Pasditen e sotme, flakët janë riaktivizuar në lagjen Abaze, në të njëjtën zonë ku dy ditë më parë shpërtheu vatra që kërcënoi drejtpërdrejt qytetin e Krujës. Për pengimin e avancimit të zjarrit janë angazhuar në terren efektivë të shumtë zjarrfikës, forca ushtarake dhe banorë të zonës.

Edhe zjarri në fshatin Halil mbetet aktiv. Përpjekjet për shuarjen e tij po kryhen njëkohësisht nga ajri, përmes helikopterëve të Forcave Ajrore, dhe nga toka, ku terreni i thyer po pengon ndjeshëm punën e forcave operacionale.

Ndërkohë, Prefektura e Durrësit bën të ditur se vatra në Krastë po i afrohet vënies nën kontroll. Rreth 50 efektivë të Forcave të Armatosura dhe pjesëtarë të shërbimeve zjarrfikëse kanë vepruar gjatë ditës të ndarë në dy grupe, me synimin për të përforcuar rezultatet e operacionit gjatë natës, kur flakët u vunë përkohësisht nën kontroll.

The post Vatra aktive zjarri në Krujë, forcat ndërhyjnë nga ajri dhe toka appeared first on Albeu.com.

Sipas ministrit të Mbrojtjes, Ermal Nufi, dyshohet se flakët janë shkaktuar nga dora e njeriut. Ai njoftoi se operacioni për shuarjen e zjarrit po kryhet në mënyrë të koordinuar, me ndërhyrje nga toka dhe mbështetje ajrore.

Nufi bëri të ditur se në zonën e Abazës ndodhet së bashku me ministrin Besfort Lamallari, drejtorin e AKMC-së dhe drejtorin e Përgjithshëm të Zjarrfikësve, për të ndjekur zhvillimet në terren.

Prej pasdites, në operacion janë angazhuar intensivisht strukturat operacionale vendore, ndërsa nga ajri po ndërhyjnë 3 helikopterë të Forcës Ajrore.

Ministri shprehu respekt dhe mirënjohje për pilotët e Forcës Ajrore, si edhe për efektivët e MZSH-së së Krujës, Kamzës, Tiranës dhe Vorës, të cilët po punojnë pa ndërprerje për të izoluar vatrën dhe për të mbrojtur banesat e rrezikuara.

Ai sqaroi se terreni i thepisur e bën të vështirë ndërhyrjen tokësore, ndaj operacioni po vijon njëkohësisht nga toka dhe ajri, me objektivin që zjarri të vihet nën kontroll sa më shpejt.

The post Zjarri në Krujë, Nufi dhe Lamallari: Forcat po ndërhyjnë nga toka dhe ajri appeared first on Albeu.com.