Pas më shumë se 27 vitesh pritjeje dhe pasigurie, laboratori i Hagës ka konfirmuar zyrtarisht tri viktimat e para të identifikuara përmes analizave të ADN-së nga i ashtuquajturi “Grupi i Intelektualëve të Mitrovicës”.

Identifikimet u mundësuan pas një muaji operacionesh intensive të gërmimit në tri varreza masive në Zubin Potok. Në këto lokacione, gjatë prillit të vitit 1999, forcat serbe ekzekutuan dhe fshehën trupat e 23 civilëve shqiptarë, mes tyre mjekë, profesorë dhe veprimtarë të njohur. Ndërkohë që analizat për pjesën tjetër të grupit vijojnë, Komisioni Qeveritar po kërkon hapjen e arkivave të luftës dhe ndëshkimin e personave përgjegjës.

Pas 27 vitesh, gërmimet në fshatrat Kalludër dhe Jabukë të Zubin Potokut kanë nxjerrë në dritë mbetjet mortore që dyshohet se u përkasin 23 civilëve të njohur si “Grupi i Intelektualëve” nga Mitrovica. Zhvarrimi është përmbyllur zyrtarisht, ndërsa raportet e para të ardhura nga Haga kanë bërë të mundur identifikimin e tri viktimave. Mostrat e tjera mbeten ende nën shqyrtim.

Kushtrim Gara, nga Komisioni Qeveritar për Personat e Zhdukur, tha se institucionet kosovare kanë marrë tri raportet e para të ADN-së dhe po bashkëpunojnë vazhdimisht me ekspertët mjekoligjorë të Komisionit Ndërkombëtar për pranimin dhe përshpejtimin e procedurave për mostrat e tjera të dërguara nga lokacionet e varreve masive në Kalludër dhe Jabukë. Sipas tij, sapo të mbërrijnë rezultatet e reja, familjarët e viktimave do të njoftohen, siç ndodhi edhe me tri identifikimet e para.

“Grupi i Intelektualëve” përbëhej nga kirurgë, mjekë, profesorë dhe aktivistë të çështjes kombëtare. Ata po largoheshin në mënyrë të organizuar drejt Malit të Zi për t’i shpëtuar përndjekjes, por u ndaluan në zonën e Zubin Potokut dhe u ekzekutuan. Më pas, trupat e tyre u vendosën në varreza masive me synimin për të fshehur gjurmët e krimit.

Mes tri viktimave të identifikuara ndodhet edhe veprimtari i njohur Idriz Rrecaj. Megjithatë, puna forenzike nuk ka përfunduar, pasi analizat për mbetjet e tjera vazhdojnë. Krahas identifikimit të viktimave, mbetet e domosdoshme edhe përcaktimi i përgjegjësve dhe vënia e tyre para drejtësisë.

Gara theksoi se familjet e personave të zhdukur kanë pritur për një kohë të gjatë dhe se drejtësia nuk mund ta largojë dhimbjen, por mund të sjellë ngushëllim dhe të tregojë se vuajtja e tyre nuk është harruar. Ai nënvizoi se zbardhja e fatit të të zhdukurve me dhunë dhe ndëshkimi i përgjegjësve për krimet me përmasa gjenocidale përbëjnë detyrime të vazhdueshme institucionale, në mënyrë që të respektohet e drejta e familjeve për të mësuar të vërtetën dhe për të marrë drejtësi.

Përveç hetimeve forenzike, të gjitha provat dhe dëshmitë materiale të mbledhura në varrezat masive të veriut po i dorëzohen zyrtarisht Drejtorisë për Hetimin e Krimeve të Luftës.

Institucionet e Kosovës kanë përsëritur kërkesën ndaj komunitetit ndërkombëtar që të ushtrojë trysni mbi Beogradin për hapjen e arkivave ushtarake të vitit 1999. Këto dokumente vlerësohen si vendimtare për zbardhjen e plotë të masakrës.

The post Pas 27 vitesh, identifikohen me ADN tri viktima të “Grupit të Intelektualëve të Mitrovicës appeared first on Albeu.com.

Zëvendëskryeministrja dhe ministrja në detyrë e Drejtësisë, Donika Gërvalla, ka reaguar ashpër ndaj krimit të rëndë që i mori jetën një 25-vjeçareje në fshatin Kërvasari të Malishevës.

Ajo u ka bërë thirrje institucioneve të sigurisë dhe drejtësisë që të kryejnë një hetim të shpejtë, gjithëpërfshirës dhe pa asnjë lëshim, në mënyrë që të ndriçohen plotësisht rrethanat e ngjarjes dhe autori të dalë para ligjit.

“Dhuna ndaj grave nuk është çështje private. Nuk është konflikt familjar. Nuk është ‘punë e shtëpisë’. Dhuna ndaj grave është krim dhe ndaj saj do të ketë zero tolerancë,” theksoi Gërvalla në një deklaratë të prerë.

Ministrja e cilësoi këtë ngjarje tragjike si një sinjal të fortë alarmi për mbarë shoqërinë dhe aparatin shtetëror. Ajo nënvizoi se reagimi nuk mund të vijë vetëm pas humbjes së një jete, por se dhuna duhet të ndalet përpara se të marrë përmasa të pakthyeshme.

Në rolin e saj si Koordinatore Kombëtare për Mbrojtje nga Dhuna në Familje, Dhuna ndaj Grave dhe Dhuna me Bazë Gjinore, Gërvalla insistoi që ky rast të trajtohet me seriozitetin më të lartë dhe të shqyrtohet çdo detaj.

“Një grua është vrarë. Përballë dhunës ndaj grave nuk mund të ketë heshtje, arsyetime apo indiferencë. Ka vetëm një përgjigje: drejtësi dhe vetëm drejtësi dhe zero tolerancë ndaj dhunës në familje, dhunës ndaj grave dhe dhunës me bazë gjinore,” përfundoi ajo.

Në fund të reagimit të saj, Gërvalla i shprehu ngushëllimet e sinqerta familjes dhe njerëzve të afërt të viktimës.

The post Reagon Donika Gërvalla pas vrasjes së gruas 25-vjeçare në Malishevë: Kërkon hetim pa kompromis dhe zero tolerancë ndaj dhunës appeared first on Albeu.com.