Bashkimi Evropian vazhdon të kërkojë që përgjegjësit për sulmin në Banjskë të përballen me drejtësinë, duke e mbajtur këtë çështje si një kërkesë të pandërprerë ndaj Serbisë.

Në konkluzionet e Këshillit të BE-së, sulmi në Banjskë dënohet në mënyrë të përsëritur, ndërsa shprehet keqardhje e thellë që Serbia ende nuk ka ndërmarrë masa të mjaftueshme për t’i çuar autorët para drejtësisë dhe kërkohet llogaridhënie.

Edhe nga Zyra për Shtyp e Komisionit Evropian është përsëritur i njëjti qëndrim, sipas të cilit shprehet keqardhje që Serbia ende nuk ka bërë hapat e nevojshëm për t’i sjellë para drejtësisë përgjegjësit për sulmin në veri të Kosovës në vitin 2023.

Ndërkohë, BE-ja nuk ka dalë me reagim ndaj informacioneve të fundit që pretendojnë se personat përgjegjës për sulmin në Banjskë mbrohen nga struktura zyrtare në Serbi.

Po ashtu, mungon një reagim zyrtar edhe për hulumtimin e Radios Evropa e Lirë, ku identifikohen dy pjesëtarë të Xhandarmërisë së Serbisë, të përmendur si pjesë e sigurimit të Zvonko Veselinoviqit dhe Millan Radoiçiqit. Ky hulumtim mbështetet në analizë fotografish, burime të hapura dhe gjurmë publike që i lidhin ata me njësinë speciale të policisë.

Nga ana tjetër, presidenti i Serbisë ka hedhur poshtë pretendimet se ata mbrohen nga pjesëtarë të strukturave shtetërore serbe, ndërsa në të njëjtën kohë ka thënë se Millan Radoiçiq nuk është kriminel.

The post BE-ja rithekson zhgënjimin për mungesën e hapave të Serbisë në rastin Banjska appeared first on Albeu.com.