Bogujevci viziton muzeun “Çast” dhe takohet me Jahjagën

Ministrja Bogujevci qëndroi sot në muzeun “Çast”, ku u mirëprit nga Presidentja Atifete Jahjaga.

Në këtë vizitë u fol për rolin që ka muzeu si një hapësirë e kujtesës kolektive, për aktivitetet dhe projektet që po zhvillon aktualisht Fondacioni Jahjaga, si edhe për domosdoshmërinë e vazhdueshme të ruajtjes dhe dokumentimit të dëshmive të personave që i mbijetuan dhunës seksuale gjatë luftës në Kosovë.

Muzeu “Çast” konsiderohet një pikë e rëndësishme kujtese dhe reflektimi, pasi ruan rrëfime që dëshmojnë të vërtetën historike dhe njëkohësisht nderojnë dinjitetin e të mbijetuarve.

Me veprimtarinë e tij, ky muze ndihmon në forcimin e kulturës së kujtesës dhe në edukimin e brezave të rinj për një prej kapitujve më të dhimbshëm të historisë së vendit.