Ky vendim, synon të zhbllokojë pagat e magjistratëve, të cilat nuk ishin ekzekutuar që prej 1 gushtit 2026.

Sipas njoftimit të Presidencës, Kuvendi kishte kërkuar hyrjen e menjëhershme në fuqi të ligjit, pasi shfuqizimi nga Gjykata Kushtetuese i dispozitave që rregullonin pagat kishte krijuar një boshllëk ligjor.

Për shkak të kësaj situate, Thesari i Shtetit nuk mund të kryente pagesat për gjyqtarët dhe prokurorët.

Ligji i ri i hap rrugën pagesës së detyrimeve të prapambetura që prej 1 gushtit, si dhe pagave në vijim.

Nëse do të ndiqeshin procedurat e zakonshme, hyrja në fuqi e ligjit dhe zhbllokimi i pagesave do të vonoheshin nga 15 deri në 35 ditë.

Presidenca thekson se pëlqimi për hyrjen e menjëhershme në fuqi është një instrument kushtetues, i justifikuar nga nevoja dhe urgjenca e situatës.

Sipas institucionit të Presidentit, debatet kushtetuese për masën e pagave mund të vijojnë në instancat kompetente, por pagesat mund të zhbllokoheshin ligjërisht vetëm përmes hyrjes në fuqi të ligjit të ri.

Presidenti argumenton se vendimi mbron një nevojë akute dhe lidhet drejtpërdrejt me pavarësinë e gjyqësorit, përmes garantimit të standardit të jetesës dhe qëndrueshmërisë së të ardhurave për magjistratët.

The post Presidenti Begaj dekreton ligjin, zhbllokohen pagat e gjyqtarëve dhe prokurorëve appeared first on Albeu.com.