Trupi Gjykues i Dhomave të Specializuara në Hagë e dënoi Kadri Veselin me 18 vjet burgim. Aktgjykimi u shpall më 16 shtator 2026, në kuadër të vendimit për katër ish-krerët e UÇK-së.

Pas këtij vendimi ka reaguar Ismet Veseli, vëllai i ish-kryetarit të Kuvendit të Kosovës.

Ai e cilësoi vendimin si jo të mirë, por tha se familja duhet ta pranojë atë.

“Vendimi nuk ishte i mirë, por çfarë të bëjmë, duhet të pajtohemi. Ishalla nuk na ka dënuar Zoti”, u shpreh Ismet Veseli.

Sipas tij, edhe vetë procesi gjyqësor nuk ka qenë i drejtë ndaj tyre.

“Për këtë gjyq po shihet, për neve nuk është i drejtë, pra ai, Trupi Gjykues, e ka bërë të vetën”, deklaroi ai.

Veseli theksoi se familja e tij e sheh veten si viktimë, ndërsa pretendoi se ndaj tyre është vepruar në mënyrë të padrejtë.

“Ne jemi si gjithë, viktima, por anasjelltas ne na kanë fajësuar si gjithmonë, padrejtësisht”, përfundoi ai.

The post Vëllai i Kadri Veselit: Procesi nuk ishte i drejtë, duhet ta pranojmë vendimin appeared first on Albeu.com.

Më pak se 24 orë para seancës ku pritet të shpallet verdikti ndaj Hashim Thaçit, Kadri Veselit, Rexhep Selimit dhe Jakup Krasniqit, ka reaguar Arian Krasniqi, nipi i këtij të fundit.

Përmes një reagimi, ai e ka cilësuar Kosovën si të ndodhur përballë një momenti vendimtar për një pjesë të rëndësishme të historisë së saj.

Arian Krasniqi ka theksuar se lufta për liri dhe barazi ishte e drejtë dhe u krijua nga vuajtjet e sakrificat e popullit, duke nënvizuar se ajo nuk duhet të vendoset në të njëjtin plan me agresionin serb. Sipas tij, shqiptarët e Kosovës ishin viktima dhe kërkonin lirinë, dinjitetin dhe të drejtën për të jetuar të lirë. Ai shprehu shpresën që historia e popullit të ruhet ashtu siç njihet nga bota dhe siç është përjetuar nga një popull i tërë.

“Sot, me shpresë dhe besim, presim aktgjykimin. Le të mbetet e paprekur e vërteta e historisë sonë”, ka shkruar ai.

The post Nipi i Jakup Krasniqit: Kosova pret vendimin përfundimtar, historia e saj të mbetet e pandryshuar appeared first on Albeu.com.

Analisti Agim Vuniqi ka analizuar zhvillimet e fundit politike në Kosovë, duke u ndalur veçanërisht te tensionet brenda Lidhjes Demokratike të Kosovës.

Në një prononcim për “Bota sot”, ai thekson se kriza e tanishme në këtë parti buron nga përplasja mes drejtuesit të saj, Lumir Abdixhiku, dhe një grupi prej gjashtë ligjvënësish që nuk pranuan të mbështesnin kandidatin e dakordësuar, Bekim Sejdiu.

Sipas Vuniqit, Abdixhiku ka treguar gatishmëri për kompromis për të kapërcyer bllokimin institucional, por tani sfida më e madhe vjen nga përçarjet brenda grupit parlamentar të LDK-së.

“Kjo përfaqëson një nga krizat më të thella të brendshme dhe institucionale në historinë e afërt të LDK-së. Ajo nxjerr në pah konfliktin ndërmjet autoritetit të kryetarit, respektimit të disiplinës partiake dhe parimeve të demokracisë së brendshme. Kundërshtimi i hapur i gjashtë deputetëve — Avdullah Hoti, Hykmete Bajrami, Arben Gashi, Armend Zemaj, Kujtim Shala dhe Janina Ymeri — ndaj emrit konsensual Bekim Sejdiu, pavarësisht se Kryesia e kishte miratuar unanimisht, nxjerr në pah disa çështje thelbësore,” deklaroi ai.

Abdixhiku çlirohet nga akuza e bllokadës

Vuniqi vëren se ky zhvillim tregon qartë se Lumir Abdixhiku ka ndërmarrë hapa të mëdha kompromisi për të zgjidhur ngërçin institucional në Kosovë, duke hequr dorë nga çdo post qeveritar dhe nga pretendimi për të udhëhequr Presidencën si përfaqësues i partisë. Marrëveshja e tij me Albin Kurtin për një kandidat jopartiak e paraqet atë si një lider që synon ndërtimin. Sipas tij, fakti që pengesa erdhi nga brenda grupit parlamentar dëshmon se problemi i vërtetë për formimin e institucioneve pas dy cikleve zgjedhore radhazi (2025 dhe 2026) nuk ishte udhëheqja e partisë, por fraksioni i brendshëm i këtyre gjashtë deputetëve.

Ai shton se qëndrimi i vazhdueshëm kundërshtues i këtij grupi ndaj vendimeve të partisë po minon autoritetin e Kryesisë dhe të vetë Abdixhikut. Refuzimi i marrëveshjes, sipas tij, mund të zhvendosë përgjegjësinë e dështimit nga Lëvizja Vetëvendosje te LDK, dhe në skenarin e zgjedhjeve të reja, kjo do t’i jepte një avantazh politik Vetëvendosjes.

Kontradikta e deputetëve që sfidojnë partinë dhe kërkesa për “Këshill të Përgjithshëm”

Në teorinë dhe praktikën parlamentare, votimi kundër linjës zyrtare të partisë është i njohur, por kur ky kundërshtim bëhet i përhershëm dhe bllokon vendime jetike për shtetin, lind pyetja legjitime: pse garohet me logon e një force politike nëse nuk respektohet vullneti i shumicës brenda saj? Këmbëngulja e këtij grupi për thirrjen e Këshillit të Përgjithshëm për çdo hap operacional cenon drejtpërdrejt funksionin e Kryesisë dhe të Kryetarit.

Sipas standardeve të një partie moderne, nëse Kryetari ka dëshmuar aftësinë për t’i mbijetuar sfidave të brendshme dhe votave të mosbesimit (siç ndodhi në Kuvendin e Jashtëzakonshëm të korrikut 2026, ku ai rikonfirmoi legjitimitetin e tij), atëherë vendimet e strukturave ekzekutive duhet të jenë detyruese për të gjithë grupin parlamentar.

Pastrimi i VV-së nga faji dhe kërcënimi i zgjedhjeve të reja

“Nga ana strategjike, duke refuzuar këtë marrëveshje, ky grup deputetësh po ia kalon barrën e përgjegjësisë për dështimin e procesit nga Vetëvendosja — e cila ka pasur vonesat dhe lojën e saj në këtë rrjedhë — te vetë LDK. Nëse shkohet në zgjedhje të reja (të katërtat në më pak se dy vite), koston e krizës dhe të lodhjes së qytetarëve do ta mbajë sërish opozita, duke i dhënë VV-së një armë të fuqishme elektorale për të fajësuar ‘sabotatorët’ brenda LDK-së,” shpjegon ai.

Në fund, Vuniqi e sheh LDK-në përballë një vendimi kritik: ose të vazhdojë me përçarjet e brendshme, ose të realizojë reforma dhe të forcojë disiplinën partiake.

Ai thekson se në rast të zgjedhjeve të jashtëzakonshme, këta gjashtë deputetë duhet të përballen me peshën e tyre reale politike, jashtë ombrellës së listës së LDK-së.

Fati i grupit rebel dhe domosdoshmëria e pastrimit të listave

“Ultimatumi i Abdixhikut për dorëzimin e mandateve nga këta gjashtë deputetë tregon se durimi politik ka marrë fund. Në demokracitë e konsoliduara perëndimore, deputetët që sfidojnë hapur vendimet thelbësore të strukturave drejtuese përjashtohen ose nuk u jepet më hapësirë në listat e ardhshme zgjedhore. Nëse vendi shkon në zgjedhje të parakohshme, e vetmja rrugë për të ruajtur kohezionin e LDK-së është:

Ose t’i përjashtojë ata nga listat zyrtare të partisë, duke mos i lejuar të përfitojnë vota nën stemën që ata vetë e kundërshtojnë.

Ose t’i detyrojë të konkurojnë si listë e pavarur apo subjekt i ri, në mënyrë që të masin mbështetjen e tyre të vërtetë përballë elektoratit tradicional të LDK-së.

Kjo situatë tregon se LDK gjendet në një udhëkryq ku duhet të zgjedhë midis mbajtjes së një ‘uniteti fiktiv’ që e mban partinë peng, ose reformimit të dhimbshëm përmes vendosjes së një disipline të rreptë partiake, për të siguruar që vendimet e shumicës të jenë absolute,” përmbylli ai.

The post Revolta e gjashtë deputetëve trondit LDK-në, Vuniqi paralajmëron rrezik për unitetin e partisë appeared first on Albeu.com.

Për sezonin 2026/2027, Kategoria e Dytë do të luhet në dy grupe. Grupi A do të ketë 12 skuadra, ndërsa Grupi B do të përbëhet nga 11 ekipe. Duke qenë se në sezonin 2027/2028 si “Abissnet Superiore” ashtu edhe Kategoria e Parë do të kenë nga 12 skuadra secila, është vendosur që katër ekipe të ngjiten direkt.

Në Kategorinë e Parë do të kalojnë automatikisht dy skuadrat e para të Grupit A dhe dy skuadrat e para të Grupit B.

Vendet e tjera që japin të drejtën e pjesëmarrjes në Kategorinë e Parë do të përcaktohen përmes fazës play-off. Nga Grupi A, fituesi i kësaj faze do të ndeshet me skuadrën e renditur në vendin e nëntë të Kategorisë së Parë, ndërsa nga Grupi B fituesi do të përballet me ekipin e vendit të dhjetë të Kategorisë së Parë.

Në play-off do të përfshihen skuadrat që e mbyllin kampionatin në vendet 3, 4, 5 dhe 6 në secilin grup.

Skema e miratuar parashikon që ekipi i vendit të tretë të luajë ndaj atij të vendit të gjashtë, ndërsa skuadra e katërt të përballet me të pestën. Të gjitha këto duele do të zhvillohen me një ndeshje të vetme në fushën e ekipit të pozicionuar më lart në renditje.

Sa u përket ndeshjeve play-out të Kategorisë së Parë, ato do të luhen në një fushë asnjanëse të caktuar nga FSHF.

Për rënien nga Kategoria e Dytë në sezonin 2026/2027, skuadrat që mbyllin renditjen në vendin e fundit në Grupin A dhe në Grupin B do të zbresin automatikisht në Kategorinë e Tretë.

Nga ana tjetër, skuadra e pozicionuar në vendin e 11-të në Grupin A dhe ajo e renditur në vendin e 10-të në Grupin B do të luajnë një ndeshje play-out në fushë të përcaktuar nga FSHF. Ekipi fitues do të sigurojë qëndrimin në Kategorinë e Dytë.

Skuadra që do të humbasë këtë përballje do të zhvillojë më pas një tjetër ndeshje vendimtare me humbësen e finales së vendeve të treta të Kategorisë së Tretë, për të përcaktuar ekipin që do të marrë pjesë në Kategorinë e Dytë në sezonin pasardhës.

Edhe për sezonin 2027/2028, Kategoria e Dytë do të organizohet në dy grupe, por këtë herë me nga 12 skuadra në secilin, si në Grupin A ashtu edhe në Grupin B.

Në këtë edicion, ngjitjen direkte në Kategorinë e Parë do ta sigurojë vetëm skuadra fituese e secilit grup.

Në fazën play-off të këtij sezoni do të marrin pjesë ekipet e renditura në vendet 2, 3, 4 dhe 5 në secilin grup. Fituesi i play-off-it të Grupit A do të ndeshet me skuadrën e tretë nga fundi të Kategorisë së Parë, ndërsa fituesi i Grupit B do të luajë kundër ekipit të katërt nga fundi të Kategorisë së Parë në ndeshjet play-out.

Sa i takon rënies nga Kategoria e Dytë në sezonin 2027/2028, skuadrat e renditura në fund të secilit grup do të bien direkt në Kategorinë e Tretë.

Ndërkohë, ekipet e vendit të 11-të në të dy grupet do të përballen në një ndeshje të vetme play-out. Fituesi do të mbetet në Kategorinë e Dytë, ndërsa humbësi do të luajë një sfidë shtesë me fituesin e finales së vendeve të dyta të Kategorisë së Tretë, për të përcaktuar skuadrën pjesëmarrëse në Kategorinë e Dytë për sezonin pasardhës.

The post FSHF miraton format të ri për Kategorinë e Dytë dhe të Tretë, ja si do të funksionojnë ngjitjet dhe rëniet appeared first on Albeu.com.