Në mes të gushtit, Ksamili është një nga vendet më të mbipopulluara të Shqipërisë. Rrugët e fshatit mbushen me makina me targa të huaja, muzika nga baret vazhdon deri në orët e para të mëngjesit dhe plazhet e vogla përballë ishujve – të rrethuara nga hotele, restorante dhe klube, konkurrojnë për turistët e ardhur nga e gjithë Europa.

Luis Miguel Varela Mendes ishte një prej tyre.

Portugezi 20-vjeçar kishte ardhur në Shqipëri për pushime, si pjesë e një grupi miqsh. Në orët e para të 18 gushtit, ai ndodhej në “Tortuga Bay”, e njohur edhe si “Principotes”, një strukturë turistike luksoze përballë tre ishujve të Ksamilit.

Rreth orës 05:15, pas një konflikti me disa persona, Mendes u qëllua me thikë për vdekje.

Në internet, kompleksi Principotes e përshkruan veten me shprehjen “Mikpritja si art”. Por pas vrasjes, një tjetër realitet filloi të dalë në sipërfaqe për hotelin dhe pronarin e tij.

Sipas të dhënave në Qendrën Kombëtare të Biznesit, struktura dhe aktiviteti zotërohen nga Kade Bulica, një grua 76-vjeçare. Ajo është nëna e Bekim Bulicës, 36 vjeç, i cili pas ngjarjes u shpall në kërkim për “moskallëzim krimi”. Ekstrakti i kompanisë tregon se Bulica e kishte regjistruar aktivitetin në janar të vitit 2022, me një kapital fillestar prej 100 mijë lekësh.

Djali i saj ishte i njohur për policinë

Drejtori i Policisë së Vlorës, Edvin Ndreu, i tha BIRN se Bekim Bulica ishte proceduar për krime ndaj personit, pasi ishte përfshirë më parë në dhunimin e një punonjësi policie dhe vëllait të tij në Tiranë. Ai rezulton të ketë pasur edhe probleme të tjera me drejtësinë.

Për sigurinë e “Principote”, e ëma e Bulicës kishte punësuar një punonjës të Policisë Kufitare të Gjirokastrës, një punonjës të Policisë së Burgjeve Fier dhe një punonjës të Policisë Bashkiake Gjirokastër, ndërsa një person i katërt punonte si truprojë.

Kur shpërtheu konflikti që përfundoi me vrasjen e Mendes, ata ishin aty.

Sipas policisë, nuk ndërhynë dhe nuk njoftuan autoritetet. Të katërt u ndaluan për moskallëzim krimi dhe mosmarrjen e masave për ndalimin e paligjshmërisë.

Ekspertë të sigurisë dhe turizmit thonë se rasti i Ksamilit ngre pikëpyetje më të gjera mbi kontrollin e personave dhe burimin e parave që qëndrojnë pas investimeve turistike që po transformojnë bregdetin shqiptar.

Kërcënim për rendin e sigurinë

Për vite me radhë, bregdeti shqiptar ka qenë një kantier i madh ndërtimi. Hotele të rinj, resorte, apartamente, beach bare dhe restorante janë ngritur nga Velipoja në Ksamil.

Administrimi i resorteve apo strukturave turistike nga persona me precedentë penalë apo nga anëtarë të krimit të organizuar vlerësohet nga ekspertët si një kërcënim për rendin dhe sigurinë publike.

“Këto ambiente shpesh kthehen në baza operacionale logjistike, ku mbajtja pa leje e armëve, fshehja e personave në kërkim dhe përplasjet mes grupeve rivale transferohen brenda hapësirave publike e turistike”, shprehet ish-prokurori Eugen Beçi, duke i cilësuar këto ambiente si ‘zona të pambrojtura juridikisht’.

Sipas tij, ngjarjet e rënda në ambiente akomoduese nuk janë thjesht krime të izoluara, por ekspozim i drejtpërdrejtë i qytetarëve dhe turistëve ndaj rrezikut për jetën, me kosto të rëndë për rendin dhe ekonominë e vendit.

Redion Qirjazi, drejtori ekzekutiv i fondacionit “Mary Ward Loreto”, një organizatë jofitimprurëse me veprimtari në luftën kundër trafikimit të qenieve njerëzore dhe mbrojtjen e viktimave të këtij aktiviteti kriminal, konstaton se biznese të mëdha turistike kanë krijuar “zona jashtëligjshmërie” në vendin tonë.

“Këto struktura, sipas raportimeve dhe evidentimit të vetë SPAK, funksionojnë jo vetëm si biznese por edhe si territore nën kontrollin e grupeve të strukturuara kriminale”, tha Qirjazi.

Sipas tij, ngjarja tragjike e Ksamilit ku u vra turisti portugez, tregon se personeli është i pakualifikuar dhe në disa raste sillet si një ‘polici private’ e dhunshme që zëvendëson shtetin.

“Këtë ‘guxim’ këto njësi mund ta përftojnë vetëm nëse besojnë se mund të veprojnë mbi ligjin”, shprehet ai.

Qirjazi vëren se në këto ngjarje ka edhe komprometim të strukturave shtetërore.

“Përfshirja e punonjësve të policisë apo burgjeve që punojnë si sigurim privat në këto hotele dhe klube (për arsye financiare apo të tjera), komprometon profesionalizmin dhe integritetin e punonjësve të shtetit, duke vënë në pikëpyetje serioze aftësinë e tyre për të zbatuar ligjin, kur kjo e fundit ndikon drejtpërsëdrejti në biznesin e punëdhënësit të tyre privat”, thekson ai dhe shton se këto rrethana tregojnë paaftësinë e Policisë së Shtetit për të monitoruar radhët e saj në ushtrimin e punëve të dyta në pozicione që nuk janë të lejuara.

Sipas Qirjazit, ngjarje të tilla cenojnë rëndë imazhin e sigurisë dhe turizmit, largojnë investitorët e huaj seriozë dhe rrezikojnë të sjellin paralajmërime udhëtimi nga vendet e BE-së.

“Krimi i zakonshëm ndodh kudo, por krimi i rëndë lë impakt të pakthyeshëm në imazhin e vendit”, pohoi ai.

Krimi i organizuar në turizëm

Në bilancet e SPAK për pasuritë e sekuestruara anëtarëve të krimit të organizuar dhe personave të lidhur me ta, një numër të konsiderueshëm e zënë hotelet, që gjenden kryesisht në bregdetin shqiptar. Vetëm për shtatë muajt e vitit 2026, u raportua nga SPAK se janë vendosur sekuestro preventive mbi pasuri me vlerë 440 milionë euro, që dyshohet se janë krijuar me burime financiare të përfituara nga veprimtari të paligjshme, kryesisht nga trafiku ndërkombëtar i lëndëve narkotike.

Sipas ish-prokurorit Eugen Beçi, sektori i turizmit dhe ndërtimit ofron terrenin ideal për pastrimin e produkteve të veprës penale.

Sipas tij, arsyet janë krejtësisht praktike dhe kanë të bëjnë me qarkullimin e lartë të parasë fizike (cash), si dhe me volumin e madh sezonal që lejon justifikimin e të ardhurave të padeklaruara përmes faturimeve fiktive ose rritjes artificiale të xhiros ditore.

“Ndërtimi i resorteve dhe hoteleve mundëson futjen e parave të pista në ciklin ligjor ekonomik, duke kaluar nga paraja informale në asete të paluajtshme me vlerë të lartë tregtare”, shprehet Beçi.

Ai shton se shkaku tjetër pse krimi i organizuar investon në këtë sektor janë edhe avantazhet për ngritjen dhe administrimin e tyre lehtësisht nga persona të lidhur apo me emra fiktivë, duke krijuar barriera ligjore për gjurmimin e pronarit përfitues real.

Eva Rama, kryetarja e Shoqatës Shqiptare të Operatorëve Turistikë, ATOA, shprehet se, megjithëse ngjarje të veçuara si ajo në Ksamil ndikojnë në sektorin e turizmit, ato nuk duhet të përdoren për të përgjithësuar një sektor të tërë.

Sipas saj, shqetësuese për turizmin është kur strukturat turistike rezultojnë të zotërohen apo kontrollohen nga persona të lidhur me veprimtari kriminale.

“Në këtë pikë nuk kemi më vetëm një çështje të rendit apo një ngjarje kriminale të ndodhur në një hotel, por një problem që prek edhe besueshmërinë dhe imazhin e sektorit”, shprehet ajo dhe nënvizon se turizmi është veçanërisht i ndjeshëm ndaj perceptimit të sigurisë.

“Kur një destinacion fillon të shoqërohet me ngjarje të rënda kriminale dhe me struktura të lidhura me persona me të kaluar kriminale, kjo padyshim nuk i shërben imazhit që Shqipëria kërkon të ndërtojë si destinacion turistik”, pohon Rama dhe rendit disa probleme që shfaqen si pasojë e zotërimit të aseteve turistike nga ana e krimit të organizuar.

Sipas Ramës, një realitet i tillë deformon konkurrencën, pasi bizneset që punojnë me kapital të ligjshëm nuk konkurrojnë në të njëjtat kushte me struktura ku mund të qarkullojë kapital me origjinë kriminale.

Ajo vlerëson se kjo cenon besimin te tregu dhe te vetë investimet në turizëm.

“Kur raste të tilla bëhen të përsëritura dhe marrin vëmendje publike apo ndërkombëtare, ndikojnë edhe në perceptimin e sigurisë dhe në imazhin e Shqipërisë si destinacion”, konstaton Rama.

Mejgithatë, Rezart Shehu, konsulent për menaxhimin e strukturave turistike, e cilëson ngjarjen e 18 gushtit si të izoluar.

“Bëhet fjalë për një ngjarje shumë të rëndë, por në këndvështrimin tim duhet trajtuar si një ngjarje e izoluar, dhe jo si një tregues se turizmi shqiptar në tërësi është i pasigurt”, tha Sheu.

“Ngjarje kriminale ndodhin edhe në destinacione të tjera turistike të rajonit dhe të Europës dhe kjo nuk do të thotë automatikisht se i gjithë sektori turistik i atij vendi është problematik”, shtoi ai.

Shehu fajëson institucionet shtetërore për investimet e fondeve me prejardhje të paligjshme në sektorin e turizmit.

“Nëse ekzistojnë indicie apo të dhëna që lidhen me burimin e pasurisë, aktivitetin kriminal ose përdorimin e biznesit për qëllime të paligjshme, institucionet duhet të kenë kapacitetin dhe mekanizmat për ta evidentuar dhe kontrolluar këtë situatë”, tha ai.

“Përndryshe krijohet një hapësirë ku kapitali me origjinë të dyshimtë mund të investohet dhe të pastrohet përmes sektorëve me rritje të shpejtë, përfshirë edhe turizmin”, nënvizon Shehu.

Masat e munguara

Sipas ekspertëve, institucionet shtetërore duhet të verifikojnë burimet e vlerave financiare që investohen në sektorin e turizmit, si dhe në çdo sektor tjetër.

“Ministria e Turizmit dhe Policia e Shtetit duhet të bashkëpunojnë me SPAK për të kryer një kontroll të rreptë të origjinës së kapitalit përpara dhënies së çdo licence për hotele apo plazhe”, thotë Qirjazi dhe vlerëson se duhet të merren masa për të mos lejuar që punonjësit e Policisë së Shtetit të punojnë për sigurinë fizike në biznese private, si dhe të reformohen strukturat e policive private.

Sipas tij, është e nevojshme që të forcohen masat në rastet kur ka paligjshmëri, deri në bllokimin e llogarive dhe heqjen e licencës për arsye të cenimit të sigurisë publike.

Edhe ish-prokurori Eugen Beçi vlerëson se përballja me këtë fenomen kërkon ndërhyrje të koordinuar ndërmjet hetimit pasuror dhe kontrollit administrativ në terren.

“Hetimet pasurore nuk duhet të nisin vetëm pas ngjarjeve me armë, por si hetim proaktiv paralel për çdo investim madhor ku profili financiar i investitorit nuk përputhet me të ardhurat e ligjshme të deklaruara”, vëren ai.

Sipas Beçit, është e nevojshme të ketë verifikim të thelluar nga Drejtoria e Parandalimit të Pastrimit të Parave dhe tatimet; filtër ligjor për licencat turistike përmes një vendimi administrativ me kritere të forta integriteti; si dhe një kontroll të shtuar policor mbi sigurinë e mjediseve.

Institucionet shtetërore fajësohen si përgjegjëse për situatën e krijuar edhe prej ekspertëve të sektorit të turizmit.

“Kontrolli duhet të fillojë që te transparenca e pronësisë reale dhe burimi i financimit, veçanërisht për investimet e mëdha dhe të vazhdojë me kontrollin fiskal dhe zbatimin real të legjislacionit kundër pastrimit të parave”, pohon kryetarja e ATOA, Eva Rama.

“Shteti i ka instrumentet për ta bërë këtë; çështja është që ato të funksionojnë dhe të zbatohen njësoj për të gjithë”, shtoi ajo.

Edhe sipas Shehut, turizmi shqiptar ka nevojë për më shumë profesionalizëm institucional, zbatim të barabartë të ligjit, transparencë dhe mbështetje në infrastrukturë.

Sipas tij, kjo do të mbronte jo vetëm turistët, por edhe operatorët korrektë që investojnë dhe punojnë çdo ditë për të zhvilluar imazhin e Shqipërisë si një destinacion turistik./BIRN

The post Vrasja e turistit portugez në resortin “Principote”/ BIRN: Pikëpyetje mbi kontrollin e personave dhe burimin e parave që qëndrojnë pas investimeve! appeared first on Albeu.com.

Bashi arriti të mbijetojë pas breshërisë së plumbave dhe i plagosur në shpatull, bëri një lëvizje prej rreth dy kilometrash në këmbë për të kërkuar ndihmë.

Sipas dëshmisë së tij, Bashi ndodhej rastësisht në pjesën e pasme të automjetit bashkë me Prelë dhe Lekë Gjonin, kur ndaj tyre u hap zjarr.

Autorët dyshohet se përdorën dy armë, një kallashnikov dhe një MP5, duke qëlluar më shumë se 50 plumba.

Në momentin e sulmit, Bashi është shtrirë në automjet dhe ka marrë një plumb në shpatull. Ai ka qëndruar i fshehur për disa minuta, derisa autorët janë larguar nga vendi i ngjarjes.

Automjeti kishte humbur kontrollin dhe ishte kthyer në njërën anë. Pasi është siguruar se autorët nuk ndodheshin më aty, Bashi ka arritur të dalë nga automjeti, duke marrë me vete edhe telefonin celular.

Por zona ku ndodhi atentati nuk kishte sinjal telefonik. Për këtë arsye, i plagosuri ka ecur për rreth 40 minuta në terren të vështirë malor, duke përshkuar afro dy kilometra në këmbë.

Telefonata

Sapo ka mbërritur në një lokal pranë kryqëzimit ku rruga e Pultit lidhet me atë të Shoshit, Bashi ka telefonuar një të afërm. Fjalët e para që ka thënë kanë qenë: “Na thavi, krahin”.

Më pas, ai ka treguar se si ndodhej në automjet me Prelë dhe Lekë Gjonin dhe se dy burrat kishin mbetur të vrarë në vend.

Bashi ka pastruar gjakun që i rridhte nga plagosja në një çezmë pranë lokalit dhe më pas ka pritur transportin drejt Spitalit Rajonal të Shkodrës.

Për shkak të humbjes së konsiderueshme të gjakut, ai është dërguar më pas drejt Spitalit të Traumës në Tiranë për trajtim më të specializuar. Aktualisht ndodhet jashtë rrezikut për jetën.

Policia ende pa autorë

Policia e Shkodrës dhe Prokuroria vijojnë hetimet për identifikimin e autorëve të vrasjes së dyfishtë dhe plagosjes.

Deri tani nuk ka një person të identifikuar si autor i ngjarjes. Efektivët kanë shoqëruar disa persona për t’i marrë në pyetje, por nuk ka ende të dhëna konkrete për përgjegjësinë e tyre.

Mes pistave kryesore të hetimit janë një divorc i Lekë Gjonit, rreth tre muaj më parë dhe një konflikt i ndodhur disa vite më parë.

Megjithatë, familjarët kanë deklaruar se nuk kanë dijeni për ndonjë konflikt të kohëve të fundit.

Prelë dhe Lekë Gjoni po ktheheshin nga banesa e tyre e vjetër në Dukagjin, ku mbanin edhe disa koshere bletësh, në drejtim të Shkodrës. Ata u zunë në pritë në rrugën e Xhanit.

Lekë Gjoni punonte me një kamion, duke transportuar materiale ndërtimi dhe një eskavator në zonën e Dukagjinit. Sipas informacioneve të bëra publike, ai nuk njihej si person problematik dhe lëvizte lirshëm në zonë.

Terreni i vështirë malor, mungesa e sinjalit telefonik dhe fakti që zona nuk është e monitoruar nga kamera sigurie e kanë vështirësuar ndjeshëm punën e hetuesve.

Policia dhe prokuroria po vijojnë mbledhjen e provave dhe marrjen në pyetje të personave që mund të kenë dijeni për ngjarjen, me synim zbardhjen e plotë të vrasjes së dyfishtë dhe identifikimin e autorëve.

The post Mbeti i plagosur nga atentati ku u vranë babë e bir në Dukagjin, zbardhet telefonat e personit të plagosur! Lazër Bashi eci 2 km në këmbë… appeared first on Albeu.com.

Sipas të dhënave paraprake, Florion Dalladaku, 45-vjeç, ka goditur nënën e tij, Florije Dalladaku, 80-vjeçe, dhe babain, Hasanin. Si pasojë e plagëve të marra, 80-vjeçarja ka humbur jetën.

Ndërkohë, babai i tij, Hasani, është transportuar me urgjencë në spitalin e Lushnjës në gjendje kritike për jetën. Për shkak të rëndimit të gjendjes shëndetësore, ai është nisur më pas drejt Spitalit të Traumës në Tiranë për mjekim të specializuar.

Pas ngjarjes, autori dyshohet se ka marrë automjetin e vëllait të tij dhe është larguar nga vendi i krimit. Ai është kapur më pas nga një patrullë e Policisë në Fier.

Policia po vijon hetimet për zbardhjen e plotë të rrethanave të ngjarjes dhe po merr në pyetje familjarët dhe të afërmit e 45-vjeçarit.

Sipas dëshmive të të afërmve, Florion Dalladaku, kurohej prej vitesh për probleme të shëndetit mendor dhe gjatë gjashtë viteve të fundit ka qenë dy herë i shtruar në Spitalin Psikiatrik të Elbasanit.

Po sipas informacioneve të bëra me dije nga të afërmit, vite më parë ai kishte tentuar të vriste me armë zjarri, tip çifte, një bashkëfshatar. Për këtë ngjarje, ai ishte dënuar nga drejtësia.

Hetuesit po punojnë për të dokumentuar dinamikën e plotë të krimit, ndërsa pritet që në vijim të dalin detaje të tjera mbi motivin dhe rrethanat që çuan në sulmin e rëndë brenda familjes.

The post Vrau nënën dhe plagosi babanë, Florion Dalladaku kishte tentuar të vriste dhe… appeared first on Albeu.com.

Ushtruesja e detyrës së presidentes, Albulena Haxhiu, ka reaguar pas vrasjes së një 25-vjeçareje në Malishevë.

Në një shkrim të publikuar në Facebook, Haxhiu tha se siguria e shoqërisë nuk mund të ekzistojë për aq kohë sa gratë nuk ndihen të mbrojtura as brenda shtëpive të tyre.

Ajo kërkoi që institucionet e drejtësisë ta hetojnë dhe zbardhin plotësisht këtë vrasje të rëndë, duke vepruar me përgjegjësinë që kërkon një rast i tillë.

Në reagimin e saj të plotë, Haxhiu u shpreh se vrasja e 25-vjeçares, e cila ndodhej në javën e 34-të të shtatzënisë, ka shkaktuar tronditje të thellë.

Sipas saj, dhuna nuk mund të mbulohet apo të justifikohet përmes familjes ose martesës. Ajo theksoi se, kur jeta e një gruaje vihet në rrezik, çështja nuk mund të trajtohet si private, por si përgjegjësi e përbashkët që kërkon reagim të menjëhershëm nga institucionet.

Haxhiu i shprehu gjithashtu ngushëllimet më të sinqerta familjes së të ndjerës për dhimbjen e madhe.

The post Haxhiu për vrasjen në Malishevë: Drejtësia duhet të hetojë në tërësi këtë rast të rëndë appeared first on Albeu.com.

Rihapja e çështjes vjen pas vendimit të Gjykatës së Apelit, e cila i ka ngarkuar organit të akuzës detyra të reja hetimore.

Në lidhje me këtë episod, në një seancë të zhvilluar në Gjykatën e Posaçme ka dhënë deklarime edhe i penduari i drejtësisë, Enver Jamaku. News 24 mëson se dëshmia e tij prek edhe vrasjen e Bilalit.

Jamaku ka rrëfyer për një bisedë me një person të identifikuar si Ad Bomi. Sipas tij, kishte shkuar te Xubi i Yzberishtit, emër me të cilin i referohet shtetasit Fatmir Avdillari, për të marrë një automjet që kishte rezultuar me problem shasie. Ndërmjetës për shitjen e mjetit ishte Ad Bomi.

“Kur kam takuar Xubin e Yzberishtit, Adi më ka thënë: ‘Mos i jep muhabet këtij lale, se ky është hasmi i Gjergj Cukalit, pasi Gjergji i ka vrarë shokun e tij Arben Bilali dhe vëllain e tij’”, ka deklaruar Jamaku.

I penduari i drejtësisë pretendon se e ka biseduar këtë çështje edhe në një rast tjetër me Ad Bomin, i cili, sipas tij, i ka përsëritur të njëjtin informacion.

Megjithatë, në dëshminë e dhënë në Gjykatën e Posaçme ai nuk ka sjellë hollësi të tjera për vrasjen e ish-policit.

Me rikthimin e dosjes për hetim, hetuesit mund ta marrin sërish në pyetje Jamakun për versionin e tij lidhur me ngjarjen dhe për mënyrën se si ka siguruar këto të dhëna.

Pak kohë më parë, Gjykata e Apelit shfuqizoi vendimin e shkallës së parë që kishte pushuar hetimet ndaj Cukalit dhe urdhëroi prokurorinë të hetojë të fortin e Myslim Shyrit, për akuzat e vrasjes me paramendim dhe armëmbajtjes pa leje.

Në vitin 2020, Gjykata e Tiranës, me kërkesë të prokurorisë, e pushoi procedimin ndaj Cukalit për mungesë provash. ADN-ja e zbuluar në një shishe plastike, e gjetur në automjetin e përdorur në vrasje, ishte konsideruar provë e pavlefshme.

Arben Bilali, ish-punonjës i Policisë, u vra në Selitë në vitin 2019. Më herët, ai kishte humbur edhe dy vëllezërit: Bujar Bilali u vra në vitin 1998, ndërsa Leonardi, ish-mundës i Dinamos, në gusht të vitit 2010.

The post Vrasja e ish-policit Arben Bilali, dëshmia e të penduarit që rëndon ndaj Gjergj Cukalit: Është hasmi i tij… appeared first on Albeu.com.

Për krimin makabër akuzohet bashkëshorti i saj, i cili është gjetur i plagosur në dhomën e tyre të gjumit, ndërsa ndodhet në gjendje të rëndë për jetën në spital.

Sipas informacioneve burri ka privuar nga jeta bashkëshorten e tij Jetlira Foniqi e moshës 25-vjeçare. Lidhur me rastin janë deklaruar edhe nga Policia e Kosovës.

Zëdhënësja e policisë për rajonin e Gjakovës, Vlera Krasniqi, deklaroi se njësitë policore kanë dalë menjëherë në vendin e ngjarjes, ku në një dhomë gjumi kanë gjetur dy persona të plagosur, një burrë dhe bashkëshortja e tij.

Gjithashtu, sipas njoftimit të QKUK-së, rreth orës 00:15 të datës 24 gusht 2026, në Qendrën Emergjente janë pranuar dy persona nga rajoni i Malishevës.

“Njëri prej personave të pranuar, femër, 25-vjeçare, ka arritur në Qendrën Emergjente pa shenja jete, me plagë të shkaktuara nga arma e zjarrit. Personi tjetër, mashkull, 26-vjeçar, është pranuar me plagë të shkaktuara nga arma e zjarrit dhe aktualisht është duke marrë trajtim mjekësor në Qendrën Emergjente. Gjendja e tij shëndetësore raportohet të jetë shumë e rëndë”, thuhet në njoftim.

Hetimet për zbardhjen e plotë të rrethanave dhe motivit të kësaj ngjarjeje janë duke vazhduar.

The post Krimi i rëndë në Kosovë/ Kjo është 25-vjeçarja që u vra me armë zjarri, dyshohet se u qëllua nga bashkëshorti i saj, ishte në javën e 34 të shtatzënisë appeared first on Albeu.com.

Fouristrada me të cilën ata po udhëtonin u bë shoshë nga plumbat.

Dy viktimat po ktheheshin nga shtëpia e vjetër në Dukagjin drejt Shkodrës kur ende pa dalë nga rruga e fshatit Xhan, dy shtetas të paidentifikuar qëlluan në drejtim të tyre duke lënë të vdekur babë e bir dhe duke plagosur një tjetër.

I plagosuri u dërgua në spitalin e Shkodrës dhe më pas drejt Tiranës për mjekim të specializuar, ndërsa ndodhet në gjendje jashtë rrezikut për jetën. Lazër Bashi, i shpëtoi mrekullisht këtij atentati ndërsa ndodhej në pjesën e pasme të fouristradës.

Menjëherë në vendngjarje mbërritën dhjetëra forca policie dhe efektivët e RENEA, duke nisur kontrolle në zonë për identifikimin e më pas gjetjen dhe kapjen e autorëve.

Policia ka konstatuar në vendngjarje mbi 50 gëzhoja plumbash ndërsa janë përdorur dy armë, një automatik kallashnikov dhe një MP5 duke konfirmuar se të paktën dy persona, kanë qëlluar në drejtim të fouristadës ku ndodheshin dy viktimat.

Deshmitë

Të afërmit e viktimave kanë treguar për policinë se Prelë dhe Lekë Gjoni nuk kishin konflikte dhe sipas tyre nuk kanë asnjë ide se kush mund të jenë autorët e vrasjes. Familjarët konfirmuan se një ditë para vrasjes babë e bir kishin shkuar në banesën e vjetër ku mbajnë disa bletë dhe se po ktheheshin normalisht drejt Grudës në Shkodër ku banojnë.

Hetimet

Dyshimet momentale të policisë për këtë vrasje janë tek divorci i 57 vjeçarit tre muaj më parë me bashkëshorten e tij me të cilën ka 4 fëmijë. Megjithatë ende nuk ka prova konkrete që e lidhin vrasjen me divorcin por kjo është pista ku grupi hetimor është fokusuar menjëherë pas vrasjes së dyfishtë.

Lekë Gjoni punonte me një kamion dhe ditët e fundit kishte ngarkuar materiale ndërtimi për një banesë në fshatin Gjuraj të Dukagjinit dhe po ashtu kishte edhe një eskavator bashkë me një shtetas tjetër të zonës që po ashtu punonin. Për policinë nuk njihej si person problematik ndërsa nuk ka informacione për konflikte të jashtme të mundshme.

Policia vijon hetimet bashkë me prokurorinë për zbardhjen e plotë të ngjarjes ndërsa lidhja e provave me autorët e mundshëm mbetet e vështirë për shkak të terrenit të thyer malor, mungesës së sinjalit telefonik atje dhe faktit që rrugët dhe pyjet nuk kanë monitorim nga kamera sigurie.

The post Dinamika e vrasjes së babë e bir në Dukagjin/ Autorët kanë qëlluar me dy armë zjarri! Pistat e hetimit appeared first on Albeu.com.

Arma e krimit, e cila dyshohet se u përdor nga Sokrat Vata tashmë është sekuestruar nga efektivët në cilësinë e provës materiale.

Gjykata e Sarandës, caktoi dy ditë më parë masën e sigurisë arrest me burg për 29-vjeçarin Vata.

Vetëm 6 minuta zgjati përleshja në Ksamil ku humbi jetën turisti portugez Luis Miguel Varela Mendez. Kamerat e sigurisë kanë dokumentuar të gjithë dinamikën e ngjarjes të ndodhur më 18 gusht. Fillimisht, disa turistë dalin nga lokali “Principotes”, ndërsa pak më vonë afrohen Sokrat Lipan, alias Vata, dhe David Heurtevent.

Përplasja nis me një shtyrje dhe përshkallëzohet me goditje fizike. Sokrat Vata, shihet duke ndjekur dhe goditur një prej personave, ndërsa më pas në konflikt përfshihet edhe Luis Mendes, i cili e shtyn 29-vjeçarin Vata. Përleshja vijon mes disa personave, ndërsa Mendes largohet me nxitim dhe futet në det.

Pak më vonë, ai del nga uji me bluzën e gjakosur dhe shkon drejt zonës së shezlloneve. Pamjet tregojnë gjithashtu për përplasje të tjera dhe persona që largohen nga vendi i ngjarjes.

Në 05:20:28, Sokrati largohet drejt “Principotes”, i shoqëruar nga një kamarier. I gjithë episodi, sipas kronologjisë së kamerave, zhvillohet brenda vetëm 6 minutash, ndërsa hetimet vijojnë për të zbardhur përgjegjësitë për vdekjen e turistit portugez.

Kronologjia

Në orën 05:14:24 të datës 18.08.2026 vërehen se nga ambientet e lokalit “Principodes vërehen se dalin disa shtetas dhe qëndrojnë tek dera e ambienteve të jashtme të subjektit “Paradise’, ku ndër ta janë të identifikuar shtetasit Ibrahim Lemoie, Sudae Akmahmat, Florian Cetina dhe Luis Mendes i veshur me një bluze të bardhe me një shkrim me ngjyrë të zezë nga mbas.

Në orën 05:15:22 të datës 18.08.2026 nga ana e parkimit në anën jugore te “Principotes” vërejmë që afrohen dy shtetas konkretisht Davit Heuertvent përpara dhe Sokrat Lipan (Vata), i veshur me të këmishë të bardhë, në vendin ku ndodheshin shtetasit e huaj.

Në orën 05:16:39 shtetasi Sokrat Lipan (Vata), vërehet se shtyhet me një person të veshur me bluze me ngjvrë të bardhe dhe Sokrati vërehet se largohet prej atu dhe shkon në drejtim të shezlloneve.

Në orën 05:16:47 shtetasi Sokrat Lipan ndjek një nga personat i cili është i veshur me të bardha dhe Sokrati i ndjek nga mbas në drejtim të parkimit.

Në orën 05:16:54 shtetasi Sokrat Lipan (Vata), vërehet se vjen me vrap në drejtim të shtetasit Ibrahim Lemoie, i cili përplaset në shezllone dhe bie në tokë dhe Sokrati e godet në drejtim të tij.

Në orën 05:17:14 në këto momente afrohet shtetasi Luis Mendes dhe shtyn me trup shtetasin Sokrat Lipan, i cili bie në tokë. Shtetasi Sokrat Lipan (Vata), ngrihet nga toka dhe i afrohet shtetasit Luis Mendes dhe fillon dhe godet në drejtim të tij.

Në orën 05:17:20 shtetasi Davit Heuertventi veshur me tuta të shkurtra dhe një si në këmishë me ngjvrë të errët së bashku me shtetasin Sokrat Lipan (Vata), godasin shtetasin Luis Mendes dhe gjatë kësaj kohe vjen shtetasi Sudae Akhmat pet të ndihmuar shokun e tij shtetasin Luis Mendes dhe godet shtetasin Sokrat Lipan.

Në orën 05:17:35-05:17:46 shtetasi Serxhi Selimi godet shtetasin francez Ibrahim Lemoie me grushte, gjatë kësaj kohe shtetasi Luis Mendes për t’u larguar nga goditjet qe po merrte nga Sokrat Lipan dhe David Heurtevent largohet me nxitim futur brenda në det.

Në orën 05:17:53 shtetasi Luis Mendes afrohet nga ana jugore e plazhit ne vendin ku ndodhen kamarieret dhe goditet nga shtetasi Serxhi Ademi me grushte dhe e ata e shtynë në det.

Në orën 05:18:04 shtetasi Luis Mendes del nga uji dhe ecën në drejtim të shezllonave të plazhit “Paradise” ku vërehet se bluzën e bardhë e ka të gjakosur.

Në orën 05:18:24 shtetasi David Heuertvent vërehet se largohet në drejtim ambienteve të brendshme të Principotes, I cili dallohet që është i gjakosur tek pjesa e përparme e rrobave dhe po fshihet.

Në orën 05:20:28 largohet shtetasi Sokrat Lipan alias Vata i cili bluzën e bardhë e ka të gjakosur dhe mbas tij është kamerieri, Igli Cekani që e shoqëron nga pas në drejtim të lokalit “Principotes”.

Personat e përfshirë 
1. Sokrat Lipan alias Sokrat Vata – autori i dyshuar i krimit, i arrestuar.
2. Nuh Mahmutoglu – shtetas turk, i arrestuar; dyshohet se ndihmoi autorin në tentativën për t’u arratisur.
3. Ezgi Perlak – shtetase turke, e arrestuar; dyshohet se ndihmoi autorin në tentativën për t’u arratisur.
4. Serxhi Selimi – kamerier në lokal.
5. Ervis Bunci – kamerier në lokal.
6. Ildi Cekani – kamerier në lokal.
7. Murat Zhabina – kamerier në lokal.
8. Miosid Matushaj – oficer i Policisë në Gjirokastër; i arrestuar,
9. Luciano Seferi – punonjës i Policisë së Burgjeve në Fier; i arrestuar
10. Romeo Shehu – polic bashkiak në Gjirokastër; i arrestuar dhe i pezulluar nga detyra.
11. Kristi Koshi – i arrestuar
12. David Heurtevent – klient në lokal, i shpallur në kërkim si bashkëpunëtor në krim.
13. Bekim Bulica – pronar i lokalit, i shpallur në kërkim për fshehjen e krimit.

The post Vrasja e 21-vjeçarit në Ksamil, gjendet arma me të cilën Sokrat Vata kreu krimin appeared first on Albeu.com.

Dyshimet e bërë janë për një akt vrasje nga ana e burrit, i cili mendohet se ka pritur të gruan 45-vjeçare që të dalë nga pallati dhe pas një debati, ai e ka qëlluar, duke e lënë të vdekur. Më pas, burri ka qëlluar me armë edhe veten në kokë.

Fqinjët kanë deklaruar se kanë dëgjuar 3 të shtëna me armë zjarri, me një diferencë disa sekonda nga njëra-tjetra.

“Isha duke fjetur në shtëpi, por nuk isha në gjumë të thellë. Papritmas dëgjuam 3 zhurma shumë të forta, për të cilat nuk e dinim nëse ishin të shtëna me armë zjarri.

Ata nuk reagonin, pati një hendek prej disa sekondash. Pas pak u dëgjua sirena e makinës së patrullës. Nuk e kuptova çfarë ndodhi. Nuk më shkoi ndërmend se ishte një e shtënë me armë zjarri”, përshkruan ngjarjen një banor i pallatit.

Ndonëse identifikimi zyrtar po përmbyllet, autoritetet bëjnë me dije se bëhet fjalë për dy shtetas me origjinë shqiptare të moshës midis 35 dhe 45-vjeç, të cilët nuk ishin të martuar.

Viktima 45-vjeçare nuk jetonte në atë ndërtesë, por kishte shkuar për të vizituar vajzën e saj që banon aty. Oficerët e hetimit të vrasjeve po vlerësojnë provat materialet, analizat balistike dhe gjetjet mjeko-ligjore për të sqaruar plotësisht historinë e marrëdhënies mes tyre dhe motivet e kësaj tragjedie.

Autoritetet kanë sekuestruar pamjet filmike, të cilat kanë fiksuar të gjithë skenën dhe po hetojnë për të zbardhur rrethanat e ngjarjes.

The post Krimi i dyfishtë në Greqi/ Vrau partneren dhe më pas veten, burri i kishte zënë “pritë” 45-vjeçares shqiptare, zbardhen dëshmitë e fqinjëve appeared first on Albeu.com.

Sipas dëshminë në dosjen e siguruar nga gazetarja Klodiana Lala, shtetasi francez Ibraim Leimoeiv, ka deklaruar se kanë qenë duke festuar te “Principote” dhe më pas kanë dalë jashtë për të qëndruar tek shezlonget.

Ai ka dëshmuar po ashtu se një person u është afruar, duke i ofenduar nga nëna dhe më pas ka goditur njërin prej të pranishmëve aty me kokë.

Turisti ka treguar se më pas kanë shkuar edhe persona të tjerë që janë përfshirë në konflikt. Ai e ka identifikuar Sokrat Vatën si autor, për të cilin thotë se i është drejtuar një miku me thikë dhe më pas ka goditur Miguelin.

Turisti po ashtu, theksoi se ka tentuar që t’i japë mikut të tij ndihmën e parë, duke i vendosur bluzën te plaga, por i riu nuk mundi të mbijetojë.

“Ishim të gjithë së bashku. Aty ka ardhur një person i cili ishte i veshur me pantallona të shkurtra dhe bluzë me mëngë të shkurtra ngjyrë gri i cili fliste pak frëngjisht. Ai na thotë qetësohuni ose do të q* nënën, ndërsa më pas goditi me kokë shokun tim Tourpal. Ne u përfshimë në konflikt. Gjatë konfliktit erdhën dhe persona të tjerë dhe kam parë një person i veshur me ngjyrë bezhë në të bardhë me flokë të gjata gështenjë me pak mjekër i cili ju drejtua Tourpalit me thikë dhe më pas ju drejtua Louis Miguel. Aty ka pasur shumë lëvizje e persona dhe nuk e kam parë momentin kur ka goditur Louis Miguel. Unë më pas i kam dhënë ndihmën e parë shokut tim duke i vendosur një bluzë të plaga”, tha ai.

Po ashtu, edhe turisti francez, pasi ka parë foton, e ka identifikuar Sokrat Vatën si autor.

The post Vrasja e 20-vjeçarit në Kasmil/ Flet miku i viktimë s: Gjatë sherrit, erdhën dhe persona të tjerë, u mundova t’i jap ndihmën e parë appeared first on Albeu.com.