Albulena Haxhiu kërkon që protesta para Kuvendit të vijojë paqësisht

Kryetarja e Kuvendit të Kosovës, Albulena Haxhiu, u bëri apel protestuesve të mbledhur para institucionit që të ruajnë qetësinë dhe të mos e cenojnë karakterin paqësor të protestës.

Gjatë seancës së sotme, Haxhiu theksoi se protestat janë një e drejtë e garantuar nga Kushtetuta dhe legjislacioni në fuqi. Ajo paralajmëroi se çdo akt dhune do ta dëmtonte kauzën për të cilën protestuesit po shprehen, atë të UÇK-së dhe të çlirimtarëve.

“E drejta për protestë është e garantuar me Kushtetutë, por edhe me legjislacionin në fuqi dhe, si e tillë, duhet të respektohet plotësisht. Nga kjo foltore, nga ky vend, nga ky institucion, si kryetare e Kuvendit dhe si u.d. presidente, i bëj thirrje të gjithë protestuesve që ta ruajnë karakterin paqësor të protestës, sepse besoj se të gjithë pajtohemi që dhuna e dëmton kauzën që duam ta mbrojmë, atë të UÇK-së, por edhe të çlirimtarëve tanë”, deklaroi Haxhiu.

Ajo rikujtoi se Kuvendi e ka miratuar në parim projektligjin dhe e ka renditur atë si pikën e parë të rendit të ditës së seancës.

Haxhiu u kërkoi protestuesve që të ruajnë qetësinë dhe ta vijojnë tubimin në mënyrë paqësore.

Gjithashtu, kryetarja e Kuvendit u bëri thirrje grupeve parlamentare që të përcjellin të njëjtin mesazh, duke nënvizuar se “as UÇK-ja e as çlirimtarët tanë nuk mbrohen me dhunë”.