Kjo masë sigurimi është kërkuar nga prokuroria, pasi ndaj Keqit deri në këtë fazë të hetimit është ngritur akuza e “Vrasjes në rrethana cilësuese” në dëm të Saimir Jakut dhe “Plagosjen e rëndë me dashje” ndaj shtetasit Gjergj Prenga.

Vrasja ka ndodhur në shtator të vitit 2016 në Rrëshen, por 6 vjet nga krimi i rëndë, policia pretendon se ka identifikuar një nga autorët.

Sipas burimeve të policisë dhe prokurorisë gjurmët e gishtave të Dorian Keqit, janë fiksuar në një kuti shkrepëse dhe një bidon me benzinë, sende këto që janë konstatuar disa metra larg vendit ku policia gjeti makinën e djegur, të përdorur në vrasjen e Jakut.

Gjatë marrjes në pyetje, Dorian Keqi i ka thënë policisë se ai nuk kishte lidhje me ngjarjen dhe se gjatë gjithë kohës ka punuar si punëtor krahu, që bën mure dhe llaç.

Keqi nuk ka pranuar autorësinë e krimit, megjithëse gjurma e gishtit e tij, ka dalë në bidonin e benzinës dhe në kutinë e shkrepëses. Dy sende këto që kanë shërbyer për zjarrvënien dhe djegien e makinës së përdorur në krim.

Më tej Keqi, u ka kërkuar hetuesve që ta linin të lirë, pasi nuk kishte asnjë lidhje me ngjarjen e vrasjes dhe se vetë ai nuk kishte qënë asnjëherë në jetën e tij në atë zonë.

Pavarësisht pretendimeve të tij, prokuroria i është drejtuar gjykatës së qytetit të Lezhës, duke kërkuar caktimin e masës së sigurisë “arrest në burg” ndaj Dorian Keqit nga Kruja./Oranews/

The post Dorian Keqi mohon përfshirjen në vrasjen e Saimir Jakut: Nuk kam lidhje, punoj me llaç e tulla appeared first on Albeu.com.

Burime bëjnë me dije se Keqi u ndalua dje pranë Gjykatës së Lezhës, teksa drejtonte mjetin në gjendje të dehur.

Në momentin që i kanë marrë shenjat e gishtave, u verifikua që këto shenja ndodheshin dhe tek shishja me benzinë kur u dogj Benzi i atentatorëve të Jakut.

Kujtojmë se ngjarja ka ndodhur në vitin 2016, ku ish-drejtori i Tensionit të Lartë për Veriun u ekzekutua në Rrëshen./albeu.com/

The post DETAJET/ U kap “tap” në timon, si u arrestua vrasësi i Saimir Jakut appeared first on Albeu.com.

Në lidhje me ngjarjen e rëndë që ndodhi më 9 shtator të vitit 2016 në Mirditë, u arrestua Dorjan Keqi.

Gjithashtu burime zyrtare bënë me dije se në banesën e vrasësit me pagesë, u gjetën dhe sekuestruan në cilësinë e provës materiale 21 aparate celulare dhe 6 mbajtëse të kartave SIM.

Detajet u bënë me dije nga drejtori i Drejtorisë Vendore të Policisë Lezhë Drejtues i Parë Vehbi Bushati, në konferencë për shtyp.

Deklarata e Policisë së Lezhës:

Jemi sot këtu për t’ju komunikuar rezultatet e operacionit policor të koduar “GJURMA”, të zhvilluar nga Drejtoria Vendore e Policisë Lezhë, në bashkëpunim të ngushtë me Prokurorinë pranë Gjykatës së Rrethit Gjyqësor Lezhë, për zbardhjen e ngjarjes së ndodhur në vitin 2016, në Mirditë, ku mbeti i vrarë një shtetas dhe u plagos një tjetër.

Strukturat e Hetimit në Drejtorinë Vendore të Policisë Lezhë, në vijim të punës për zbardhjen dhe dokumentimin me prova ligjore të ngjarjeve kriminale të ndodhura në qarkun Lezhë, në bashkëpunim të ngushtë me Prokurorinë e Rrethit Lezhë, si rezultat i veprimeve të thelluara hetimore dhe profesionale, bënë të mundur dokumentimin me prova ligjore të ngjarjes së ndodhur më datë 9 shtator 2016, në Rrëshen, ku u vra me armë zjarri shtetasi Saimir Jaku dhe u plagos shtetasi Gjergj Prenga.

Si rezultat i të gjitha veprimeve hetimore të kryera dhe bashkëpunimit intensiv me Institutin e Policisë Shkencore, për ekzaminimet laboratorike të provave të sekuestruara në vendngjarje, si dhe marrjes së çdo dëshmie të mundshme me interes për hetimin, vlerësimit të çdo informacioni, për identifikimin e autorit/ëve dhe zbardhjen e ngjarjes, strukturat hetimore të DVP Lezhë zhvilluan operacionin policor të koduar “GJURMA”, në kuadër të të cilit u bë kapja dhe ndalimi i shtetasit D. K., 40 vjeç, lindur në Kurbin dhe banues në Krujë.

Në kuadër të hetimeve të kryera nga strukturat hetimore të DVP Lezhë, në bashkëpunim me Prokurorinë, bazuar në provat e grumbulluara, Prokuroria pranë Gjykatës së Rrethit Gjyqësor Lezhë nxorri urdhër ndalimi për këtë shtetas, për veprat penale “Vrasja në rrethana të tjera cilësuese”, kryer në bashkëpunim dhe “Prodhimi dhe mbajtja pa leje e armëve luftarake e municionit”.

Ky shtetas, në bashkëpunim me shtetas të tjerë, dyshohet se e ka kryer krimin e vrasjes së shtetasit Saimir Jaku, kundrejt pagesës. Porositësit e vrasjes dyshohet të jenë një grup i strukturuar kriminal që vepron në qarkun Lezhë, tashmë të identifikuar dhe nën hetim nga ana e Policisë. Për shkak të cilësisë së hetimit dhe të ruajtjes së sekretit hetimor, nuk mund të bëjmë publike të dhëna të tjera për këtë çështje.

Gjatë kontrollit të ushtruar në banesën e shtetasit të ndaluar D. K., në kuadër të operacionit policor “GJURMA”, janë gjetur dhe sekuestruar në cilësinë e provës materiale 21 aparate celulare dhe 6 mbajtëse të kartave SIM.

Vazhdojnë hetimet për dokumentimin e plotë e ligjor të kësaj ngjarjeje.

Nga ana tjetër, strukturat e DVP Lezhë, në koordinim me strukturat hetimore në Drejtorinë e Përgjithshme të Policisë së Shtetit, në bashkëpunim me Prokurorinë pranë Gjykatës së Rrethit Gjyqësor Kurbin, po punojnë intensivisht për zbulimin e dokumentimin ligjor të ngjarjes së rëndë të ndodhur më datë 22 korrik 2022, në Milot.

Policia e Lezhës shpreh vendosmërinë e saj në luftën pa kompromis ndaj krimit, duke përdorur të gjitha kapacitetet e saj dhe duke bashkëpunuar ngushtë edhe me institucionet e tjera ligjzbatuese, për identifikimin dhe vënien përpara përgjegjësisë ligjore të autorëve të krimeve të kryera, si dhe ndërhyrjen për parandalimin e ngjarjeve të tjera të mundshme kriminale.

Përfitoj nga rasti të ftoj të gjithë qytetarët, që të mbështesin akoma më shumë dhe të bashkëpunojnë me Policinë, për të denoncuar çdo paligjshmëri, duke iu garantuar anonimat të plotë, reagim të menjëhershëm e të paanshëm./albeu.com/

The post U pagua për ekzekutimin e ish-drejtorit, çfarë u gjet në banesën e vrasësit me pagesë appeared first on Albeu.com.