme, e paraqitur si mbështetje për Katërshen, por e bazuar në konfrontim, bllokim dhe marrje peng të shtetit, e ka dëmtuar në mënyrë të skajshme Republikën e Kosovës dhe veçanërisht Katërshen.

Buçpapaj kërkon që Katërshja të mos krahasohet me Ante Gatovinën. Në vend të kësaj, ajo bën thirrje të punohet për pajtim, duke e njohur Gjykatën Speciale, në interes të Republikës së Kosovës, stabilitetit e paqes në Ballkan dhe çlirimit të Katërshes.

Ajo shtron pyetjen nëse 24 vjet janë të mjaftueshme për secilën pabesi, ndërsa nënvizon se kërkimi i ndjesës hap rrugën për falje dhe pajtim, në mënyrë që vëllavrasja të mos përsëritet më kurrë.

Në fund, Buçpapaj shkruan se çdo gazetar, gjatë punës së tij, duhet ta vendosë veten në pozitën e viktimave, të fajtorëve dhe të familjarëve të të dyja palëve. Sipas saj, gazetari duhet të ketë parasysh edhe interesin e shtetit të së drejtës, pra të të gjithë qytetarëve pa përjashtim, në mënyrë që secili ta jetojë jetën me dinjitet dhe në paqe.

Në një shënim të fundit, ajo përmend si një nga gabimet e Hashim Thaçit faktin që nuk u takua në Shkup më 5 mars 1999 me senatorin Bobe Dole, pasi nuk pati mundësi, por u takua më 7 mars 1999 me Paskal Milon në Tiranë.