Beqiri: Delegatët vendosin me votë për kryetarin, Kuvendi duhet ta forcojë LDK-në

Ismet Beqiri, anëtar i Lidhjes Demokratike të Kosovës (LDK), pret që partia të dalë më e fuqishme pas Kuvendit të Jashtëzakonshëm, ndërsa theksoi se delegatët do të vendosin përmes votës nëse kryetari aktual do të shkarkohet.

Ai vlerësoi se Kuvendi pritet të zhvillohet mirë, duke shpjeguar se Statuti i LDK-së përcakton mënyrat e thirrjes së tij dhe se sigurimi i një të tretës së votave përbën njërën prej tyre. Sipas Beqirit, mbledhja është thirrur për shkak të pakënaqësive me situatën aktuale, ndërsa synimi është që LDK-ja të dalë më e fortë prej saj.

Beqiri e cilësoi të pakënaqshëm rezultatin e fundit zgjedhor të LDK-së.

Sipas tij, renditja e LDK-së në vendin e dytë apo të tretë përbën fyerje për partinë, ndaj do të bëhet gjithçka për ta ndryshuar këtë gjendje.

I pyetur për mundësinë e shkarkimit të kryetarit aktual, ai u përgjigj se vendimin përfundimtar do ta japë vota e delegatëve.

Beqiri shtoi se Kuvendi nuk është përqendruar te emri i personit që mund ta pasojë kryetarin aktual.

Ai tha se nuk e di cili do të jetë rezultati, pasi këtë do ta përcaktojë votimi. Beqiri rikujtoi se qëndrimin e tij e ka bërë publik dhe u shpreh i bindur se LDK-së i duhen ndryshime për të ecur përpara dhe për të siguruar rezultate më të mira.