Avni Islami reagon ndaj deklaratës së Sheshelit dhe kërkon rritje të kapaciteteve të sigurisë në Kosovë

Eksperti i sigurisë Avni Islami ka dalë me reagim pas deklaratës së politikanit serb Vojislav Sheshel, i cili u shpreh se “përderisa ushtria serbe nuk kthehet në Kosovë, nuk ka bukë”.

Sipas Islamit, ky qëndrim pasqyron qartë mënyrën se si e sheh Kosovën spektri politik në Serbi, ndërsa njëkohësisht ka kërkuar që vendi të rrisë në maksimum kapacitetet në sektorin e sigurisë.

Ai thekson se Kosova duhet të fuqizojë Policinë, AKI-në dhe Ushtrinë, duke nënvizuar se “balanca e forcave ushtarake prodhon paqe dhe siguri”.

Postimi i Islamit:

Reagim me shkas,

Rreth shtatë muaj më parë, presidenti Vuçiç deklaroi se Serbia po pret rrethana të tjera të favorshme që të hyjë në Kosovë me ushtrinë e saj për ta okupuar atë.

Është domethënëse që pas kësaj periudhe është paraqitur mësuesi dhe frymëzuesi i Vuçiçit, Vojsllav Shesheli. Ai së fundmi deklaroi se “përderisa ushtria serbe nuk kthehet në Kosovë, nuk ka bukë”. Ky politikan antishqiptar, që vazhdimisht ka bërë thirrje për zhdukjen e shqiptarëve, tregon qartë se çfarë mendojnë dhe planifikojnë ata për ne. Kur është fjala për Kosovën, i tërë spektri politik në Serbi mendon njësoj, pa dallim mes pozitës dhe opozitës.

Për këtë arsye, ne duhet të forcohemi maksimalisht në fushën e sigurisë, përmes fuqizimit të Policisë, AKI-së dhe Ushtrisë së vendit tonë. Nuk thuhet kot se balanca e forcave ushtarake prodhon paqe dhe siguri.