Aston Villa ka bërë të ditur zyrtarisht këtë të mërkurë se ka siguruar shërbimet e portierit japonez Zion Suzuki nga Parma dhe të mbrojtësit italian Matteo Ruggeri nga Atlético Madrid.

Ekipi nga Birmingham po vijon të ndërtojë një skuadër më të fortë, me synimin për të konkurruar denjësisht në Ligën Premier dhe në Ligën e Kampionëve gjatë këtij edicioni.

Këto dy lëvizje vijnë pas transferimit të Johan Manzambit nga Freiburg, Joao Gomesit nga Wolves dhe huazimit të Alejandro Garnachos nga Chelsea.

Konfirmimi për afrimet e reja është publikuar në faqen zyrtare të klubit, ku Aston Villa ka njoftuar veçmas për mbërritjen e Ruggerit dhe Suzukit.

Në njoftimin për mbrojtësin italian thuhet: “Aston Villa ka kënaqësinë të njoftojë nënshkrimin e Matteo Ruggeri nga Atlético Madrid”.

Ndërsa për portierin japonez, klubi bëri të ditur: “Aston Villa ka kënaqësinë të njoftojë nënshkrimin e Zion Suzuki nga Parma”.

Ruggeri i ka kushtuar klubit anglez 18 milionë euro, ndërsa transferimi i Suzukit është mbyllur për rreth 35 milionë euro.

The post Aston Villa zyrtarizon afrimet e Zion Suzukit dhe Matteo Ruggerit appeared first on Albeu.com.

Transferimi i Zion Suzukit nga Parma te Paris Saint-Germaini nuk do të realizohet, ndonëse pas disa ditësh bisedimesh dy klubet kishin arritur një marrëveshje verbale.

Gazetari Fabrice Hawkins raporton se operacioni kapte në total rreth 35 milionë euro dhe dukej se ishte shumë pranë përfundimit.

Të shtunën, PSG kishte dërguar madje një avion privat në Parma për ta transportuar portierin japonez në Paris, ku ai duhej t’u nënshtrohej kontrolleve mjekësore.

Por procesi u ndërpre në mënyrë të befasishme për shkak të çështjeve që kishin të bënin me kampin e futbollistit.

Drejtuesit e PSG-së i vlerësuan si tepër të larta komisionet e kërkuara nga përfaqësuesit e Suzukit.

Edhe pse Parma dhe PSG kishin nisur shkëmbimin e dokumentacionit të nevojshëm, negociatat ndryshuan rrjedhë në fund dhe transferimi u anulua.

Suzuki është 23 vjeç dhe kaloi nga Sint-Truiden te Parma në vitin 2024. Që prej atëherë, ai është afirmuar si zgjedhja e parë në portën e Kombëtares së Japonisë.

Plani i PSG-së ishte që portieri të blihej gjatë kësaj vere dhe më pas të huazohej për sezonin e ardhshëm, në mënyrë që të vijonte zhvillimin.

The post PSG anulon në çastet e fundit transferimin e portierit japonez, edhe pse kishte nisur avion privat appeared first on Albeu.com.

Në Japoni, Suzuki përkufizohet si “hafu”, një term i përdorur për njerëzit me prejardhje të përzier, zakonisht me një prind japonez dhe tjetrin të huaj. Kjo fjalë, që rrjedh nga anglishtja “half”, përdoret gjerësisht në vend që prej viteve 1970. Megjithatë, ajo mbetet objekt diskutimi, pasi edhe persona të lindur dhe të rritur plotësisht në Japoni etiketohen si “hafu” vetëm për shkak të origjinës familjare.

Vetë portieri ka rrëfyer se që në fëmijëri është ndeshur me komente diskriminuese për shkak të paraqitjes së tij. Ai, megjithatë, zgjodhi ta kthejë këtë dallim në një pikë force. “Nëse dallohesh nga të tjerët, atëherë bëj diçka të mirë dhe dallo në mënyrën e duhur. Kështu njerëzit do të të kujtojnë për atë që je si person”, ka thënë Suzuki.

Kjo mënyrë të menduari pasqyrohet edhe në sjelljen e tij të përditshme. Te Parma, shokët e skuadrës kanë vërejtur se ai shpesh, pas ndeshjeve, pastron në qetësi dhomat e zhveshjes, duke u bërë shembull edhe për të tjerët. Për Suzukin, vetëbesimi dhe qëndrueshmëria janë vlera bazë. “Kur njerëzit më thonë se kam karakter të fortë, për mua është komplimenti më i madh”, është shprehur ai.

Gjatë rrugëtimit të tij në futboll, Suzuki është përballur disa herë me racizëm. Episodi më i rëndë u regjistrua në Kupën e Azisë 2024.

Pas një gabimi në ndeshjen ndaj Vietnamit, ai u vu në shënjestër të një vale të madhe urrejtjeje në rrjetet sociale, ku kritikat për paraqitjen sportive shumë shpejt kaluan në sulme raciste për shkak të origjinës së tij afro-japoneze.

E njëjta situatë u përsërit edhe pas sfidës ndaj Irakut, kur një tjetër gabim i tij u pasua nga një valë edhe më e madhe fyerjesh dhe mesazhesh urrejtjeje.

Historia e tij në futboll nisi thuajse rastësisht. Ai shoqëronte shpesh nënën në ndeshjet e vëllait të madh dhe kalonte kohën pranë portës me dorezat e portierit në duar. Në një moment, trajneri vendosi ta përfshinte edhe atë në stërvitje, dhe pikërisht aty mori udhë fillimi i tij në këtë sport.

Në vitet e formimit te Urawa Reds, zhvillimi i tij fizik ishte kaq i shpejtë, sa klubi zgjodhi t’ia kufizonte për një periudhë ngarkesën stërvitore, me synimin që trupi i tij të zhvillohej normalisht.

Kjo qasje solli rezultat, pasi sot Suzuki është një portier imponues me gjatësi 190 centimetra dhe peshë rreth 100 kilogramë.

Aktualisht, ai nuk shihet vetëm si një nga portierët më premtues të futbollit japonez, por edhe si një simbol i një Japonie gjithnjë e më të larmishme, duke dëshmuar se identiteti dhe origjina mund të shërbejnë si forcë dhe jo si pengesë.

The post Zion Suzuki, portieri “hafu” i Japonisë që u përball me paragjykime për shkak të pamjes së tij appeared first on Albeu.com.