Qendra “Gjenocidi në Kosovë – Plagë e Hapur” u ka përcjellë një letër drejtuesve të institucioneve dhe subjekteve politike në Kosovë, duke kërkuar shpalljen e gjendjes së jashtëzakonshme dhe zhbërjen e Dhomave të Specializuara të Kosovës, së bashku me Zyrën e Prokurorit të Specializuar.

Letra i është drejtuar kryetares së Kuvendit dhe ushtrueses së detyrës së Presidentes së Kosovës, Albulena Haxhiu, kryeministrit Albin Kurti, deputetëve të Kuvendit si dhe kryetarëve të partive politike. Në të, Qendra shpreh shqetësimin se pavarësia e Kosovës po përballet me rrezik.

Sipas kësaj organizate, vendimi i Dhomave të Specializuara të Kosovës, i marrë më 16 shtator, përbën “një goditje të rëndë ndaj dispozitave themelore të Kushtetutës së Kosovës”.

Qendra pretendon se mënyra se si vendimi paraqet realizimin e pavarësisë së Kosovës bie në kundërshtim me të vërtetën historike të luftës çlirimtare.

Në dokument përmendet edhe deklarata e miratuar më 28 shtator nga 99 deputetë të Kuvendit të Kosovës. Qendra thotë se përmes saj institucionet shtetërore u bënë thirrje të ndërmarrin hapa për “mbrojtjen e së vërtetës dhe të pastërtisë së luftës çlirimtare të popullit të Kosovës”, si dhe të hartojnë një strategji të përbashkët shtetërore.

Qendra ndalet edhe te zhvillimet e 29 shtatorit, kur u njoftua për caktimin e Panelit të Apelit që do të shqyrtojë ankesat në çështjen ndaj Hashim Thaçit, Jakup Krasniqit, Kadri Veselit dhe Rexhep Selimit.

Përbërja e këtij Paneli vihet në pikëpyetje në letër, pasi Qendra thekson se disa gjyqtarë kanë shërbyer më herët në panele që kanë shqyrtuar çështjet ndaj Hysni Gucatit dhe Nasim Haradinajt, Salih Mustafës dhe Pjetër Shalës.

“Prandaj rezultati i vendimit të Panelit të Apelit është DÉJÀ VU!”, thuhet në dokument.

Përballë kësaj situate, Qendra kërkon që shpallja e gjendjes së jashtëzakonshme dhe abrogimi i nenit 162 të Kushtetutës së Kosovës të konsiderohen si “imperativ kategorik”.

“Vetëm zhbërja e Dhomave të Specializuara dhe Zyrës së Prokurorit të Përgjithshëm mund të shpëtojë Kosovën nga rreziku i madh që i kanoset”, vijon letra.

Forcave politike u kërkohet të ruajnë konsensusin e arritur përmes deklaratës së 28 shtatorit dhe të reagojnë të bashkuara ndaj zhvillimeve që Qendra i sheh si kërcënuese për Kosovën.

Sipas saj, një bashkim i tillë politik mund të ndihmonte në zbutjen e tensioneve të brendshme dhe në forcimin e unitetit shoqëror përballë presioneve të jashtme.

The post Qendra “Gjenocidi në Kosovë” u drejtohet institucioneve: Kërkohet shpërbërja e Speciales dhe shpallja e gjendjes së jashtëzakonshme appeared first on Albeu.com.

Pas vendimit dënues ndaj ish-krerëve të UÇK-së, në skenën politike janë shtuar kërkesat për shfuqizimin e Gjykatës Speciale.

Për këtë çështje ka reaguar profesori dhe juristi Muhamet Kelmendi, i cili ka theksuar se Kuvendi i Kosovës duhet të ndërmarrë hapa institucionalë, por nuk mund ta mbyllë veprimtarinë e Speciales përmes një vendimi të zakonshëm.

Sipas Kelmendit, çdo ndërhyrje në statusin ose mandatin e kësaj gjykate duhet të respektojë Kushtetutën e Kosovës, legjislacionin në fuqi dhe detyrimet ndërkombëtare të vendit.

Ai ka rikujtuar se Gjykata Speciale dhe Zyra e Prokurorit të Specializuar janë themeluar mbi një bazë juridike që përfshin marrëveshjen ndërkombëtare të ratifikuar nga Kuvendi, ndryshimin kushtetues të Nenit 162, si dhe Ligjin për Dhomat e Specializuara dhe Zyrën e Prokurorit të Specializuar.

“Kuvendi i Kosovës duhet të veprojë. Megjithatë, për shkak të kuadrit juridik mbi të cilin janë themeluar këto institucione, Kuvendi nuk mund ta zhdukë Specialen thjesht me një vendim të zakonshëm. Çdo ndryshim i statusit apo mandatit të saj duhet të jetë në pajtim me Kushtetutën, ligjin përkatës dhe detyrimet ndërkombëtare të Kosovës”, ka deklaruar ai.

Kelmendi ka vlerësuar se deputetët duhet të analizojnë kompetencat kushtetuese e ligjore të Kuvendit dhe të përcaktojnë procedurën institucionale për përfundimin e mandatit të Speciales, nëse për një veprim të tillë ekzistojnë kushtet juridike.

“Neni 162 përcakton se mandati vazhdon deri në momentin kur Këshilli i Bashkimit Evropian njofton për përfundimin e tij. Kuvendi duhet të shqyrtojë të gjitha kompetencat e veta kushtetuese dhe ligjore dhe të kërkojë rrugën institucionale për mbylljen e mandatit, nëse plotësohen kushtet juridike për këtë. Kjo gjykatë duhet të zhbëhet”, ka shkruar Kelmendi në Facebook.

The post Kelmendi: Mandati i Speciales mund të përfundojë vetëm përmes procedurave kushtetuese dhe ligjore appeared first on Albeu.com.