Alicia Kearns: Serbia armatosi grupin që kreu sulmin në Banjskë, në rrezik liritë demokratike

Alicia Kearns, deputete britanike dhe anëtare e Asamblesë Parlamentare të Këshillit të Evropës, ka deklaruar se Serbia ka furnizuar me armë grupin që ndërmori sulmin terrorist në Banjskë, ku u vra rreshteri policor Afrim Bunjaku.

Në një video të publikuar prej saj në rrjetin “X”, nga fjalimi i mbajtur në Këshillin e Evropës, Kearns doli në mbrojtje të qytetarëve të Serbisë, duke thënë se ata meritojnë zgjedhje të lira, media të pavarura dhe një demokraci të çliruar nga korrupsioni dhe kapja e shtetit.

“Evropa nuk duhet ta kthejë shikimin nga ana tjetër ndërsa liritë demokratike po shkatërrohen”, ka shkruar ajo në X.

Duke iu referuar tragjedisë së ndodhur në Novi Sad, Kearns foli edhe për protestat, duke theksuar se 4 milionë njerëz dolën në rrugë.

Ajo ngriti shqetësimin edhe për gjendjen e mediave në Serbi, duke nënvizuar se shtypi i lirë është një shtyllë themelore mbi të cilën ndërtohet demokracia. Sipas saj, mediat në Serbi po “çmontohen qëllimisht dhe në sy të publikut”.