Albanians for America kërkon hapjen e arkivave serbe për të zbardhur fatin e të zhdukurve

Hapja e dokumentacionit ushtarak dhe policor të Serbisë është vendimtare për të sqaruar fatin e rreth 1,600 personave të zhdukur me dhunë gjatë luftës në Kosovë, si dhe për të garantuar drejtësi për viktimat, ka vlerësuar organizata “Albanians for America”.

Përmes një opinioni të publikuar së fundmi, organizata ka kujtuar se, afro tri dekada nga përfundimi i luftës, mijëra familje ende nuk kanë marrë përgjigje për të afërmit e tyre. Hetimet e fundit në Kalludrën e Vogël dhe Jabukë, sipas saj, kanë risjellë në qendër të vëmendjes domosdoshmërinë për zbardhjen urgjente dhe të plotë të krimeve të luftës, si dhe të fshehjes sistematike të provave.

Në opinion thuhet se rreth 1,600 persona vazhdojnë të konsiderohen të zhdukur me dhunë, ndonëse kanë kaluar afro tri dekada nga përfundimi i luftës në Kosovë. Ndërkohë, mijëra familje mbeten në pritje të së vërtetës për fatin e njerëzve të tyre më të dashur, ndërsa hetimet në Kalludrën e Vogël dhe Jabukë dëshmojnë nevojën urgjente për të ndriçuar tërësisht krimet e luftës të kryera nga Serbia dhe fshehjen e organizuar të provave.

“Albanians for America” vlerëson se puna kërkimore dhe gërmimet në terren kanë rëndësi, por vetëm ato nuk janë të mjaftueshme për arritjen e drejtësisë.

Sipas argumentimit të organizatës, vënia në dispozicion e arkivave serbe do të ndihmonte në përcaktimin e zinxhirit të përgjegjësisë, në gjetjen e varrezave të tjera masive dhe në përballjen e autorëve të krimeve me drejtësinë.

Organizata thekson në opinion se drejtësia që vonohet barazohet me drejtësi të mohuar, ndërsa pa zbulimin e së vërtetës, përcaktimin e përgjegjësisë dhe vendosjen e drejtësisë për viktimat, paqja e qëndrueshme në Ballkanin Perëndimor nuk mund të arrihet.

“Albanians for America” ka njoftuar se versioni i plotë i opinionit është bërë publik si në shqip, ashtu edhe në anglisht.

Ndërkohë, gjatë ditëve të fundit, mediat ndërkombëtare i kanë kushtuar vëmendje zbulimit të vendeve të dyshuara si varreza masive në Zubin Potok.

Al Jazeera, duke iu referuar raportimeve të AFP-së dhe Anadolu-s, ka bërë të ditur se autoritetet kosovare kanë identifikuar një lokacion të tretë që dyshohet se mund të jetë varrezë masive. Në të njëjtën kohë, po vijojnë hetimet lidhur me krimet e dyshuara të luftës të viteve 1998-1999.