Arrestimet për spiunazh në Kosovë, Meha paralajmëron për rrjetin serbo-rus dhe kërkon verifikim nga AKI-ja

Gjatë viteve të fundit, autoritetet në Kosovë kanë vënë në pranga disa persona që dyshohen për spiunazh dhe lidhje me shërbimin inteligjent të Serbisë, BIA.

Ndër emrat e arrestuar nën këto dyshime janë Bedri Shabani, Muharrem Qerimi, Hysri Selimi dhe Fatmir Sheholli.

Arrestimi më i fundit lidhet me Fehim Salin, i cili u ndalua më 13 gusht 2026 në pikën kufitare të Merdarës. Ai dyshohet për spiunazh dhe bashkëpunim me BIA-n serbe, ndërsa Gjykata Themelore në Prishtinë, sipas raportimeve, i ka caktuar 30 ditë paraburgim.

Njohësi i çështjeve të sigurisë, Xhevat Meha, ka shprehur shqetësimin se veprimtaria e shërbimeve serbe në Kosovë mund të jetë e pranishme në institucione të ndryshme dhe në sektorë me rëndësi për jetën publike.

Duke folur për “Bota sot” rreth arrestimeve të fundit, Meha ka thënë se në dy-tre vitet e fundit janë arrestuar disa persona për dyshime të tilla, por numri i tyre ende nuk ka arritur në 10.

“Ditë më parë u paraburgos një individ që ishte spiun i Serbisë. Në dy-tre vitet e fundit janë burgosur disa, që ende nuk arrijnë numrin 10. Veprimtaria e fshehtë serbe në Kosovë është masive. Në vitin 2013, në Bruksel është raportuar se Serbia ka 720 agjentë në Kosovë. Gjatë luftës raportohet që brenda strukturave të UÇK-së ka pasur 140 agjentë. Numri prej rreth 700 agjentësh është numri maksimal që i duhet Serbisë për Kosovën”, ka deklaruar ai.

Sipas Mehas, rreziku kryesor nuk përcaktohet vetëm nga numri i agjentëve, por nga pozicionet dhe hapësira ku shtrihet rrjeti i tyre.

“Problemi nuk është te numri, por te shtrirja e këtyre agjentëve shqipfolës serbo-rusë. Hulumtimet dhe analizat që kam bërë në këtë fushë më thonë se shtrirja e këtij rrjeti përfshin krerë të partive politike, krerë të institucioneve të tjera, si prokurori, gjyqësi, hetuesi, e të mos flasim për institucione si Qeveria, Presidenca, Kuvendi, agjencitë shtetërore, ndërmarrjet publike e kështu me radhë. Të mos harrojmë edhe mediat, publicistikën, opinionbërësit etj.”

Meha ka deklaruar se, sipas informacioneve që disponon, Agjencia Kosovare e Inteligjencës prej disa vitesh po e ndjek dhe po e dokumenton aktivitetin e këtij rrjeti të fshehtë shqipfolës serbo-rus. Ai ka theksuar se institucionet duhet t’i kërkojnë të dhëna AKI-së, e cila ka mandatin dhe autorizimin për t’i ofruar ato.

Në përfundim, ai ka kërkuar që Presidenca, Kryeministria, agjencitë shtetërore dhe institucionet e pavarura të kërkojnë informacion nga AKI-ja. Sipas tij, nisma duhet të përfshijë edhe partitë politike, të cilat duhet të kërkojnë certifikatë pastërtie për kryetarët, anëtarët e kryesive, anëtarët e këshillave të përgjithshëm dhe delegatët e kuvendeve partiake.

“Duhet që të jetë kriter punësimi në institucionet shtetërore dhe institucionet e tjera që të sillet certifikata e pastërtisë”, ka përfunduar Meha për “Bota sot”.