Në Kupën e Botës 2026, Zlatan Ibrahimovic është kthyer në një prej figurave që kanë marrë më shumë vëmendje. Këtë herë, suedezi nuk është paraqitur si futbollist, por si komentator televiziv, ndërsa qëndrimet e tij të hapura dhe të prera kanë bërë jehonë te tifozët në të gjithë botën.

Gjatë analizës në Fox Sports, Ibrahimovic kritikoi fort Leandro Paredesin për sjelljen e treguar para dhe pas finales së Kupës së Botës ndaj Spanjës. Ai u ndal veçanërisht te veprimet e mesfushorit argjentinas gjatë tensioneve që nisën pas mbylljes së takimit.

Ish-sulmuesi suedez shprehu habi edhe për reagimin e lojtarëve spanjollë në momentin e përplasjes, pasi, sipas tij, askush nuk ndërhyri për ta ndalur incidentin.

“Nuk arrij ta kuptoj se çfarë po bëjnë futbollistët spanjollë. Ata vetëm qëndrojnë dhe shohin teksa një lojtar tjetër godet shokun e tyre të skuadrës”, deklaroi ai.

Më pas, Ibrahimovic reagoi në stilin e tij karakteristik, duke thënë se Paredes ishte me fat që në atë çast nuk kishte përballë një lojtar si suedezi.

“Paredes duhet të ndihet me fat që në fushë nuk ndodhej një futbollist si unë. Po të kisha qenë aty, do ta godisja me kokë dhe do të përjashtohesha. Sjellja e tij është joprofesionale”, u shpreh Ibrahimovic.

Komentet e tij lidheshin me përplasjen që Paredes pati me mbrojtësin Eric Garcia dhe mesfushorin Gavi në fundin e finales.

Pavarësisht kritikave ndaj Argjentinës, Ibrahimovic vlerësoi paraqitjen e Spanjës dhe mënyrën se si ajo arriti ta fitonte trofeun e madh.

“Triumfoi futbolli. Kur sheh mënyrën se si Spanja luan dhe atë që tregoi gjatë këtij turneu, kupton se ky është futbolli që dëshiron të shikosh”, tha suedezi.

“Argjentina nuk regjistroi asnjë gjuajtje drejt portës. Cila ishte mbrojtja më e mirë e turneut? Ajo e Spanjës. Në fund fitoi skuadra që e meritonte”, shtoi ai.

“Më pyetët përpara fillimit të turneut dhe ju thashë se fituese do të ishte Spanja. Gjërat që them unë bëhen realitet”, përfundoi Ibrahimovic.

The post Ibrahimovic shpërthen ndaj yllit argjentinas: Po të isha në fushë, do ta godisja me kokë appeared first on Albeu.com.

Zlatan Ibrahimovic ka lëshuar kritika të ashpra ndaj Noni Maduekes gjatë ndeshjes çerekfinale të Kupës së Botës 2026 mes Anglisë dhe Norvegjisë, duke përdorur ironi që tërhoqi menjëherë vëmendjen e publikut.

Në një takim të zgjidhur pas kohës shtesë, Anglia mposhti 2-1 Norvegjinë dhe siguroi biletën për në gjysmëfinale. Jude Bellingham ishte protagonist me dy gola, pasi Andreas Schjelderup kishte kaluar fillimisht në avantazh skandinavët.

Si i ftuar në studion e Fox Sports, ish-sulmuesi suedez nuk e fshehu pakënaqësinë për paraqitjen e Maduekes që në pjesën e parë. Sipas tij, Anglia po luante me inferioritet numerik për shkak të lojtarit të Chelseat.

“Madueke sa herë që prek topin bën zgjedhjen e gabuar dhe thjesht shëtit në fushë. Sikur të isha në vendin e Thomas Tuchel, do ta zëvendësoja menjëherë, sepse nuk ka bërë absolutisht asgjë në këto 45 minuta”, tha Ibrahimovic. Ai shtoi se as pauza për hidratim nuk solli përmirësim dhe se ekipi anglez nisi sfidën me dhjetë lojtarë.

Polemika u përforcua më tej kur paneli diskutoi golin e barazimit të Anglisë. Norvegjezët pretenduan se topi kishte prekur kabllon e kamerës mbi terren, por Ibrahimovic e ktheu situatën në një thumb të ri: “Nëse topi e preku kabllon, atëherë kablloja pati një paraqitje më të mirë se Madueke, pa dyshim.”

Për sulmuesin 24-vjeçar, pjesa e parë përfundoi pa asnjë rast të krijuar për gol dhe me një ndërhyrje të gabuar me dorë. Nga tre tentativa për driblim, ai realizoi vetëm një, pati sukses në vetëm një krosim prej treve dhe u kap njëherë në pozitë të parregullt. Në pushim, ai u zëvendësua nga Bukayo Saka, duke i dhënë fund një paraqitjeje zhgënjyese në një mbrëmje ku Anglisë i duhej më shumë frymëzim në fazën e fundit të sulmit.

The post “Kablloja mbi fushë luajti më mirë se ai”, Zlatan Ibrahimovic godet ashpër yllin e Anglisë pas paraqitjes së dobët appeared first on Albeu.com.

Zlatan Ibrahimovic reagoi ashpër në Fox Sports pas eliminimit surprizë të Belgjikës nga Kupa e Botës 2026.

Ish-sulmuesi suedez, që tani mban rolin e analistit te transmetuesi amerikan, e drejtoi gishtin nga përzgjedhësi Rudi Garcia, të cilin e konsideroi përgjegjësin kryesor për humbjen në çerekfinale kundër Spanjës.

Sipas tij, gjithçka lidhej me zgjedhjen e bërë në portë. Pas dëmtimit të Thibaut Courtois, tekniku belg vendosi të aktivizonte Senne Lammens, i cili më pas kreu një gabim vendimtar që ndikoi në largimin e Belgjikës.

Vendimi i Garcias mori edhe më shumë kritika pas komenteve të mëvonshme të portierit të Real Madridit, i cili bëri të ditur se ishte i gatshëm të qëndronte në fushë pavarësisht shqetësimit fizik.

“Kjo humbje është faji i trajnerit. Ishte vendimi i tij që i kushtoi Belgjikës ndeshjen. Pse e futi Lammensin kur në stol ishte Penders?”

“Vetëm sepse njëri luan për Manchester Unitedin dhe tjetri për Strasbourgun? Nuk mund ta zgjedhësh kështu portierin e një kombëtareje”, u shpreh Ibrahimovic.

Më tej, ai vijoi me vlerësime më të larta për portierin tjetër belg.

“Penders është shumë më i mirë. Lammens është i mbivlerësuar në këtë nivel. Të gjithë e panë këtë. Është turp. Trajneri kryesor dhe trajneri i portierëve duhet të kenë turp”, përfundoi ai.

Belgjika u eliminua nga Spanja pas humbjes 2-1 në çerekfinale, ndërsa goli vendimtar u shënua nga Mikel Merino në minutat e fundit të takimit.//

The post Ibrahimovic pas daljes së Belgjikës: Trajneri duhet të turpërohet, ai futbollist nuk e meritonte aktivizimin appeared first on Albeu.com.

Zlatan Ibrahimovic ka përcjellë një mesazh të qartë për përfaqësuesen e Argjentinës, duke theksuar se Lionel Messi nuk mund të vazhdojë të mbajë i vetëm peshën e ekipit, edhe pse në Kupën e Botës ka dhuruar paraqitje mbinjerëzore.

Në ndeshjen dramatike që Argjentina e fitoi 3-2 ndaj Egjiptit, ylli i Inter Miamit ishte në nivelin e tij më të lartë. Megjithatë, sipas Ibrahimovicit, pjesa tjetër e skuadrës duhet të japë më tepër për t’ia bërë më të lehtë barrën kapitenit.

Messi tregoi sërish pse vlerësohet si më i miri i të gjitha kohërave, duke udhëhequr Argjentinën drejt një përmbysjeje të jashtëzakonshme ndaj Egjiptit në fazën e 1/8 së finales të Botërorit.

Kur argjentinasit po humbnin 2-0 në Atlanta, ishte Messi ai që vuri në lëvizje rikthimin me asistin për golin e Cristian Romero. Më pas, ai realizoi vetë golin e barazimit, ndërsa më vonë kontribuoi edhe në aksionin që i hapi rrugën golit të fitores nga Enzo Fernandez në kohën shtesë.

Kjo paraqitje mahniti edhe Ibrahimovicin, i cili edhe një herë vuri në pah mentalitetin e jashtëzakonshëm të ish-shokut të tij te Barcelona.

Në një prononcim për Fox Sports, suedezi u shpreh se te Messi u vu re një transformim i madh pikërisht në çastin kur Argjentina po rrezikonte eliminimin.

“Mund ta shihni se diçka ndryshoi. Ai ndezi një tjetër marsh (pas rezultatit 2-0). U shndërrua në një bishë dhe askush nuk mund ta ndalte”.

“Mund ta shihni sa shumë do të thotë kjo për të. Mund të ketë fituar gjithçka, sa herë që ka fituar Topin e Artë, por ai ende kërkon më shumë”.

Pavarësisht atmosferës festive pas vërshëllimës së fundit, kur një Messi i emocionuar u përqafua nga bashkëlojtarët, Ibrahimovic nuk i kurseu vërejtjet për pjesën tjetër të skuadrës argjentinase.

“Për të qenë pak kritik, bashkëlojtarët e tij duhet të ngrihen më shumë dhe ta ndihmojnë. Ai është në një nivel tjetër”.

“Nëse Messi vazhdon kështu deri në fund, askush nuk do të befasohet. Por ai ka nevojë për ndihmë”, përfundoi suedezi.//

The post Ibrahimovic i dërgon sinjal Argjentinës: Messi s’mund ta mbajë i vetëm skuadrën appeared first on Albeu.com.

Zlatan Ibrahimovic shfrytëzoi menjëherë rastin për të thumbuar Cristiano Ronaldon dhe mbështetësit e tij, pasi Lionel Messi drejtoi Argjentinën drejt një përmbysjeje dramatike 3-2 përballë Egjiptit në Kupën e Botës 2026.

Pas daljes së Portugalisë nga Spanja vetëm një ditë më herët, suedezi, që ka luajtur krah Messit te Barcelona, rikujtoi edhe një herë se kë vlerëson si më të madhin mes yllit argjentinas dhe atij portugez.

“Ngushëllimet e mia për të gjithë ata që e urrejnë Messin dhe për të gjithë tifozët e Ronaldos që menduan se do të qeshnin sonte”.

“Në rezultatin 0-2 ata tashmë po festonin fitoren. Por më pas Messi ia kujtoi botës pse një ndeshje futbolli nuk përfundon derisa të bjerë bilbili i fundit. Tani ata do të shkojnë të flenë me dhimbje dhe lot, ndërsa Argjentina është në çerekfinale. Ky është futbolli, kjo është madhështia e tij”.

Deri në minutën e 83-të, Messi po kalonte një mbrëmje të komplikuar, sidomos pasi kishte shpërdoruar edhe një penallti. Megjithatë, ai gjeti golin e barazimit për 2-2 dhe më pas hapi skenën që Enzo Fernandez të shënonte golin e fitores në kohën shtesë.

Ibrahimovic foli me superlativa edhe për ish-shokun e tij të skuadrës.

“Messi ishte një bishë. Askush nuk mund ta ndalte. Ai nuk u ndal asnjëherë. Ky është Messi që unë njoh, Messi që kemi parë gjithmonë dhe që vazhdojmë ta shohim”.

“Mos harroni, ai tashmë e ka fituar Kupën e Botës. Messi ka fituar çmime të panumërta, Topa të Artë dhe gjithçka tjetër. Mjafton ta shikoni rekordin e tij, është përsosmëri e pastër. E megjithatë, ai ende ka uri për më shumë”, deklaroi ai për “Fox Sports”.

Me këtë fitore, Argjentina ka prerë tashmë biletën për në çerekfinale, aty ku do të ketë përballë Zvicrën.

The post Ibrahimovic ironizon Ronaldon dhe përkrahësit e tij pas kthesës së madhe të Messit me Argjentinën appeared first on Albeu.com.

Zlatan Ibrahimovic ka dhënë mendimin e tij për përballjen e tensionuar mes Francës dhe Paraguait në 1/16 e finales së Kupës së Botës 2026, duke nënvizuar gjakftohtësinë dhe pjekurinë që tregoi skuadra franceze në një sfidë të mbushur me duele dhe nerva të larta.

Në një prononcim për Fox Sports, Ibrahimovic pranoi se natyra e asaj ndeshjeje do ta kishte vënë në vështirësi për të ruajtur kontrollin, nëse do të kishte qenë vetë pjesë e saj.

“Nëse do të kisha luajtur sonte, do të kisha marrë 4 ose 5 kartonë të kuq. Nuk më pëlqen kur njerëzit përpiqen të më provokojnë, unë e luaj futbollin me seriozitet të plotë”, deklaroi ai.

Pavarësisht kësaj, ish-sulmuesi suedez vlerësoi në maksimum reagimin e formacionit që drejtohet nga Didier Deschamps, duke theksuar se Franca arriti të mos humbte qetësinë përballë presionit dhe përplasjeve të forta.

“Por Franca tregoi maturi, qëndroi e qetë dhe reagoi me buzëqeshje. Dhe kjo është mënyra më e mirë për t’u përgjigjur, të buzëqeshësh dhe të mos biesh në lojën e tyre”, përfundoi Ibrahimovic.

The post Ibrahimovic për Francë – Paraguai: Po të isha në fushë sonte, do të isha ndëshkuar me 4 ose 5 kartonë të kuq appeared first on Albeu.com.

Polemikat për arbitrat në Kupën e Botës janë ndezur edhe më shumë pas eliminimit të Kroacisë, në një sfidë ku një gol i shënuar në minutën e 103-të u anulua pas kontrollit nga VAR-i, ndërsa Portugalia fitoi 2-1.

Mes kritikëve më të zëshëm ishte ish-sulmuesi suedez Zlatan Ibrahimovic, i cili e kundërshtoi fort këtë vendim dhe shprehu dyshime për ndërhyrjen e VAR-it, si edhe për interpretimin e aksionit që rezultoi vendimtar.

Sipas Ibrahimoviqit, ai e ka parë disa herë episodin dhe është i bindur se nuk ka pasur asnjë prekje të qartë nga futbollisti kroat Igor Matanovic.

Ai fajësoi gjyqtarët se kanë ndikuar drejtpërdrejt në epilogun e takimit, duke shtuar se vendime të tilla, sipas tij, cenojnë drejtësinë sportive.

“Gjyqtarët po bëjnë çdo gjë në fuqinë e vet për ta ndihmuar Cristiano Ronaldon ta fitojë Kupën e Botës dhe ne dëgjojmë se si Messi është ‘favoriti i FIFA-s’”.

“Kjo është vjedhje e qartë. Topi nuk e preku lojtarin kroat fare. Tifozët nuk i mbushin stadiumet për të parë ekrane, por dramën dhe emocionin”.

“Kemi ardhur në pikën ku VAR-i nuk i përmirëson gabimet, por i shikon milimetrat të cilat nuk i sheh askush në stadium”, ka deklaruar Ibrahimoviq për FOX Sports, deklaroi ish-futbollisti suedez.//

The post Ibrahimoviq reagon ashpër pas largimit të Kroacisë: Arbitrat po e shtyjnë Ronaldon drejt Kupës së Botës appeared first on Albeu.com.

Franca e vulosi kalimin në fazën e 1/8-tës të Kupës së Botës pasi triumfoi bindshëm 3-0 ndaj Suedisë, duke prerë biletën për në raundin pasues të kompeticionit.

Në këtë përballje shkëlqeu Kylian Mbappe, autor i dy golave, ndërsa Michael Olise dhe Ousmane Dembele kontribuuan me asistime në një mbrëmje shumë të mirë të repartit ofensiv.

Menjëherë pas sfidës, reagimet pozitive nga tifozët dhe opinionistët nuk munguan. Mes tyre ishte edhe Zlatan Ibrahimovic, i cili në një prononcim për FOX përfshiu tre lojtarët e sulmit francez në listën e tij me pesë më të mirët në botë për momentin.

“Dëgjoni, nëse marrim pesë lojtarët më të mirë në botë, tre prej tyre janë në sulmin e Francës – Dembele, Olise, Mbappe”, deklaroi fillimisht Ibrahimovic.

“Pastaj mund të zgjedhim edhe dy të tjerë, do t’ju lë të vendosni ju: Haaland, Messi… Yamal. Më falni, sepse Messi është në një klasë më vete”.

“Por tre nga pesë më të mirët janë në këtë sulm [të Francës], dhe kjo nuk është e lehtë për t’u ndërtuar”.

Ish-sulmuesi suedez shtoi më tej se, ndonëse skuadra të mbushura me emra të mëdhenj si PSG me Mbappe, Messi dhe Neymar e patën të vështirë të krijonin një harmoni të plotë, treshja e Francës veçohet pikërisht për mungesën e egos dhe frymën e lojës në grup.

“Atyre nuk u intereson kush është lojtari kryesor. Ata punojnë pa top dhe kjo është gjëja më e rëndësishme. Me topin, ne e dimë se çfarë mund të bëjnë – ata mund ta vendosin një ndeshje në çdo moment. Është e frikshme”, përfundoi ish-ylli suedez.

The post Zlatan Ibrahimovic përzgjedh pesë futbollistët më të spikatur të momentit në botë appeared first on Albeu.com.

Virgil van Dijk është kthyer në objektivin më të madh të Milanit për të forcuar repartin e prapavijës gjatë merkatos së verës.

“La Gazzetta dello Sport” raporton se te klubi kuqezi po shqyrtohet mundësia për ta sjellë kapitenin e Holandës në “San Siro”, ndërsa pronari i RedBird, Gerry Cardinale, dhe këshilltari Zlatan Ibrahimovic e vlerësojnë atë si liderin e duhur për skuadrën e trajnerit të ri Ruben Amorim.

Gjithsesi, realizimi i një marrëveshjeje të tillë shihet si tejet i vështirë.

Mbrojtësi qendror është i lidhur me Liverpoolin deri në verën e vitit 2027, pasi vetëm në prill nënshkroi një kontratë të re dyvjeçare me klubin anglez.

Kjo marrëveshje e re i siguron atij afro 24 milionë euro bruto në sezon, duke e renditur si mbrojtësin më të paguar në futbollin evropian.

Sipas medias italiane, vështirësia më e madhe nuk lidhet me tarifën e transferimit, por me pagën shumë të lartë të lojtarit dhe me faktin nëse ai do të ishte i gatshëm të largohej nga “Anfield”.

Njëkohësisht, Liverpooli nuk dëshiron të humbasë edhe një tjetër pikë kyçe të mbrojtjes, veçanërisht pasi këtë verë Ibrahima Konate kaloi te Real Madridi si lojtar i lirë.

Te Milani, Zlatan Ibrahimovic vijon të luajë një rol me peshë në zgjedhjet sportive të klubit dhe mbështet afrimin e futbollistëve me eksperiencë, të aftë për të ngritur nivelin e ekipit dhe për të konsoliduar hierarkinë në dhomën e zhveshjes.

“La Gazzetta dello Sport” nënvizon se Van Dijk përputhet plotësisht me profilin që drejtuesit kuqezi kanë kërkuar prej kohësh, falë eksperiencës, personalitetit dhe cilësive të tij si udhëheqës në fushë.

Nëse afrimi i holandezit del i parealizueshëm për arsye financiare ose sportive, Milani ka përgatitur edhe opsione të tjera.

Goncalo Inacio i Sportingut shihet si alternativa kryesore, sidomos për shkak të lidhjes së tij me trajnerin Ruben Amorim. Një tjetër emër që mbetet lart në listën e dëshirave të klubit italian është edhe qendërmbrojtësi i Benficas, Antonio Silva.

The post Milani synon Virgil van Dijk, Ibrahimovic e sheh si përforcimin ideal për mbrojtjen appeared first on Albeu.com.

Holanda i dha fund rrugëtimit në Kupën e Botës 2026, pasi u ndal nga Maroku në fazën e 1/16 së finales me rezultat 1-1 dhe 3-2 pas penalltive.

Në këtë përballje, përfaqësuesja holandeze u shfaq tepër e tërhequr, me vetëm 30 për qind posedim të topit dhe pa arritur të vendosë presion domethënës mbi mbrojtjen marokene.

Pas ndeshjes, Ronald Koeman u përball me kritika të ashpra nga Zlatan Ibrahimovic, i cili shprehu hapur pakënaqësinë e tij për mënyrën se si ishte përgatitur Holanda për këtë duel.

“Unë mendoj se kjo humbje është faji i Koemanit, sepse nuk e njoha këtë ekip të Holandës”.

“Ai humbi me një identitet që nuk është identiteti holandez dhe kjo më zemëron. Humb me identitetin tënd… sepse ai është ai që je”, deklaroi Ibrahimovic për Fox.

Për këtë ndeshje, Koemani zgjodhi një skemë më të kujdesshme me pesë mbrojtës, duke u larguar nga tradita sulmuese që e ka karakterizuar Holandën. Megjithatë, trajneri e mbrojti këtë vendim edhe pasi skuadra u eliminua nga turneu.

Humbja ndaj Marokut i shtoi Holandës një tjetër zhgënjim nga pika e bardhë, teksa tashmë ka pësuar tetë humbje në dhjetë seri penalltish në historinë e saj.

The post Zlatan Ibrahimovic godet Ronald Koemanin: Holanda humbi duke mohuar identitetin e saj appeared first on Albeu.com.