Policia e Kosovës ka vijuar edhe sot kontrollet në fshatin Jabukë, në zonën e Zubin Potokut. Operacioni po zhvillohet për shkak të dyshimeve lidhur me posedimin e armëve ilegale.

Veton Elshani, zëvendëskomandant i Policisë së Kosovës për rajonin e Veriut, konfirmoi se kontrolle po kryhen edhe në lokacione të tjera.

Aktualisht nuk ka të dhëna nëse gjatë kontrolleve janë sekuestruar armë apo nëse është arrestuar ndonjë person.

Elshani deklaroi se, për momentin, nuk mund të japë detaje rreth rezultateve të aksionit.

The post Vijojnë kontrollet e Policisë së Kosovës në Jabukë të Zubin Potokut appeared first on Albeu.com.

Gjatë gërmimeve në zonën e Kalludrës në Zubin Potok, janë gjetur mbetje të reja mortore, njoftoi kryeministri në detyrë Albin Kurti, duke shtuar se operacioni i kërkimit do të shtrihet në javët dhe muajt në vijim.

Duke folur nga vendi i ngjarjes, Kurti tha se teksa ndodhej aty, ekipet zbuluan edhe disa kafka shtesë, pasi gërmimet janë ende duke u zhvilluar.

Ai sqaroi se eshtrat janë gjetur të hallakatura buzë një përroi, çfarë e ndërlikon mjaft procesin e nxjerrjes dhe njohjes së tyre.

Sipas tij, ka shumë mundësi që përroi, i cili gjatë pranverës fryhet, t’i ketë spostuar trupat, edhe pse ata mund të kenë qenë varrosur fillimisht në të njëjtin vend.

Përcaktimi i identitetit do të bëhet vetëm pas testeve të ADN-së, ndërkohë që dyshohet se mbetjet mund t’i përkasin 23 intelektualëve shqiptarë të rrëmbyer dhe ekzekutuar në prill të vitit 1999.

Kurti paralajmëroi se gërmimet do të vazhdojnë për shumë javë, ndoshta edhe muaj, për shkak se eshtrat e shpërndara gjenden në afërsi të një përroi që në stinën e pranverës bëhet i fuqishëm dhe mund t’i ketë zhvendosur trupat nga vendi i varrimit.

Në fjalën e tij, ai trajtoi edhe çështjet gjyqësore lidhur me krimet e luftës, duke fajësuar Serbinë për ndalimin e personave që kanë ofruar të dhëna mbi këto krime.

Në fund, ai falënderoi specialistët e Institutit të Mjekësisë Ligjore dhe të EULEX-it për angazhimin në terren, duke theksuar se institucionet kosovare do të ofrojnë mbështetje të plotë deri në ndriçimin e fatit të personave të zhdukur gjatë luftës.

The post Zbulohen mbetje mortore në Kalludër, Kurti: Identifikimi pas analizave të ADN-së appeared first on Albeu.com.

Një zbulim i ri në fshatin Kalludër i Vogël, në komunën e Zubin Potokut, ka sjellë në terren ekipet e Institutit të Mjekësisë Ligjore, të cilat kanë konfirmuar se eshtrat e gjetura janë me origjinë njerëzore dhe paraqesin interes për hetimet forenzike. Lajmin e dha mjeku Ditor Haliti, pas inspektimit të parë të kryer në vendngjarje.

Sipas Halitit, dalja në atë lokacion u bë me kërkesë të Departamentit Special të Gjykatës Themelore në Prishtinë, me qëllim që të përcaktohej natyra e mbetjeve mortore dhe rëndësia e tyre ligjore.

Haliti shpjegoi se misioni i sotëm konsistonte në kryerjen e një vlerësimi paraprak për të sqaruar dy pikë kryesore: nëse kishin të bënin me mbetje njerëzore dhe nëse ato kishin peshë mjeko-ligjore. Ai shtoi se për këtë arsye, në terren u angazhuan së bashku me Komisionin Qeveritar për Persona të Zhdukur, Njësinë për Hetimin e Krimeve të Luftës dhe përfaqësues të EULEX-it që operojnë pranë Institutit. Bazuar në analizat e para, konfirmoi se bëhet fjalë për eshtra njeriu dhe se ato janë me interes për hetimin. Për shkak të terrenit të thyer malor dhe kompleksitetit të zonës, ai njoftoi se vëmendja tani do të përqendrohet në përgatitjen e një qasjeje të sigurt, në mënyrë që procesi i gërmimit të kryhet me standardet më të larta profesionale, duke shtuar se punimet do të vazhdojnë pa vonesë në ditët në vazhdim.

Nga ana tjetër, Kushtrim Gara, drejtues i Njësisë së Komisionit Qeveritar për Persona të Zhdukur, u shpreh i rezervuar për të dhënë hollësi të mëtejshme, duke theksuar se është ende shpejt për të folur, para se të përfundojnë të gjitha procedurat e ekzaminimit.

Gara vuri në dukje se kjo zonë ka qenë vazhdimisht prioritet gjatë viteve të kaluara dhe shprehu mirënjohjen e tij për të gjitha ekipet që e trajtuan këtë informacion me urgjencë dhe përkushtim. Ai kujtoi se kjo është pjesë e një përpjekjeje të vazhdueshme institucionale për të nderuar të drejtën themelore të familjeve: njohjen e së vërtetës për fatin e të afërmve të tyre. Gara siguroi se çdo e dhënë që do të dalë nga procesi i zhvarrimit dhe analizave mjeko-ligjore do t’u komunikohet së pari familjarëve, të cilët janë në qendër të këtij procesi, dhe më pas publikut.

Burime brenda procesit hetimor sugjerojnë se në këtë vend mund të gjenden eshtrat e personave të njohur si grupi i “intelektualëve të Mitrovicës”, të cilët u zhdukën më 19 prill të vitit 1999. Megjithatë, identifikimi zyrtar dhe konfirmimi përfundimtar do të vijnë vetëm pas përmbylljes së plotë të gërmimeve dhe ekzaminimeve të specializuara.

Ndërkohë, të hënën Policia e Kosovës ka arrestuar dy persona të dyshuar për lidhje me këtë çështje, teksa hetimet dhe operacionet në terren janë duke vijuar.

The post Konfirmohet origjina njerëzore e mbetjeve të gjetura në Kalludër të Zubin Potokut, vijojnë kërkimet appeared first on Albeu.com.