Presidenti i Serbisë, Aleksandar Vuçiq, tha të hënën se Milan Radoiçiq, i cili e ka pranuar përgjegjësinë për sulmin e armatosur ndaj Policisë së Kosovës në Banjskë të Zveçanit më 2023 dhe ndaj të cilit është lëshuar njoftim i kuq nga Interpol-i, nuk po përballet me ndjekje penale për ndonjë vepër penale.

“S’keni thënë pse Millan Radoiçiq është në njoftim të kuq. Nuk është për shkak të krimit, por për shkak të Kosovës”, deklaroi Vuçiq gjatë një konference për media.

Sipas ekspertit të sigurisë, Valdet Hoxha, mbështetja publike që presidenti serb po i jep Milan Radojçiçit nxjerr në pah, siç thotë ai, përfshirjen e shtetit serb në organizimin dhe mbështetjen e sulmit terrorist në Banjskë.

Hoxha thekson se hetimet e zhvilluara nga Prokuroria Speciale e Kosovës, në bashkëpunim me partnerët ndërkombëtarë, kanë siguruar prova që, sipas tij, e ndërlidhin Serbinë me këtë sulm. Sipas tij, mbrojtja që po i bëhet Radojçiçit synon të zbehë përgjegjësinë e Beogradit.

“Mbrojtja që Vuçiç po i bën Radojçiçit dhe grupit kriminal që kryen sulmin në Banjskë të Republikës së Kosovës është dëshmi se ky grup kriminal i udhëhequr nga Radojçiç dhe sulmi terrorist kundër sovranitetit të vendit dhe kundër rendit kushtetues, ka qenë e planifikuar, organizuar, financuar e trajnuar nga vetë shteti i Serbisë.

Rolin e shtetit serb përmes strukturave ushtarake, intelegjentene të sigurisë në sulmin terrorist kundër rendit kushtetues të Republikës së Kosovës si dhe qëllimin e këtij akti, e ka vërtetuar edhe një hetim profesional nga Prokuroria Speciale e Republikës së Kosovës edhe me ndihmën e mekanizmave të zbatimit të ligjit të partnerëve ndërkombëtar, prandaj Vuçiç i gjendur para kësaj situate provuese kompetente dhe profesionale, mundohet që ta amnistojë Radoiçiçin duke e marr në mbrojtje dhe kjo në përpjekje të uljes së përgjegjësisë së shtetit serb”, thotë ai.

Ai vlerëson se qëndrimi i Vuçiqit duhet të shihet si sinjal alarmi për partnerët ndërkombëtarë, pasi, sipas Hoxhës, këto deklarime dëshmojnë se retorika nacionaliste vazhdon dhe se veprimet e Radojçiçit po justifikohen.

Po ashtu, Hoxha kërkon që Radojçiç dhe bashkëpunëtorët e tij të vihen përballë drejtësisë, duke nënvizuar se Kosova duhet të vijojë, në bashkërendim me partnerët ndërkombëtarë, përpjekjet për arrestimin e tyre.

“Ky qëndrim i Vuçiç duhet të jetë një alarm edhe për partnerët ndërkombëtar sepse tregon qartë se Vuçiç vazhdon me retorikën nacionaliste dhe se duke përdorur terma si “Radojçiç nuk është në njoftimin e kuq përshkak krimit por përshkak Kosovës”, e bën të njohur faktin se Vuçiç dhe shteti serb e ka jo vetëm si opsion ndërhyrjen në Kosovë por edhe e arsyeton si mënyrë veprimi.

Radojçiç dhe grupi kriminal që kryen sulmin terrorist dhe kundër rendit kushtetues të Republikës së Kosovës, duhet dhe do të dalin herë do kur para drejtësisë së shtetit të Kosovës dhe Kosova duhet që të ndërmerr çdo hap procedural e në koordinimne bashkëpunim me vendet tjera mike për arrestimin e Radojçiç e bashkëpunëtorëve të tij” – përfundon ai për “Bota sot”.

The post Hoxha: Deklaratat e Vuçiqit për Radojçiçin tregojnë përfshirjen e Serbisë në Banjskë dhe duhet të shqetësojnë ndërkombëtarët appeared first on Albeu.com.

Presidenti i Serbisë, Aleksandar Vuçiq, tha të hënën se Milan Radoiçiq, i cili ka pranuar përgjegjësinë për sulmin e armatosur ndaj Policisë së Kosovës në Banjskë të Zveçanit në shtator të vitit 2023 dhe ndaj të cilit është lëshuar njoftim i kuq nga Interpol-i, nuk po përballet me ndjekje penale për ndonjë vepër kriminale.

Gjatë një konference për media, Vuçiq u shpreh: “Nuk keni thënë pse Milan Radoiçiq është në njoftim të kuq. Nuk është për shkak të krimit, por për shkak të Kosovës”,.

Këto deklarime kanë shtuar dyshimet për gatishmërinë e Serbisë që të bashkëpunojë me drejtësinë ndërkombëtare dhe të sigurojë përgjegjësi për sulmin në Banjskë. Në të njëjtën kohë, ato kanë ngritur edhe pikëpyetje nëse bashkësia ndërkombëtare duhet ta rrisë trysninë ndaj Beogradit për dorëzimin e Milan Radoiçiqit para drejtësisë.

Për këtë zhvillim, në një prononcim për “Bota sot”, eksperti austriak Gunther Fehlinger i cilësoi si shqetësuese dhe alarmante deklaratat e Vuçiqit në mbrojtje të Radoiçiqit.

Sipas tij, ajo që ndodhi në Banjskë nuk mund të paraqitet si keqkuptim politik, por ishte një akt terrorist.

“Deklarata e fundit e presidentit Vuçiq në lidhje me Milan Radoiçiq është thellësisht shqetësuese dhe duhet të jetë një alarm serioz për bashkësinë ndërkombëtare.

Sulmi në Banjskë i shtatorit 2023 nuk ishte një keqkuptim politik. Ishte një sulm terrorist i kryer nga një grup paramilitar i armatosur rëndë që rezultoi në vrasjen e rreshterit të Policisë së Kosovës Afrim Bunjaku dhe kërcënoi paqen dhe stabilitetin në të gjithë Ballkanin Perëndimor. Milan Radoiçiq pranoi publikisht përgjegjësinë për organizimin e grupit të përfshirë.

Në vend që të mbështesë një proces të pavarur gjyqësor, presidenti Vuçiq tani pretendon se Radoiçiq kërkohet “jo për shkak të krimit, por për shkak të Kosovës”. Një deklaratë e tillë është e papajtueshme me parimet e sundimit të ligjit. Asnjë udhëheqës demokratik nuk duhet të mbrojë publikisht ose politikisht një njeri që ka pranuar organizimin e një sulmi të armatosur. Nëse ai është fajtor për vepra penale specifike, i takon gjykatës ta vendosë, por ai së pari duhet të dalë në gjyq”, deklaroi eksperti austriak.

Fehlinger kërkoi që Radoiçiq të dorëzohet pa vonesë përballë drejtësisë së Kosovës. Ai tha se, nëse Serbia e konsideron të pafajshëm, atëherë duhet t’i paraqesë provat dhe argumentet e saj në gjykatat kompetente.

Sipas tij, kjo çështje duhet të shërbejë edhe si një sinjal i qartë për bashkësinë ndërkombëtare, pasi pa ndryshim të kësaj qasjeje Serbia nuk mund të pretendojë seriozisht anëtarësim në Bashkimin Evropian.

“Milan Radoiçiq duhet t’i dorëzohet sistemit të drejtësisë së Kosovës pa vonesë. Nëse Serbia beson se ai është i pafajshëm, ajo duhet të paraqesë argumentet e saj para gjykatave kompetente, në vend që të refuzojë bashkëpunimin gjyqësor. Drejtësia nuk mund të funksionojë nëse udhëheqësit politikë vendosin se kush është mbi ligjin. Po, besoj se ky duhet të jetë një paralajmërim i qartë për Bashkimin Evropian, NATO-n, Shtetet e Bashkuara dhe të gjithë partnerët demokratikë. Serbia nuk mund të pretendojë seriozisht se kërkon anëtarësim në BE, ndërkohë që refuzon përgjegegjësinë e plotë për sulmin më të rëndë terrorist në rajon prej vitesh. Bashkëpunimi me autoritetet gjyqësore të Kosovës dhe respekti për të drejtën ndërkombëtare duhet të bëhen kusht thelbësor për integrimin e mëtejshëm evropian të Serbisë”, theksoi Fehlinger.

Më tej, ai komentoi edhe sinjalet e Vuçiqit për dorëheqje, duke thënë se presidenti serb mund të jetë duke përgatitur një lëvizje politike të ngjashme me modelin rus, ku largohet nga presidenca për t’u rikthyer në postin e kryeministrit.

Fehlinger vlerësoi se ndërkombëtarët nuk duhet të bien pre e manovrave të tilla politike dhe se presioni ndaj qeverisë në Beograd duhet të shtohet.

“Paralajmërimet e fundit të Vuçiqit përforcojnë gjithashtu shqetësimet se ai po përgatit një rokadë politike në stilin rus – duke lënë presidencën vetëm për t’u rikthyer si kryeministër, ndërsa vazhdon të ushtrojë të njëjtin pushtet prapa skenave. Evropa e ka parë këtë model më parë nën Vladimir Putin. Nuk përfaqëson ndryshim demokratik; është thjesht një mekanizëm për ruajtjen e pushtetit personal.

Bashkësia ndërkombëtare duhet të refuzojë çdo përpjekje për ta paraqitur një manovër të tillë si ripërtëritje politike. Serbia nuk ka nevojë për një mbajtës të ndryshëm të detyrës me të njëjtin sundimtar pas perdes. Serbia ka nevojë për një tranzicion të vërtetë demokratik të bazuar në zgjedhje të lira dhe të ndershme, një gjyqësor të pavarur, një media të lirë, llogaridhënie dhe respekt për sundimin e ligjit.

Partia Popullore Evropiane duhet gjithashtu të rishqyrtojë seriozisht marrëdhënien e saj me SNS-në. Një parti, udhëheqja e së cilës minon publikisht llogaridhënien gjyqësore dhe duket se mbron një njeri që ka pranuar organizimin e një sulmi të armatosur, po largohet nga vlerat evropiane, jo drejt tyre”, theksoi Fehlinger.

Në përfundim, ai përsëriti se Milan Radoiçiq duhet t’i dorëzohet drejtësisë së Kosovës dhe se Aleksandar Vuçiq duhet të largohet sa më shpejt nga pushteti.

“Serbia është shumë më e madhe se një politikan i vetëm. Populli serb meriton demokraci, drejtësi dhe një të ardhme evropiane – jo sundim të përhershëm të një njeriu të mbajtur përmes trukeve kushtetuese dhe patronazhit politik.

Mesazhi im është pra i qartë: Milan Radoiçiq duhet t’i dorëzohet drejtësisë së Kosovës. Nuk duhet të ketë asnjë lloj rrugëdaljeje në stilin rus për ta mbajtur Aleksandar Vuçiqin në pushtet. Serbia meriton një tranzicion të vërtetë demokratik dhe Aleksandar Vuçiq duhet të tërhiqet plotësisht nga politika, duke i lejuar një brezi të ri udhëheqjeje demokratike ta udhëheqë Serbinë drejt Evropës”, përmbylli Gunther Fehlinger për “Bota sot”.

The post Fehlinger kërkon dorëzimin e menjëhershëm të Radoiçiqit dhe paralajmëron BE-në, pasi Vuçiq doli në mbrojtje të tij appeared first on Albeu.com.