Albin Kurti, kryeministër në detyrë dhe kryetar i Lëvizjes Vetëvendosje, tha se përpjekjet për të parandaluar mbajtjen e zgjedhjeve vazhdojnë, edhe pse arritja e një marrëveshjeje me LDK-në për zgjedhjen e presidentit është vështirësuar. Pas takimit me përfaqësuesit e komuniteteve joshumicë, ai konfirmoi se kandidati i dakorduar mbetet profesori Bekim Sejdiu.

Sipas Kurtit, marrëveshja politike e lidhur me Lidhjen Demokratike të Kosovës për postin e presidentit vazhdon të jetë pjesë e diskutimeve. Ai përsëriti se propozimi i LVV-së për këtë pozitë është Bekim Sejdiu.

Takimi me përfaqësuesit e komuniteteve joshumicë u zhvillua në Kuvend. Kurti bëri të ditur se edhe deputetët e komuniteteve pakicë kanë shprehur keqardhje për moszbatimin e marrëveshjes me LDK-në.

“Diskutuam për marrëveshjen politike të arritur me LDK-në lidhur me emrin e presidentit, për të cilin tashmë kemi rënë dakord, profesorin Bekim Sejdiu. Edhe ata shprehën keqardhje që marrëveshja nuk po zbatohet, pasi gjashtë deputetë të LDK-së nuk po e respektojnë atë”, deklaroi Kurti.

Ai sqaroi se në takim ishin gjithsej dhjetë përfaqësues: pesë prej tyre janë pjesë e qeverisë, ndërsa pesë të tjerë i përkasin legjislaturës së ardhshme.

“Në takim ishim dhjetë persona; pesë jemi në qeveri dhe pesë në Kuvendin e legjislaturës së ardhshme. Dy ishin boshnjakë, dy turq, dy egjiptianë, si dhe nga një serb, ashkali dhe rom. I falënderova për kontributin e tyre dhe do të vazhdojmë së bashku përpara, duke u përpjekur t’i shmangim zgjedhjet, tani që kemi një marrëveshje”, u shpreh ai.

Kreu i LVV-së vlerësoi se zhvillimet e fundit e kanë komplikuar situatën politike, megjithëse, sipas tij, janë shënuar edhe përparime.

“Dje pasdite pati një zhvillim negativ, por kemi pasur progres”, tha Kurti. Ai shtoi se në legjislaturën aktuale ka më shumë vota të mundshme për zgjedhjen e presidentit sesa në të kaluarën.

Kurti njoftoi gjithashtu se do të konsultohet me Kryesinë e Lëvizjes Vetëvendosje për veprimet e ardhshme.

Duke folur për takimin me kryetarin e LDK-së, Lumir Abdixhiku, ai tha se biseda ishte përqendruar te situata brenda kësaj partie dhe te mundësia për të gjetur një rrugëdalje.

“Kryetari Abdixhiku më informoi për gjendjen në subjektin e tij, ndërsa unë e njoftova për bisedimet me Grupin Parlamentar të LVV-së. Tani nevojitet një mbledhje e re e Kryesisë për të vlerësuar mundësitë për të ecur përpara. Mbetemi optimistë, edhe pse situata është më e vështirë se më parë”, deklaroi ai.

I pyetur lidhur me kandidatin konkret për president, Kurti ritheksoi se bëhet fjalë për profesorin Bekim Sejdiu.

“Kemi arritur marrëveshje dhe kemi pasur autorizimet për të negociuar. Negociatat, fatmirësisht, përfunduan me një marrëveshje, por duket se dikush e ka pasur shumë më të vështirë pranimin e saj sesa kohën kur nuk kishim marrëveshje”, theksoi Kurti.

The post Kurti: Sejdiu mbetet kandidati për president, po punojmë për të shmangur zgjedhjet appeared first on Albeu.com.