Kosova do ta zhvillojë ndeshjen ndaj Izraelit pa shërbimet e sulmuesit Vedat Muriqi.

Futbollisti prizrenas ka pësuar një dëmtim të lehtë muskulor, çka e bën të pamundur aktivizimin e tij të mërkurën.

Muriqi u dëmtua gjatë stërvitjes së djeshme. Edhe pse u bashkua me ekipin në seancën para ndeshjes, ai ndjeu sërish dhimbje dhe trajneri Franco Foda vendosi të mos e rrezikojë.

Në këto rrethana, Albion Rrahmani dhe Fisnik Asllani pritet të nisin nga minuta e parë në skemën 3-5-2.

Mbetet ende e pasigurt nëse Muriqi do të rikuperohet në kohë për ndeshjen e së dielës kundër Austrisë, që do të luhet në Prishtinë.

The post Vedat Muriqi jashtë sfidës së Kosovës kundër Izraelit appeared first on Albeu.com.

Kosova përballet sot me Izraelin në kuadër të xhiros së tretë të Ligës së Kombeve. Skuadra izraelite synon të marrë pikët e para në këtë edicion, pas dy humbjeve ndaj Austrisë dhe Irlandës, ndërsa Dardanët kërkojnë t’u rikthehen rezultateve pozitive pas disfatës 3-1 ndaj Austrisë. Ndeshja luhet në “Nagyerdei Stadion” në Debrecen dhe fillon në orën 20:45.

Në prag të këtij takimi, mbrojtësi i Kosovës, Ilir Krasniqi, e vlerësoi sfidën si të vështirë për të dyja skuadrat. “Kjo është një ndeshje e fortë për të dyja ekipet. Ne e kemi studiuar Izraelin. Ata kanë një skuadër të mirë dhe presim një përballje shumë të vështirë. Do të shohim çfarë do të ndodhë”, u shpreh ai.

I pyetur nëse fakti që Izraeli ende nuk e ka mposhtur Kosovën e bën skuadrën kosovare favorite, Krasniqi theksoi se e kaluara nuk ka peshë në futboll. “Futbolli lidhet me të tashmen, jo me të kaluarën. Do të shohim si do të rrjedhë ndeshja. Izraeli ka një ekip cilësor dhe duhet të përqendrohemi te ajo që do të ndodhë në fushë”, shtoi ai.

Lidhur me pyetjen se cili lojtar izraelit e shqetëson më shumë, mbrojtësi nuk veçoi asnjë emër, duke e vlerësuar kundërshtarin si grup. “Ata kanë një ekip të mirë si tërësi, por edhe lojtarë me cilësi teknike individuale”, theksoi Krasniqi.

Në fund, ai foli për kapitenin Vedat Muriqi, i cili pritet të jetë një prej kërcënimeve kryesore për mbrojtjen izraelite. Krasniqi beson se, nëse sulmuesi gjendet në formën e duhur, ndalimi i tij do të jetë tejet i vështirë. “Vedati është gjithnjë i qetë, por në lojë jep gjithnjë 100 për qind. Nëse është në formë të mirë, nuk besoj se dikush mund ta ndalë”, përfundoi ai.

The post Ilir Krasniqi: Nuk mendoj se Izraeli ka aftësinë ta ndalë Vedat Muriqin appeared first on Albeu.com.

Forma e fundit me Fenerbahçen dhe Kombëtaren e Kosovës ka ndikuar në rritjen e vlerës së Vedat Muriqit, i cili tashmë është 32 vjeç.

Sipas përditësimit më të ri të Transfermarkt, sulmuesi kosovar vlerësohet tani 7 milionë euro. Në vlerësimin e kaluar, shifra ishte 4.5 milionë euro, çka nënkupton një rritje prej 2.5 milionë eurosh.

Muriqi po luan rol të rëndësishëm si te klubi turk, ashtu edhe në përfaqësuesen e Kosovës, ku ka qenë vendimtar në ndeshjet e fundit. Rritja prej 55.5 për qind vjen pas paraqitjeve të tij të fundit.

Megjithatë, vlera aktuale mbetet larg rekordit personal të sulmuesit. Në vitin 2020, kur ishte pjesë e Fenerbahçes dhe po përgatitej të transferohej te Lazio, Muriqi vlerësohej rreth 17 milionë euro.

Në moshën 32-vjeçare, ai ka arritur ta kthejë sërish në rritje vlerën e tij, falë kontributit me klubin dhe kombëtaren. Kjo dëshmon se Muriqi vijon të ketë peshë në tregun e transferimeve, në një moshë kur vlera e shumicës së futbollistëve zakonisht nis të bjerë. /Telegrafi/

The post Vedat Muriqi, 32 vjeç, rrit vlerën e tregut me 2.5 milionë euro appeared first on Albeu.com.

Sulmuesi Vedat Muriqi u kërkoi ndjesë tifozëve pas humbjes ndaj Austrisë.

Ylli nga Prizreni pati dy raste të volitshme për të shënuar, por nuk arriti t’i shndërrojë në gol.

Në një intervistë për “Klan Kosova”, Muriqi shprehu keqardhje për rastin e humbur dhe theksoi se tani vëmendja duhet të përqendrohet te Izraeli.

Ai kujtoi se e dinin para ndeshjes se përballë do të kishin një kundërshtar të fortë. Sipas tij, ishin të pranishëm mbi 15 mijë shqiptarë, ndërsa ai pati një rast në fillim të lojës; po të kishte shënuar, gjithçka mund të kishte marrë një rrjedhë tjetër. “E marrë përgjegjësinë e rastit, më vjen keq. Pas tre ditëve ndeshja tjetër mund të na tregojë se ku do të përfundojmë”, u shpreh Muriqi.

Më tej, ai shtoi se skuadra ka pak kohë për t’u rigjeneruar dhe se ajo sfidë tashmë i përket së shkuarës, me fokusin kryesor te Izraeli, që sipas tij luan futboll të bukur.

Muriqi pranoi se Austria i befasoi me qasjen e saj taktike, por nënvizoi se tani e rëndësishme është vetëm ndeshja e radhës.

Ai shpjegoi se papritur, kundërshtarët nuk ushtruan presionin e lartë që prisnin, por i lanë ta mbanin topin; megjithatë, mungoi pasimi i fundit. Goli i dytë, sipas tij, erdhi në një moment jo të përshtatshëm, ndërsa nëse rezultati do të mbetej 1-0, ndeshja mund të kishte shkuar ndryshe. “Siç e thashë ju kërkoj falje si kapiten dhe për tërë lojën. Do të vazhdojmë të bëjmë të pamundurën për Kosovën dhe po shpresojmë në kualifikim”, deklaroi ai.

Në fund, Muriqi theksoi se ndeshja e ardhshme mund të përcaktojë rrugëtimin e ekipit. “Fatkeqësisht kemi pak kohë, është çka është. Do të japim maksimumin dhe shpresoj në fitore”, përfundoi sulmuesi.

The post Më falni”, Vedat Muriqi i dëshpëruar pas disfatës: Marr përsipër përgjegjësinë, fokusi te Izraeli appeared first on Albeu.com.

Kosova pritet të paraqitet me një rreshtim të ndryshuar në përballjen e së dielës kundër Austrisë, që zhvillohet në “Ernst Happel Stadion” të Vjenës. Franco Foda mund ta rikthejë skemën 3-5-2, ndërsa Albian Hajdari nuk pritet të jetë i gatshëm për këtë takim.

Sipas formacionit të mundshëm, Arijanet Muric do të jetë në portë, me Lumbardh Dellovën, Ilir Berishën dhe Ron Raçin në vijën e mbrojtjes. Në mesfushë pritet të luajnë Leon Avdullahu, Veldin Hoxha dhe Valmir Matoshi, ndërsa në krahë do të angazhohen Mërgim Vojvoda e Dion Gallapeni. Në repartin ofensiv, Vedat Muriqi mund të formojë dyshen me Fisnik Asllanin, i cili do të pozicionohej pas tij.

Një vendosje e tillë do t’i mundësonte Kosovës të luante me tre mbrojtës qendre, pesë mesfushorë dhe një sulmues të avancuar, ndërsa Asllani do të kishte detyrën për ta mbështetur Muriqin.

Kur skuadra nuk e posedon topin, sistemi pritet të marrë formën 5-4-1. Në këtë situatë, lojtarët e krahëve do të tërhiqeshin në fazën mbrojtëse për të ngushtuar hapësirat. Në momentet e posedimit, ata do të ngriheshin për ta kthyer rreshtimin në një 3-5-2 më sulmues.

Në prapavijë, Dellova, Krasniqi dhe Raçi përmenden si lojtarët që do të formojnë treshen mbrojtëse pas lëndimit të Hajdarit. Edhe pse treshja që luajti ndaj Irlandës nuk do të jetë e njëjtë, objektivi mbetet ruajtja e një strukture kompakte përballë sulmit austriak. Muric, ndërkohë, pritet ta ruajë vendin mes shtyllave.

Risi e rëndësishme mund të jetë edhe përbërja e mesfushës. Foda pritet t’i vendosë përkrah Avdullahut dhe Hoxhës edhe Matoshin, duke shtuar një lojtar në qendër. Kjo do t’i ndihmonte Kosovës të qëndronte më e organizuar përballë Austrisë, e cila pritet të synojë dominimin në mesfushë.

Ndryshe nga ndeshja me Irlandën, ku në krahë luajtën futbollistë më tradicionalë të këtij pozicioni, si Baran Zaberxha dhe Edon Zhegrova, këtë herë Foda nuk pritet ta përdorë të njëjtën strukturë. Vojvoda dhe Gallapeni do të kenë përgjegjësi të dyfishta, duke kontribuar si në mbrojtje, ashtu edhe në sulm gjatë tranzicionit.

Avdullahu pritet të mbetet lojtari që do t’i japë ekuilibër skuadrës, ndërsa Hoxha e Matoshi mund të kenë më shumë hapësirë për të avancuar. Prania e tyre në qendër mund t’i krijojë Kosovës alternativa shtesë për mbajtjen e topit dhe për daljen nga presioni i kundërshtarit.

Vedat Muriqi pritet të jetë sërish pika kryesore e sulmit, me Fisnik Asllanin pas tij. Ky kombinim ishte përdorur edhe në disa prej ndeshjeve të suksesshme të Kosovës gjatë fazës së kaluar eliminatore për Kupën e Botës. Për këtë arsye, Foda mund t’i rikthehet këtij partneriteti në një transfertë ku kërkohet më shumë kujdes taktik.

The post Kosova drejt skemës 3-5-2 ndaj Austrisë, Hajdari mungon në sfidën e Vjenës appeared first on Albeu.com.

Vedat Muriqi, sulmuesi dhe kapiteni i Kosovës, është ngjitur në vendin e katërt të listës së golashënuesve më të mirë në historinë e Ligës së Kombeve.

Sipas të dhënave të UEFA-s, ai ka shënuar 14 gola në këtë garë. Përpara tij renditet Erling Haaland me 21 gola, ndërsa Aleksandar Mitrovic dhe Cristiano Ronaldo kanë nga 15.

Me këtë bilanc, Muriqi ka lënë pas futbollistë të njohur evropianë si Romelu Lukaku, Edin Dzeko, Kylian Mbappe dhe Viktor Gyokeres. Vetëm tre lojtarë kanë realizuar më shumë gola se kapiteni i Kosovës në Ligën e Kombeve, ndërsa ai është një gol larg vendit të dytë.

Kosova ka shënuar edhe një tjetër arritje në këtë garë: “Dardanët” janë ndër përfaqësueset me dy futbollistë që kanë realizuar secili nga një het-trik.

Muriqi shënoi tri gola kundër Islandës më 23 mars 2025. Më herët, më 20 nëntor 2018, Arbër Zeneli kishte realizuar po aq gola në një ndeshje ndaj Azerbajxhanit. Kështu, të dy kanë arritur të shënojnë nga tri herë në një takim të Ligës së Kombeve.

The post Muriqi renditet i katërti mes golashënuesve historikë të Ligës së Kombeve, përpara emrave të njohur appeared first on Albeu.com.

Fitorja 1-0 e Kosovës ndaj Republikës së Irlandës në stadiumin “Fadil Vokrri” dhe festimi i lojtarëve të saj, veçanërisht i Vedat Muriqit, kanë marrë vëmendje të gjerë në mediat serbe dhe në ato të vendeve të rajonit.

Kapiteni i “Dardanëve” shënoi golin vendimtar në minutën e 83-të. Pas realizimit, ai ngriti një fanellë me mbishkrimet “Drejtësi për Çlirimtarët” dhe “Jo në emrin tim”, ndërsa në festim u përfshinë edhe futbollistët e tjerë të Kosovës, duke krijuar një atmosferë të veçantë në “Fadil Vokrri”.

Ky mesazh u shfaq në një periudhë të ndjeshme, pas vendimit të Dhomave të Specializuara të Kosovës në Hagë për ish-krerët e UÇK-së. Në përfundim të ndeshjes, Muriqi tha se fitoren ua dedikonte “çlirimtarëve tanë, krerëve të UÇK-së”.

Ngjarja shkaktoi reagime të forta në Serbi. Mediumi Kurir kërkoi madje përjashtimin e Kosovës nga futbolli evropian, ndërsa Alo ngriti pyetjen nëse UEFA do të ndërmerrte ndonjë reagim. Edhe media të tjera serbe raportuan gjerësisht për festimin pas përfundimit të takimit.

Vëmendja e mediave serbe u përqendrua edhe te një reagim jashtë fushës së futbollit. Telegraf raportoi për postimin e trajnerit kosovar të xhudos, Driton Kuka, i cili publikoi fotografi të Vedat Muriqit dhe Milot Rashicës pas fitores.

“Ekip i shkëlqyeshëm. Pamja në fund të ndeshjes flet shumë. Gjenerata të lirisë. Gjenerata që nuk lejojnë robëri kurrë më”, kishte shkruar Kuka. Më pas, postimi i tij u publikua edhe nga një medium serb.

Jehona e festimit të Muriqit u pasqyrua edhe në mediat e vendeve të tjera të rajonit. Mediumi kroat Dnevnik raportoi mbi reagimet në Serbi, ndërsa portali boshnjak sportsport.ba shkroi se veprimi i futbollistit kosovar do të sillte reagime të forta në Serbi.

The post Festimi i Vedat Muriqit për çlirimtarët shkakton reagime të ashpra në mediat serbe appeared first on Albeu.com.

Pesë gola në dy ndeshje dhe në vetëm katër ditë: Vedat Muriqi po kalon një periudhë të shkëlqyer me Fenerbahçen dhe Kosovën.

Seria nisi më 20 shtator, në javën e gjashtë të Superligës së Turqisë. Sulmuesi kosovar shënoi katër nga golat e Fenerbahçes në fitoren 8-0 ndaj Eyüpsporit.

Ai e gjeti rrjetën në minutat 7’, 21’, 47’ dhe 55’. Kjo ishte hera e dytë në karrierë që Muriqi realizonte katër gola në një ndeshje, ndërsa pas atij takimi numri i golave të tij për Fenerbahçen këtë sezon arriti në shtatë.

Katër ditë më pas, më 24 shtator (e enjte), kapiteni i Kosovës shënoi edhe me fanellën e Dardanëve. Në minutën e 83-të të përballjes me Irlandën në stadiumin “Fadil Vokrri”, goli i tij i dha Kosovës fitoren 1-0 në ndeshjen e parë të Ligës së Kombeve.

Aksioni vendimtar erdhi nga një goditje e Krasniqit, pas së cilës topi u kthye nga shtylla. Muriqi reagoi menjëherë dhe e dërgoi në rrjetë.

Katër gola në Superligën turke me Fenerbahçen dhe një në Ligën e Kombeve me Kosovën, të shënuar në dy gara e me dy fanella të ndryshme, dëshmojnë formën që po kalon sulmuesi dardan.

The post Muriqi shënon pesë herë në katër ditë për Fenerbahçen dhe Kosovën appeared first on Albeu.com.

Vedat Muriqi zgjodhi një mënyrë të veçantë për të festuar golin që i siguroi Kosovës fitoren 1-0 ndaj Irlandës në stadiumin “Fadil Vokrri”. Kapiteni realizoi në minutat e fundit të përballjes së Ligës së Kombeve, duke i dhuruar skuadrës kosovare tri pikët e para të këtij cikli.

Menjëherë pas shënimit, sulmuesi hoqi fanellën e ndeshjes dhe ngriti një fanellë të bardhë, mbi të cilën ishte vendosur një mesazh.

Në pjesën e përparme të saj shkruhej “Drejtësi për çlirimtarët”, ndërsa në pjesën e pasme ishte vendosur thirrja “Jo në emrin tim”. Të njëjtat mesazhe lojtarët e Kosovës i kishin përcjellë edhe gjatë njërës prej seancave stërvitore para takimit me Irlandën.

Ky qëndrim lidhet me reagimet në Kosovë pas vendimeve të Dhomave të Specializuara në Hagë ndaj ish-drejtuesve të Ushtrisë Çlirimtare të Kosovës. Në ditët para ndeshjes, mesazhet ishin shfaqur edhe gjatë protestave të mbajtura në Prishtinë.

Goli i Muriqit ndezi atmosferën në “Fadil Vokrri”. Për disa minuta, tifozët në tribuna brohoritën vazhdimisht “UÇK, UÇK”, ndërsa festuan suksesin që i dha Kosovës fitoren në ndeshjen e parë të këtij cikli.

Pas momentit të golit, Muriqi u bashkua me bashkëlojtarët në festë. Mesazhi i shfaqur në fanellën e tij u kthye në një prej skenave më të komentuara të mbrëmjes në Prishtinë, ndërsa Kosova tani përgatitet për përballjen e radhës kundër Austrisë.

The post Muriqi shënon golin e fitores dhe përcjell mesazh për çlirimtarët, stadiumi shpërthen me “UÇK, UÇK appeared first on Albeu.com.

Kosova e ka hapur me sukses edicionin e Ligës së Kombeve, pasi në Prishtinë mposhti Irlandën me rezultatin 1-0.

“Dardanët” zhvilluan një ndeshje dominuese dhe në fund siguruan të gjitha pikët, falë një goli të shënuar në minutat e fundit.

Vendasit e nisën takimin me intensitet të lartë dhe krijuan disa mundësi për të kaluar në avantazh. Megjithatë, mbrojtja irlandeze rezistoi deri vonë, duke larguar në dy raste topin pranë vijës së portës pas tentativave të Vedat Muriqit dhe Veldin Hoxhës.

Kosova nuk hoqi dorë nga presioni dhe vazhdoi të kontrollonte lojën edhe pas pushimit, duke e mbajtur kundërshtarin nën trysni të vazhdueshme.

Zhbllokimi erdhi në minutën e 83-të, kur kapiteni Vedat Muriqi shënoi me kokë pas një topi të kthyer nga goditja e Ermal Krasniqit.

Krasniqi pati më pas një tjetër rast të mirë për të shënuar, ndërsa mundësi krijoi edhe Mërgim Vojvoda. Ish-portieri i Liverpoolit, megjithatë, reagoi në mënyrë fantastike dhe ua mohoi golin.

Me këtë fitore të merituar në Prishtinë, Kosova e nis në mënyrën më të mirë aventurën e saj në Ligën e Kombeve.

The post Kosova triumfon ndaj Irlandës në Prishtinë, Muriqi vendos sfidën appeared first on Albeu.com.