Zbulimi i dy varrezave të tjera masive që lidhen me luftën në Kosovë ka nxitur reagimin e Jasmin Mujanoviqit, politolog i specializuar për politikën e Evropës Juglindore. Në këto lokacione dyshohet se ndodhen mbetjet mortore të viktimave shqiptare të regjimit të Sllobodan Millosheviqit.

Përmes një postimi në X, Mujanoviq tha se gjetja e varrezave, ku besohet se janë varrosur rreth dy duzina viktima shqiptare, tregon se pasojat rajonale të fushatës vrasëse të Beogradit gjatë viteve ’90 janë ende të afërta në kohë dhe vazhdojnë të mbeten kryesisht të patrajtuara.

Sipas tij, ky rast sjell sërish në vëmendje gjurmët e pashëruara që lanë në rajon fushatat e dhunshme të Beogradit në vitet ’90.

Mujanoviq theksoi gjithashtu se mijëra viktima konsiderohen ende të zhdukura, ndërkohë që strukturat politike dhe normat e vendosura në mbarë rajonin gjatë periudhës së Millosheviqit vazhdojnë të jenë të pareformuara.

Ai kritikoi edhe komunitetin ndërkombëtar, duke deklaruar se ai mbetet i përfshirë në përpjekjet e veta të kufizuara për t’i shpërfillur këto çështje.

The post Mujanoviq: Varrezat e reja masive në Kosovë dëshmojnë pasojat e krimeve të Millosheviqit appeared first on Albeu.com.

Zejnulla Gashi, Kryeprokuror i Shtetit, ka përgëzuar institucionet ligjzbatuese të Kosovës për angazhimin dhe punën që çuan në zbulimin e një varreze masive në Zubin Potok. Në këtë lokacion janë gjetur mbetje mortore, ndërsa ekzistojnë dyshime se aty mund të ndodhen edhe trupa të tjerë të viktimave të luftës së fundit në Kosovë.

Në një deklaratë publike, Gashi tha se ky zhvillim është pjesë e përpjekjeve të pandërprera institucionale për të sqaruar fatin e personave të zhdukur dhe për të vënë drejtësinë në vend.

Sipas Kryeprokurorit të Shtetit, gjetja e varrezës masive shënon një hap me rëndësi në angazhimin shtetëror për nxjerrjen në dritë të së vërtetës dhe krijimin e mundësive për vendosjen e drejtësisë.

Gashi nënvizoi se hetimi dhe zbardhja e rasteve të këtilla përbëjnë jo vetëm detyrim ligjor, por edhe përgjegjësi institucionale dhe morale karshi viktimave të luftës dhe familjarëve të tyre.

Ai vlerësoi gjithashtu koordinimin dhe bashkëpunimin mes institucioneve dhe qytetarëve në zonën ku po kryhen gërmimet, duke e konsideruar këtë bashkërendim të domosdoshëm për përparimin e hetimeve.

Kryeprokurori theksoi se mbështetja e institucioneve dhe e qytetarëve është thelbësore si për identifikimin e viktimave, ashtu edhe për zbulimin e personave përgjegjës për këto krime dhe dërgimin e tyre para drejtësisë.

Gërmimet dhe ekzaminimet në lokacionin e Zubin Potokut pritet të vijojnë, me qëllim që autoritetet të përcaktojnë nëse në atë zonë gjenden mbetje të tjera mortore të viktimave të luftës.

Deri në këtë fazë, në lidhje me këtë zhvillim janë arrestuar tre persona.

The post Gashi për varrezën masive në Zubin Potok: Zbulim i rëndësishëm për nxjerrjen e së vërtetës appeared first on Albeu.com.

Zyra e OKB-së për të drejtat e njeriut tha të premten se raportet për varreza të mundshme masive pranë qytetit ukrainas Izium janë “tronditëse” dhe se ekipi i kësaj zyre në Ukrainë shpreson të vizitojë rajonin.

“Është e qartë se çdo raportim i këtij lloji është tronditës. Dhe kjo është arsyeja pse është e rëndësishme që të vërtetohen rrethanat e vdekjes së njerëzve që mund të ndodhen në këto varre kolektive”, tha zëdhënësja e zyrës së OKB-së të Komisionerit të Lartë për të Drejtat e Njeriut.

Pylli ku u gjendën qindra varre, u zbulua afër Iziumit pasi kundërofensiva e forcave ukrainase çliroi qytetin verilindor dhe pjesë të tjera të rajonit të Kharkivit.

Gazetarët e agjencive të ndryshme numëruan mbi 400 varre mes pemëve, të shënuara me kryqe.

Rusia nuk ka komentuar publikisht për këtë çështje, ndërsa zyrtarët ukrainas thonë se shumica e trupave të gjetur janë civilë.

“Rreth 50 trupa civilësh, u gjetën në territorin e rajonit të Kharkivit këtë javë. Kjo nuk përfshin varret masive nga të cilat ne ende duhet të nxjerrim trupat”, tha shefi i policisë së Ukrainës, Ihor Klymenko.

Zoti Klymenko megjithatë e pranoi se kanë informacione se në këtë varrezë masive ka edhe për trupa ushtarësh të vrarë.

Zyra e OKB-së për të Drejtat e Njeriut thotë se ekipet e saj do të donin të verifikonin nëse trupat e gjetur janë të njerëzve të vrarë apo që kishin vdekur nga shkaqe natyrore, vdekje që mund të jenë shkaktuar nga mungesa e ndihmës mjekësore, siç ka ndodhur gjatë rrethimit të qytetit Mariupol.

Forcat ukrainase kanë filluar të largojnë edhe automjetet e dëmtuara ushtarake ruse në Izium dhe po verifikojnë dëmet e shkaktuara në zonë nga konflikti i fundit.

“Nuk ka mbetur asgjë. Shikoni të gjitha rajonet përreth. Nuk ka asgjë. Edhe manastiret u shkatërruan prej tyre. Njerëzit që planifikojnë të qëndrojnë këtu dhe të ndërtojnë një jetë të re, nuk e bëjnë këtë, ata nuk shkatërrojnë gjithçka”, tha ushtari i Gardës Kombëtare të Ukrainës, Yurii Usatyi.

I njëjti ushtar thotë se forcat ruse kanë lënë shumë mjete ushtarake dhe kanë ikur.

Yurii Usatyi, ushtar i Gardës Kombëtare të Ukrainës

“Këto mjete ushtarake i marrim për vete, i riparojmë ato që janë pak të dëmtuara dhe më pas do i përdorim kundër atyre që i kanë sjellë këtu”, tha ushtari i Gardës Kombëtare ukrainase, Usatyi.

Forcat ruse u larguan nga Iziumi dhe pjesë të tjera të rajonit të Kharkivit javën e kaluar pas një kundërofensive të shpejtë të Ukrainës që u cilësua si dëmi më i madh që i është shkaktuar forcave ruse që pasi u detyruan të largohen nga periferia e Kievit në muajin mars./VOA

The post OKB: Raportet për varrezë masive në Izium të Ukrainës, tronditëse appeared first on Albeu.com.