BE-ja kërkon përmbajtje pas dënimit të ish-krerëve të UÇK-së

Bashkimi Evropian u ka kërkuar të gjitha palëve dhe aktorëve në Kosovë e rajon që të ruajnë përmbajtjen pas aktgjykimit ndaj Hashim Thaçit, Kadri Veselit, Rexhep Selimit dhe Jakup Krasniqit.

Zëdhënësi i BE-së, Guillaume Mercier, deklaroi për Radion Evropa e Lirë se Dhomat e Specializuara dhe Zyra e Prokurorit të Specializuar duhet të vijojnë punën në përmbushje të mandatit të tyre, pa ndërhyrje.

“Procesi i drejtësisë duhet të vazhdojë rrjedhën e vet, çka ka rëndësi të veçantë për viktimat. Autoritetet duhet të sigurojnë mbrojtjen e të gjitha komuniteteve dhe banorëve në të gjithë Kosovën”, u shpreh Mercier.

BE-ja tha se e ka marrë në shqyrtim aktgjykimin e shkallës së parë dhe vlerësoi se Dhomat e Specializuara po e ushtrojnë drejtësinë përmes procedurave të drejta, të paanshme dhe të pavarura, duke u mbështetur në parimin e përgjegjësisë individuale penale.

Mercier theksoi se personat e dënuar mund ta kundërshtojnë aktgjykimin përmes apelimit para një paneli të posaçëm të gjyqtarëve të Apelit.

Njëkohësisht, Bashkimi Evropian rikonfirmoi mbështetjen për Dhomat e Specializuara, duke rikujtuar se ato u themeluan në bazë të vendimeve të Kuvendit të Kosovës të viteve 2014 dhe 2015 dhe veprojnë në kuadër të sistemit juridik të Kosovës.

Sipas BE-së, veprimtaria e këtyre institucioneve ka rëndësi për vendosjen e përgjegjësisë penale, drejtësinë për viktimat dhe familjet e tyre nga të gjitha komunitetet në Kosovë, si dhe për procesin e pajtimit.

“Duhet të krijohet një mjedis ku nuk ka frikë dhe hakmarrje, ndërsa viktimat dhe dëshmitarët duhet të mbrohen”, deklaroi Mercier. / REL