Deklarata e kryetarit të LDK-së, Lumir Abdixhiku, se gjashtë deputetë të kësaj partie nuk do ta mbështesin Bekim Sejdiun për President, ka krijuar pasiguri lidhur me sigurimin e votave dhe kuorumit të nevojshëm.

Në këto rrethana, një nga alternativat mund të jetë rifillimi i komunikimit me AAK-në. Kryetari i kësaj partie, Ardian Gjini, ka thënë më herët se AAK-ja është e gatshme ta sigurojë kuorumin për zgjedhjen e Presidentit, nëse pranohen kushtet e saj.

Analisti politik Artan Nimani i ka cilësuar qëndrimet e ndryshme të gjashtë deputetëve të LDK-së si shenjë të pluralizmit dhe demokracisë brenda partisë. Megjithatë, ai theksoi se kjo përplasje po ndikon drejtpërdrejt në përpjekjet për tejkalimin e krizës institucionale.

Nimani u ndal edhe te qëndrimi i AAK-së, duke deklaruar se kjo parti i ka paraqitur kryeministrit Kurti një ofertë konkrete. Sipas tij, propozimet e AAK-së nuk lidhen vetëm me interesat e kësaj force politike, por mund t’i shërbejnë çdo qeverie dhe interesit të shtetit.

“Brenda kësaj partie ka pasur historikisht qëndrime të ndryshme. Fakti që edhe sot gjashtë deputetë shprehen ndryshe nga kryetari i partisë tregon, në një këndvështrim, pluralizëm, demokraci dhe personalitet politik. Por kjo situatë tashmë po ndikon drejtpërdrejt në zgjidhjen e krizës institucionale.

Ndërkohë, AAK-ja i ka bërë kryeministrit Kurti një ofertë konkrete. Pikat e saj nuk janë vetëm në interes të AAK-së; nëse shqyrtohen me seriozitet, ato mund t’i shërbejnë çdo qeverie dhe vetë interesit të shtetit. Deri tani, kjo ofertë nuk është marrë seriozisht në konsideratë, madje as nga partia fituese”, tha Nimani.

Analisti vlerëson se Kosova tashmë i ka tejkaluar afatet e përcaktuara me Kushtetutë dhe se zhvillimet po e çojnë vendin drejt zgjedhjeve të reja.

Sipas tij, partitë politike kanë nisur të bëjnë llogaritjet për datën që u leverdis më shumë, ndërsa 16 shtatori mund të shënojë një kthesë të rëndësishme në skenën politike.

“Është tejkaluar çdo afat kushtetues dhe, sipas vlerësimit tim, veprimet që mund të ndërmerren më tej janë kryesisht antikushtetuese. Për këtë arsye, është e vështirë të prodhojnë ndonjë rezultat politik apo institucional.

Mendoj se Kosova po shkon drejt zgjedhjeve të reja. Çështja kryesore nuk është më nëse do të ketë zgjedhje, por koha kur ato do të zhvillohen. Partitë tashmë po kalkulojnë afatet dhe momentin që u përshtatet më shumë nga pikëpamja politike.

Në këtë kuadër, 16 shtatori mund të jetë një datë me rëndësi të veçantë, e cila mund të ndryshojë rregullat e lojës jo vetëm në politikë, por edhe në shumë fusha të tjera të zhvillimeve në Kosovë”, përfundoi ai për “Bota sot”.

The post Nimani: Kosova drejt zgjedhjeve të reja, partitë po shqyrtojnë datën më të përshtatshme appeared first on Albeu.com.

Mungesa e një marrëveshjeje për zgjedhjen e presidentit mund ta çojë Kosovën drejt një tjetër bllokade institucionale. Njohësit e politikës u bëjnë thirrje partive që të vendosin sa më parë nëse do të arrijnë kompromis për kreun e shtetit apo do t’u drejtohen zgjedhjeve të reja.

Sipas tyre, nëse presidenti nuk zgjidhet deri më 5 tetor, Kosova do të mbetet pa president. Çdo shtyrje e mëtejshme e krijimit të institucioneve funksionale mund të prodhojë pasoja të reja në planin politik dhe institucional.

Vullnet Bugaqku, hulumtues i lartë në Institutin Demokratik të Kosovës, ka deklaruar se procesi duhet të përmbyllet para datës 4-5 tetor.

“Kjo zgjedhje e këtij presidentit duhet të bëhet para datës 4-5 tetor. Në rast se nuk ndodh kjo, kjo është situatë e paprecedent, e rrezikshme sepse cenon sigurinë kombëtare të Kosovës. Për herë të parë ndodhë që një shtet në Bashkimin Evropian të funksionojë pa asnjë titullar….”, ka thënë Bugaqku.

Ai dhe ekspertë të tjerë vlerësojnë se partitë nuk duhet të lejojnë zgjatjen e mëtejshme të periudhës pa institucione të plota.

Naim Jakaj, hulumtues i lartë në Institutin e Kosovës për Drejtësi, ka thënë se, nëse debati për presidentin nuk sjell rezultat, vendi duhet të shkojë në zgjedhje dhe ushtruesja e detyrës së presidentes të caktojë sa më shpejt datën e tyre.

“Kur ky debat të shterrohet Kosova le të shkoj në zgjedhje dhe u.d e presidentes të caktoj një datë sa më shpejt për mbajtjen e zgjedhjeve në mënyrë që deri para datës 5 tetor ta kemi një Kuvend të ri, qeveri të re dhe një president që është legjitim dhe legal që votohet nga Kuvendi i Kosovës. Në këso rrethana pas datës 5 tetor ne shkojmë në anarki kushtetuese, nuk do të ketë as kush ti thërras partitë për konsensus”, ka deklaruar Jakaj.

Vonesat në krijimin e institucioneve tashmë i kanë kushtuar Kosovës dhjetëra miliona euro nga Plani i Rritjes, ndërsa vazhdimi i krizës politike pritet të rëndojë edhe më tej situatën.

“Ndërkohë pasojat do të jenë të rënda, siç e përmenda. Financat nga plani i rritjes, financat nga plani i brendshëm, çështjet që lidhen me diplomacinë, shërbimin e jashtëm, me lobimin e Kosovës për aplikim për anëtarësim në Këshillin e Evropës dhe organizata të tjera, veçanërisht në Bashkimin Evropian”, ka shtuar Jakaj.

Lëvizjes Vetëvendosje i mungojnë edhe 6 vota për zgjedhjen e presidentit të ri. Ndërkohë, Partia Demokratike, Aleanca dhe 6 deputetë të LDK-së kanë bërë të ditur se nuk do të kontribuojnë në këtë proces.

The post Analistët paralajmërojnë ngërç institucional: Marrëveshje për presidentin ose zgjedhje të reja appeared first on Albeu.com.

Ish-gjyqtari i Gjykatës Kushtetuese, Kadri Kryeziu, deklaroi se 7 gushti ishte afati i përcaktuar nga Kushtetuta për konstituimin e Kuvendit të Kosovës.

Sipas tij, pas përfundimit të kësaj date nuk ka më një afat kushtetues për këtë proces, ndërsa çdo afat tjetër i përmendur është politik dhe i përcaktuar nga subjektet politike.

Kryeziu tha se, në përputhje me aktgjykimin e Gjykatës Kushtetuese, Kuvendi duhej të konstituohej brenda 30 ditësh. Ai theksoi se pas konstituimit duhet të zgjidhen kryetari dhe nënkryetarët, ndërsa më pas Kuvendi të shpërndahet për t’u mbajtur zgjedhjet e ardhshme të jashtëzakonshme.

Ai shtoi se, në mungesë të konstituimit të Kuvendit, nuk sheh bazë për ndërmarrjen e veprimeve të tjera. Sipas tij, e vetmja mundësi do të ishte që një subjekt politik të kërkonte interpretim lidhur me aktgjykimin e Gjykatës Kushtetuese të vitit 2025.

The post Kryeziu: Fillimisht të konstituohet Kuvendi, më pas të shpërndahet për zgjedhje të jashtëzakonshme appeared first on Albeu.com.

Pas kundërshtimit të gjashtë deputetëve të Lidhjes Demokratike të Kosovës ndaj marrëveshjes me Lëvizjen Vetëvendosje për kandidaturën e Bekim Sejdiut për president, zgjedhjet e reja po shihen gjithnjë e më shumë si të pashmangshme. Analistët politikë vlerësojnë se është e vështirë që deputetë nga Partia Demokratike e Kosovës ose Aleanca ta mbështesin kandidaturën e Sejdiut, duke marrë parasysh qëndrimet aktuale të partive.

Analisti politik Blerim Canaj deklaron për KosovaPress se pengesa kryesore për LDK-në është pamundësia për të arritur pajtim brenda radhëve të saj. Sipas tij, përçarjet e brendshme dhe pozita e kryetarit Lumir Abdixhiku e kanë vështirësuar edhe më shumë situatën.

“LDK-ja e ka problemin që të ketë konsensus brenda partisë së saj, e lërë më të arrijë një konsensus me partitë e tjera. Kjo flet shumë për LDK-në, thyerjet dhe përçarjet që i ka LDK-ja dhe vetë pozitën e kryetarit, Lumir Abdixhiku. Natyrisht, një kryetar që nuk arrin t’i unifikojë deputetët e tij dhe të ketë votën e partisë së tij për çështje kaq të rëndësishme flet për LDK-në… Unë mendoj që dëshira e këtyre personave, të cilëve qytetari u ka dhënë përgjegjësinë për të ndërtuar institucionet, është që ne të shkojmë në zgjedhje, por në afatet e dëshiruara të tyre… Nuk e di a janë zgjedhjet zgjidhje, pasi këta mund të na çojnë në zgjedhje për të na çuar prapë në zgjedhje nga ajo që kemi parë deri tani”, shprehet Canaj.

Një tjetër analist politik, Selatin Retkoceri, thotë se dështimi i ujdisë mes LVV-së dhe LDK-së mund të ndikojë drejtpërdrejt në rezultatin që partia e Lumir Abdixhikut do të marrë në zgjedhjet e ardhshme.

Retkoceri vlerëson se Abdixhiku mori përsipër përgjegjësinë për një tjetër proces zgjedhor kur arriti marrëveshjen me LVV-në pa i siguruar më parë votat e deputetëve të tij. Sipas tij, kjo situatë mund ta dobësojë më tej LDK-në dhe ta vërë në pikëpyetje edhe pozitën e saj si partia e tretë.

“Përkundër që është partia e tretë, ai (Lumir Abdixhiku) e mori barrën e përgjegjësisë që po e çon vendin edhe një herë në një cikël të ri zgjedhor. Kjo do të dëmtojë më së shumti Lidhjen Demokratike të Kosovës. Më vjen keq që kjo parti tani do të luftojë jo për vendin e dytë, por për vendin e tretë, pasi këtë vend do ta ketë të rrezikuar nga Aleanca”, potencon ai.

Canaj nuk pret që, në rrethanat aktuale politike, të arrihet lehtë një marrëveshje e re për zgjedhjen e presidentit.

Megjithatë, ai konsideron se një zgjidhje mund të gjendet nëse LVV-ja pranon kërkesat e Aleancës, ndër to edhe çështjen e gazit amerikan.

“Përpjekjet gjatë gjithë kohës nuk kanë qenë që të gjendet një zgjidhje, pasi ajo ka qenë në tavolinë që në fillim. E tërë përpjekja ka qenë që si të bëhet pala tjetër fajtore për atë që ka qenë e planifikuar më herët, shkuarja në zgjedhje. Po të kishte dëshirë për zgjidhje, e para që do të bënte LVV-ja do të ulej seriozisht dhe me tema konkrete me PDK-në, pasi me të nuk e ka pasur problemin e votës. E dyta, do t’i shikonte me seriozitet ato gjashtë pikat e Aleancës, pasi në fund të ditës ato nuk janë pika që shkojnë ekskluzivisht në interes të Aleancës. Janë pika që shkojnë në interes të qytetarit dhe vendit”, thekson ai.

LVV-ja dhe LDK-ja e arritën marrëveshjen më 31 gusht, kur vendosën që Bekim Sejdiu të propozohej për president të Kosovës. Së bashku me deputetët e minoriteteve jo-serbe, këto dy parti kanë gjithsej 80 vota, numër ky i nevojshëm për zgjedhjen e presidentit.

Por, gjatë mbledhjes së Grupit Parlamentar të LDK-së më 1 shtator, u bë e ditur se gjashtë deputetë të kësaj partie nuk do ta mbështesin zgjedhjen e Sejdiut në krye të shtetit.

Ndërkohë, Kuvendi i Kosovës vazhdon të jetë i pakonstituuar. Në dy përpjekjet e deritanishme nuk është arritur të zgjidhet kryetari i Kuvendit dhe të përfundojë konstituimi i Legjislaturës së 11-të.

Seanca konstituive mbetet pika kryesore e përplasjes ndërmjet partive parlamentare, ndërsa mungesa e institucioneve të reja po e zgjat krizën politike. Kryeministri në detyrë, Albin Kurti, ka kërkuar kohë për të arritur një marrëveshje politike që do t’i hapte rrugë konstituimit të Kuvendit dhe krijimit të institucioneve të reja. Në anën tjetër, Partia Demokratike e Kosovës dhe Aleanca po vazhdojnë veprimet politike për të kërkuar që seanca konstituive të mbahet pas zgjedhjeve të 7 qershorit.

The post Dështimi i marrëveshjes për presidentin e çon Kosovën drejt zgjedhjeve të reja appeared first on Albeu.com.

Hysen Durmishi, anëtar i Lëvizjes Vetëvendosje, ka shprehur besimin se do të gjendet një zgjidhje për zgjedhjen e presidentit.

Sipas tij, arritja e një marrëveshjeje për kreun e shtetit është e nevojshme, në mënyrë që vendi të mos përballet sërish me zgjedhje.

“Shpresojmë që marrëveshja të arrihet sa më shpejt, në mënyrë që të mos shkojmë edhe një herë në zgjedhje”, deklaroi Durmishi.

Megjithatë, ai nuk bëri të ditur emrat që LVV-ja mund t’i ketë propozuar për postin e presidentit dhe as nëse ekziston një dakordim konkret mes palëve.

Kur u pyet se cilët janë kandidatët e propozuar nga LVV-ja për president, Durmishi u përgjigj: “Nuk e di”.

Durmishi i bëri këto deklarata pas betimit të tij si anëtar i ri i Lëvizjes Vetëvendosje në Komisionin Qendror të Zgjedhjeve.

The post LVV synon marrëveshje për presidentin për të shmangur zgjedhjet e reja appeared first on Albeu.com.

Harry Bajraktari, veprimtar i njohur i komunitetit shqiptaro-amerikan në Shtetet e Bashkuara të Amerikës, ka komentuar emrat që po përmenden për postin e Presidentit të ardhshëm të Kosovës. Ai ka shprehur mbështetjen për ambasadorin dhe profesorin Bekim Sejdiu, duke e konsideruar atë një prej kandidaturave më të përshtatshme për këtë detyrë.

Sipas Bajraktarit, përvoja e Sejdiut në institucionet shtetërore të Kosovës, diplomaci dhe akademi e bën atë një figurë të përshtatshme për kreun e shtetit. Ai ka theksuar se Kosovës i nevojitet një president profesional, bashkues dhe i paangazhuar politikisht, përcjell “Bota sot”.

Postimi i plotë i Harry Bajraktarit në Facebook:

Bekim Sejdiu, një kandidat ideal për President të Kosovës

Ditët e fundit janë përmendur disa emra si kandidatë të mundshëm për Presidentin e ri të Republikës së Kosovës. Në mesin e tyre është edhe ambasadori dhe profesori Bekim Sejdiu.

Bekim Sejdiu përbën një zgjedhje të mençur për Kosovën, pasi nuk shoqërohet me barrë politike apo me ngarkesa partiake. Ai ka një përvojë të gjerë profesionale, shtetërore, juridike, akademike dhe diplomatike. Gjatë karrierës së tij ka shërbyer si gjyqtar në Gjykatën Kushtetuese të Kosovës, ambasadori i parë i Republikës së Kosovës në Turqi, konsull i përgjithshëm në New York, si dhe profesor në Fakultetin Juridik të Universitetit të Prishtinës.

Kosovës i duhet pikërisht një person i tillë: i matur, i përgatitur, që njeh ligjin, e kupton funksionimin e shtetit dhe di të komunikojë me botën. Vendi ka nevojë për një President që i shërben qytetarëve, mbron Kushtetutën, dinjitetin dhe interesin e Kosovës.

Ambasadori Sejdiu e njeh sakrificën që ka bërë populli i Kosovës për liri, pavarësi dhe demokraci. Ai e di rrugën nëpër të cilën ka kaluar vendi për të arritur deri në këtë pikë. Në të njëjtën kohë, ai ka njohuri për arenën ndërkombëtare, diplomacinë, marrëdhëniet me aleatët dhe rëndësinë e lidhjeve të forta me Shtetet e Bashkuara të Amerikës. Përvoja e tij në Turqi, një shtet i rëndësishëm i NATO-s, dhe në New York, ku ka ndërtuar marrëdhënie të forta me zyrtarë të lartë amerikanë dhe me komunitetin shqiptaro-amerikan, përbën një vlerë të rëndësishme për Kosovën.

Republikës së Kosovës i nevojitet një President i aftë të përballet me krizat, të ruajë qetësinë dhe të bashkojë shoqërinë, duke e çuar vendin përpara. U bëj thirrje të gjitha partive politike në Kosovë, si atyre në pozitë, ashtu edhe atyre në opozitë, që të veprojnë menjëherë dhe pa vonesa. Kosova ka nevojë për një figurë serioze dhe të respektuar si Bekim Sejdiu, e cila mund t’i bashkojë liderët politikë, institucionet, qytetarët dhe aleatët rreth një objektivi të përbashkët: forcimit të shtetit të Kosovës.

Zoti e bekoftë Kosovën dhe gjithë popullin shqiptar.

The post Harry Bajraktari: Bekim Sejdiu është zgjedhje e mençur për President të Kosovës, thirrje partive politike appeared first on Albeu.com.

Agim Aliçkaj ka reaguar ashpër pas deklaratës së deputetes së LDK-së, Hykmete Bajrami, e cila pyeti pse Albin Kurti po e dërgon vazhdimisht Kosovën në zgjedhje dhe kujt i shërben një vend pa Kuvend funksional dhe pa institucione legjitime.

Aliçkaj i ka hedhur poshtë pretendimet e saj, duke deklaruar se kryeministri Albin Kurti nuk ka arsye të kërkojë zgjedhje të reja, pasi, sipas tij, ka fituar tri palë zgjedhje të shkaktuara nga opozita. Ai e akuzoi opozitën se po pengon funksionimin e institucioneve dhe zbatimin e vullnetit të qytetarëve, përcjell “Bota sot”.

Duke iu drejtuar Bajramit, Aliçkaj tha se ajo po përpiqet të mashtrojë vetëm veten dhe se, së bashku me grupet që i cilësoi si anti-demokratike, po bllokon shtetin dhe vullnetin e popullit. Ai shtoi se kjo qasje i ka bërë të kënaqur Listën Srpska, për të cilën, sipas tij, Bajrami ka deklaruar se “nuk ka problem”.

Aliçkaj kërkoi të dijë përse opozita nuk e pranon ofertën e Kurtit për zgjedhjen e një presidenti konsensual dhe jopartiak. Po ashtu, ai pyeti pse nuk propozohet një kandidat i tillë dhe pse nuk jepet zotimi se deputetët do të qëndrojnë në sallë për të votuar, siç i ka ngarkuar populli.

Sipas tij, arsyeja është se kundërshtarët politikë shpresojnë ta rrëzojnë Kurtin duke e çuar shtetin drejt kaosit. Në përfundim, ai i cilësoi ata si të mjerë dhe të dështuar, duke thënë se qytetarët nuk mashtrohen me manovra cirkusi, shpifje dhe fjalë boshe.

The post Aliçkaj i kundërpërgjigjet Bajramit: Kurti nuk ka nevojë për zgjedhje, opozita po bllokon vullnetin e qytetarëve appeared first on Albeu.com.

Kryeministri në detyrë i Kosovës, Albin Kurti, deklaroi të premten se subjektet politike duhet të nisin diskutimet për emra konkretë që mund të kandidojnë për postin e presidentit të ardhshëm. Sipas tij, një marrëveshje paraprake do të mundësonte shmangien e zgjedhjeve të reja.

“Duhet të fillojmë të flasim edhe me emra, sepse po humbim shumë kohë, por më së shumti humbim duke shkuar në zgjedhje”, tha Kurti.

Ai njoftoi se mbrëmë u ka dërguar mesazh kryetarëve të PDK-së, LDK-së dhe Aleancës, të cilëve u ka propozuar një takim për çështjen e presidentit.

“Duam që për këtë të merremi vesh paraprakisht në mënyrë që të evitojmë zgjedhjet”, u shpreh ai.

Sipas Kurtit, presidenti i ardhshëm duhet të jetë një figurë “konsensuale” dhe gjithëpërfshirëse, me përkrahje sa më të madhe si në Kuvend, ashtu edhe mes qytetarëve.

Ai theksoi se Kosova ka “me dhjetëra” personalitete të përshtatshme nga sfera akademike, politike dhe shoqërore. Në këtë grup, sipas tij, bëjnë pjesë edhe individë që kanë dhënë kontribut në luftë dhe në procesin e shtetndërtimit.

The post Kurti fton partitë në takim për të diskutuar kandidatët për president appeared first on Albeu.com.

Kryetari i LVV-së, Albin Kurti, ka ritheksuar se partitë parlamentare shqiptare duhet të arrijnë një marrëveshje për kandidatin që do të zgjidhet presidenti i ardhshëm i Kosovës. Sipas tij, ky emër duhet të gëzojë konsensus.

Në një prononcim për mediat, Kurti deklaroi se presidenti apo presidentja e ardhshme duhet të jetë një personalitet i dëshmuar në profesion dhe në shoqëri, me merita, kontribut dhe vlera kombëtare e qytetare.

“Si fituese e zgjedhjeve, LVV-ja mban qëndrimin se presidenti i ardhshëm duhet të jetë konsensual dhe të sigurojë mbështetje sa më të gjerë në Kuvend dhe në popull. Ai ose ajo duhet të ketë merita e kontribut, të përfaqësojë vlera kombëtare dhe qytetare, si dhe të jetë i dëshmuar në profesion e në shoqëri. Për këtë arsye duam të arrijmë marrëveshje, në mënyrë që të shmangim zgjedhjet e reja”, tha Kurti.

Ai u përcolli urimet edhe 100 kadetëve që sot u bënë pjesë e Shërbimit Korrektues të Kosovës.

Kurti e cilësoi këtë si një ditë të gëzueshme dhe të suksesshme për Ministrinë e Drejtësisë, drejtësinë dhe Shërbimin Korrektues në Kosovë, pasi 100 kadetët përfunduan me sukses trajnimin 5-mujor dhe nga tani do të shërbejnë si 100 oficerë.

The post Kurti rikonfirmon qëndrimin: Nevojitet marrëveshje për presidentin e ardhshëm appeared first on Albeu.com.

Zgjedhjet e parakohshme parlamentare të mbajtura më 7 qershor janë konsideruar përgjithësisht të lira, të drejta dhe konkurruese, në përputhje me standardet demokratike. Gjatë procesit nuk u identifikuan probleme që mund të cenonin integritetin e përgjithshëm të zgjedhjeve.

Këto përfundime u paraqitën në konferencën “Forcimi i Integritetit Zgjedhor: Gjetjet dhe Rekomandimet nga Zgjedhjet e Parakohshme Parlamentare 2026”, e organizuar nga koalicioni i organizatave për vëzhgimin e zgjedhjeve “Demokracia në Veprim” (DnV).

Administrimi zgjedhor u vlerësua kryesisht profesional, por u evidentuan vështirësi në gjetjen dhe qasjen në vendvotime, veçanërisht për personat me aftësi të kufizuara. Si sfida të tjera u përmendën zbatimi jo gjithmonë i njëtrajtshëm i procedurave dhe problematikat në mjedisin digjital informativ.

Zëvendësambasadori i Zvicrës, Christoph Fuchs, deklaroi se procesi u zhvillua në një atmosferë të qetë, konkurruese dhe paqësore. Ai çmoi punën e Komisionit Qendror të Zgjedhjeve dhe të Panelit Zgjedhor për Ankesa dhe Parashtresa, duke thënë se KQZ-ja i menaxhoi shumicën e rasteve në mënyrë profesionale, ndërsa profesionalizëm tregoi edhe PZAP-ja.

Sipas Fuchs, raportet kanë nxjerrë në pah vështirësitë e qytetarëve për të gjetur pikat e tyre të votimit, pengesat për personat me aftësi të kufizuara, mungesën e zbatimit të njëtrajtshëm të procedurave dhe sfidat që lidhen me hapësirën digjitale të informacionit. Ai theksoi se këto nuk janë vetëm çështje teknike, pasi lidhen edhe me mungesën e besimit. Qytetarët, sipas tij, duhet të jenë të bindur se ligjet zbatohen njësoj për të gjithë dhe se vota e tyre mbrohet dhe mbetet e fshehtë.

Fuchs shtoi se zgjedhjet nuk mund t’i zëvendësojnë institucionet funksionale. Sipas tij, aktorët politikë duhet të jenë në gjendje të shprehin mospajtime pa penguar funksionalizimin institucional, ndërsa pjesëmarrja e ulët në votime ka vënë në dukje nevojën për institucione efektive.

Stublla nënvizoi se vëzhgimi i zgjedhjeve është i rëndësishëm për forcimin e llogaridhënies, integritetit dhe besimit te institucionet demokratike. Ajo tha se Suedia e konsideron monitorimin dhe vëzhgimin zgjedhor si një element kyç, ndërsa prania e vëzhguesve ndihmon drejtpërdrejt në rritjen e këtyre standardeve.

Sipas Stubllës, zgjedhjet parlamentare në Kosovë dëshmuan sërish angazhimin e vazhdueshëm të vendit ndaj parimeve demokratike. Ajo kujtoi se vëzhguesit vendorë dhe ndërkombëtarë e cilësuan procesin përgjithësisht të qetë dhe të administruar mirë. Stublla theksoi gjithashtu se votimi është një e drejtë themelore e njeriut, e cila duhet ushtruar dhe respektuar si e tillë. Çdo votë, sipas saj, ka rëndësi dhe mund të ndikojë në përmirësimin e jetës dhe të shoqërisë, ndërsa ata që vendosin të mos marrin pjesë humbin një mundësi të rëndësishme për të ndikuar në drejtimin e vendit.

Eugen Cakolli nga IKD deklaroi se, nga pikëpamja teknike, zgjedhjet e 7 qershorit ishin dukshëm më të mira se proceset e mëparshme. Megjithatë, në rrafshin politik, ai tha se këto zgjedhje dëshmojnë se vendi po u drejtohet zgjedhjeve për shkak të krizave që nuk po marrin zgjidhje përmes vetë proceseve zgjedhore.

Cakolli vlerësoi se zgjedhjet u zhvilluan përgjithësisht sipas standardeve demokratike për një garë të lirë, të drejtë dhe konkurruese. Ai tha se procesi u administrua në tërësi me profesionalizëm dhe se DnV-ja nuk konstatoi probleme që do të dëmtonin integritetin e përgjithshëm të zgjedhjeve. Sipas tij, KQZ-ja e menaxhoi pjesën dërrmuese të procesit në mënyrë më profesionale sesa në të gjitha proceset paraprake.

Votimi jashtë vendit u rendit ndër çështjet që kërkojnë trajtim të mëtejshëm. Cakolli tha se ky proces ishte më i rregullt dhe më pak i politizuar, por se vazhdon të mbetet një problem serioz për institucionet e hetuesisë. Shqetësimi lidhet me publikimet në rrjetet sociale, në të cilat pretendohet se grupe të organizuara votuesish po plotësonin një numër të madh fletëvotimesh. DnV-ja ka kërkuar që këto raste të trajtohen nga institucionet hetimore.

The post Zgjedhjet e 7 qershorit përmbushën standardet demokratike, por procesi nxori në pah disa sfida appeared first on Albeu.com.