“Duke marrë parasysh ndjeshmërinë e madhe të opinionit publik për ngjarjen ku i mituri me inicialet B.S., humbi jetën pas trajtimit në një klinikë private, si dhe interesin e shtuar të medias në lidhje me këtë çështje, Prokuroria Tiranë dëshiron të informojë se:

Prokuroria pranë Gjykatës së Shkallës së Parë të Juridiskionit të Përgjithshëm Tiranë, mbi bazën e materialit të referuar nga Komisariati i Policisë Nr.4 më shkresën Nr.7057/k Prot të datës 04.10.2023, ka regjistruar më datë 05.10.2023 procedimin penal nr.6477 të vitit 2023, për veprën penale “Neglizhenca në trajtimin mjekësor”, parashikuar nga neni 96 i Kodi Penal.

Nga ana e prokurorisë, po vijon kryerja e veprimeve të tjera procedurale në lidhje me procedimin penal, me qëllim evidentimin e të gjitha rrethanave dhe shkaqeve të vdekjes së shtetasit”, thuhet në njoftimin e Prokurorisë.

Kujtojmë se i ati i djalit, Bledar Spahiu ka treguar të gjithë kronologjinë nga momenti që iu drejtuan klinikës private të mjekut Xhaxho dhe deri në momentet e fundit të fëmijës që ndërroi jetë në QSUT.

“E kam çuar çunin e vogël Brians ke spitali privat “Roland Xhaxho” në rrugen e “Kavajës”. Kur ka dalë doktor Rolandi nga operacioni na ka thënë se doli me sukses dhe se djalit po i dilte dhe narkoza.

Rreth orës 19:00 na tha se djali ishte në rregull dhe ta merrnim në shtëpi sa ti dilte narkoza. Pas 30 minutash që kemi shkuar në shtëpi djali ka pasur temperaturë e cila i rritej, dhe duke qenë se fëmija u zverdh e kemi çuar me urgjencë te pediatria e Nënë Terezës.

Doktorit i kam thënë në sy të gjithë stafit që po ndiqte rastin e djalit tim se ‘faji është i joti pasi i ke dhënë dozë të lartë narkoze” thuhet në dëshminë e tij.

The post Vdekja e 3-vjeçarit pas trajtimit në klinikën dentare, Prokuroria Tiranës nis hetimet appeared first on Albeu.com.