Bedri Hamza premton barazi gjinore dhe mbështetje për gratë në Kosovë

Kandidati për kryeministër nga PDK-ja, Bedri Hamza, ka mbajtur një tubim elektoral me gratë, ku është zotuar për barazi gjinore, mbështetje financiare dhe masa kundër dhunës ndaj grave, duke e cilësuar fuqizimin e tyre si kyç për zhvillimin e Kosovës.

Kandidati për kryeministër nga radhët e PDK-së, Bedri Hamza, ka mbajtur tubim elektoral me gratë. Në këtë takim, Hamza tha se angazhohet për një Kosovë të barabartë dhe gjithëpërfshirëse, ku gratë janë forca lëvizëse e shoqërisë.

Ai, në programin e tij, ka hartuar 6 pika që kanë të bëjnë me përkrahjen e tyre.

Hamza shtoi se barazia gjinore do të jetë objektivi kryesor në qeverisjen e tij dhe po ashtu edhe në vendimmarrje. Nuk do të mungojë as përkrahja financiare dhe lehtësira të tjera.

Në këtë takim u tha se siguria dhe dinjiteti i grave janë të pacenueshme dhe, për këtë arsye, do të zbatohet politika e tolerancës zero ndaj dhunës ndaj grave. Gjithashtu, u theksua se do të sigurohen strehimore dhe shërbime rehabilituese për viktimat e dhunës, si dhe do të përmirësohet legjislacioni për të garantuar mbrojtjen dhe ndëshkimin e rreptë të çdo forme dhune.