Meritan Shabani do ta vazhdojë karrierën në Tajlandë, pasi mesfushori shqiptar ka përfunduar transferimin te Pattaya United, skuadër që konkurron në ligën e dytë të vendit.

Rrugëtimi i 27-vjeçarit dëshmon se sa të paparashikueshme mund të jenë zhvillimet në futboll. Ai doli nga akademia e Bayern Munichut dhe, në moshën 19-vjeçare, arriti të bëhej pjesë e ekipit të parë, me të cilin luajti disa ndeshje.

Për shkak të konkurrencës së madhe, Shabani vendosi të kërkonte një tjetër destinacion. Më pas u transferua në Ligën Premier te Wolverhampton Wanderers, ku nënshkroi një marrëveshje trevjeçare.

Pas kësaj lëvizjeje, karriera e shqiptarit mori një trajektore në rënie. Ai luajti më vonë për VVV-Venlo në Holandë, Grasshopper Zurich në Zvicër, ND Gorica në Kroaci dhe, së fundmi, për AC Bellinzona në Zvicër.

Kalimi te Pattaya United, në nivelin e dytë të futbollit tajlandez, përbën rënien më të madhe të karrierës së tij deri më tani.

“Pattaya United përfundon marrëveshjen për të nënshkruar me Meritan Shabanin, një lojtar të akademisë së të rinjve të Bayern Munich, për të forcuar sulmin për sezonin 2026/27”.

Në njoftimin e klubit thuhet gjithashtu: “Ardhja e Meritan Shabanit konsiderohet një shtesë kyçe në skuadrën ‘Dolphin’, duke rritur opsionet e tyre sulmuese dhe duke përmirësuar potencialin e ekipit para fillimit të sezonit”.

Gjatë karrierës së tij, Shabani ka qenë edhe përfaqësues i ekipit kombëtar gjerman U-20.

The post Nga shpresë e Bayern Munichut në kategorinë e dytë tajlandeze, Meritan Shabani firmos me Pattaya United appeared first on Albeu.com.

Manchester United po përgatit një ofertë të parë për Mateus Mane, talentin e Wolverhampton Wanderers që po vlerësohet si një ndër lojtarët e rinj më premtues në futbollin anglez.

Raportimet e mediave britanike bëjnë të ditur se “Djajtë e Kuq” synojnë të paraqesin një propozim prej afërsisht 20 milionë funtesh për 18-vjeçarin, i cili mund të aktivizohet si në mesfushë, ashtu edhe në repartin ofensivë.

Forma e tij me Wolves ka ngjallur interesin e disa skuadrave të mëdha, ndaj Manchester United nuk është i vetmi klub që po e ndjek nga pranë situatën e lojtarit anglez.

Në garë për të monitoruar zhvillimin e Mane është edhe Liverpooli, që po shqyrton potencialin e tij dhe mundësinë për ta transferuar në të ardhmen.

Gjithsesi, Wolverhampton nuk synon të heqë dorë lehtësisht nga një prej perlave të akademisë. Klubi anglez e çmon Mane rreth 35 milionë funte, një shumë dukshëm më e lartë se oferta fillestare që pritet të vijë nga Manchester United.

Deri në këtë pikë të sezonit, 18-vjeçari ka dhënë sinjale shumë pozitive, duke realizuar pesë gola dhe duke dhënë dy asistime, çka tregon se ai mund të ketë ndikim edhe në nivelet më të larta.

Ndërkohë, Manchester United vijon kërkimet për afrime të reja me perspektivë për të ardhmen, ndërsa Mateus Mane tashmë është përfshirë në listën e objektivave të klubit për merkaton e ardhshme.

The post Manchester United bëhet gati të lëvizë për Mateus Mane, por Wolves i vendos një çmim të lartë appeared first on Albeu.com.