Pas disa javësh bisedimesh intensive mes palëve, Vokli Laroshi dhe klubi i Llapit nuk kanë gjetur gjuhën e përbashkët për rinovimin e kontratës. Portieri 23-vjeçar pritet të largohet zyrtarisht nga skuadra podujevase, duke mbyllur kështu një kapitull të rëndësishëm në karrierën e tij.

Gjatë dy sezoneve me Llapin, nuk munguan paraqitjet e tij pozitive, përpos moshës së re mbi supe. Ai jo vetëm që u dallua për pritjet vendimtare, por dhe per mbajtjen e portës të paprekur për më shumë se 630 minuta lojë.

Kontributi i tij ishte thelbësor në ecurinë e ekipit, prandaj dhe këmbëngulja e interesimi i drejtuesëve të Llapit ishte që të rinovonin përsëri me Laroshin, por pa rezultat, duke mbyllur në këtë mënyrë edhe bashkëpunimin mes palëve.

INTERESIMET – Vokli Laroshi është një nga emrat më të përfolur në merkato këtë verë. Pas përfundimit të kontratës me skuadrën e Llapit në Kosovë, 23-vjeçari tashmë është lojtar i lirë dhe ka të drejtë të firmosë me çdo ekip. Interesimi për të ka qenë i menjëhershëm: ekipe nga Superliga e Kosovës kanë shprehur interes konkret, si: Gjilani, Prishtina e Re, Drenica apo Vllaznimi, ndërsa dy skuadra nga Superliga shqiptare gjithashtu kanë hyrë në garë për firmën e tij. Portieri konsiderohet si një nga alternativat më të sigurta për skuadrat që kërkojnë stabilitet në prapavijë.

E ARDHMJA – Me statusin e lojtarit të lirë dhe moshën e re që e favorizon, Laroshi pritet të vendosë për të ardhmen e tij në ditët në vijim. Vendimi do të varet jo vetëm nga ana financiare, por edhe nga garancitë sportive që do t’i ofrojnë klubet. Dëshira e tij është të luajë në një ambient ku mund të zhvillohet më tej dhe të jetë protagonist, duke mos përjashtuar as mundësinë e një transferimi jashtë Shqipërisë dhe Kosovës në të ardhmen e afërt. Për Vokli Laroshin, vera 2025 është një pikë kthese në karrierë. Me përvojë të fituar në të dy kampionatet dhe me një profil që po rritet çdo sezon, portieri pritet të jetë një nga lëvizjet më interesante të kësaj merkatoje. Zgjedhja e duhur mund ta çojë drejt një sezoni edhe më të suksesshëm, ndaj po shqyrton me kujdes ofertat.

The post Portieri Vokli Laroshi i Llapit nuk rinovon dhe eshte ne kerkim te nje ekipi tjeter appeared first on Albeu.com.

Kërkesat më të larta janë zakonisht për portën, duke qenë se mundësitë janë të kufizuara. Pjesa më e madhe e skuadrave synojnë që së pari të sigurojnë gardianin dhe më pas të shohin për rolet e tjera në fushë.

Një nga portierët që ka nisur të lakohet në mbyllje të këtij kampionati është edhe 23- vjeçari nga Cërriku, Vokli Laroshi, ndaj të cilit kanë nisur ofertat nga disa skuadra.

MERKATO – Me mbylljen e këtij sezoni, Laroshit i ka përfunduar edhe kontrata me skuadrën e Llapit, me të cilët luajti për dy sezone e gjysmë. Ai tani është një lojtar i lirë dhe ish-portierit të Shpresave, ka disa oferta për të vijuar karrierën.

Për momentin, 23-vjeçari është mes Kosovës dhe Shqipërisë, ku disa skuadra janë interesuar për shtatlartin cërrikas, të cilët duan ta afrojnë. Mbetet për t’u parë e ardhmja e Laroshit, i cili duket ka arritur edhe pjekurinë maksimale në futbollin profesionist.

KARRIERA – Karriera e Vokli Laroshit ka ardhur gradualisht në rritje, duke e provuar nga kategoritë më të ulëta, ku edhe arriti të marrë eksperiencën që i duhej dhe deri në elitën e futbollit shqiptar dhe atij kosovar. I dalë nga moshat e Shkëndisë, ai u afrua që në moshë të vogël në ekipin e Turbinës në Kategorinë e Parë, duke marrë madje shiritin e kapitenit dhe kontribuar për realizimin e objektivave të skuadrës së tij.

Paraqitjet mbresëlënëse të tij ranë në sy të ekipit të Partizanit, i cili e afroi menjëherë në skuadrën e parë, duke besuar në cilësitë e gardianit cërrikas. Pas një rikthimi të shkurtër sërish te Turbina, Laroshi provoi një aventurë në Kosovë me skuadrën e Llapit, ku qëndroi për dy sezone e gjysmë.

REKORDI – Në Kosovë, Laroshi u kthye në protagonist, ku edhe pse në një kampionat të ri dhe të rivalizuar, arriti të tregojë vlerat e tij dhe të thyejë madje rekorde. Ai u aktivizua në 16 ndeshje, duke mbajtur portën të paprekur në plot 7 takime radhazi ose 630 minuta.

Gjatë kampionatit, ai është zgjedhur në disa javë edhe në formacionin më të mirë të javës, në sajë të performancës së tij në mbrojtjen e portës së Llapit. Tregues ky i cilësive të cërrikasit, që la përshtypjet më të mira në elitën e futbollit kosovar dhe duke e kthyer në një nga gardianët më të lakuar në këtë merkato vere.

SHPRESAT – Laroshi mund të jetë ndryshe edhe një rast unikal sa i përket grumbullimit të tij në Kombëtaren e 21-vjeçarëve. Nëse në atë periudhë të gjithë lojtarët e grumbulluar nga Alban Bushi militonin në skuadra jashtë vendit apo tek ato elitaret në Shqipëri, Laroshi ishte pjesë e ekipit të Turbinës.

Pra, ishte i vetmi që militonte në Kategorinë e Parë dhe ia doli që me performancën e tij me ekipin modest të Turbinës, të merrte ftesë për disa ndeshje nga Kombëtarja e Shpresave të Shqipërisë. /Mariglen Miraka/

The post Theu rekord në Kosovë, ish portieri i Kombëtares U-21 të Shqipërisë Vokli Laroshi në qendër të merkatos appeared first on Albeu.com.