Mesfushori i Partizanit, Valentino Murataj, ka folur për mediat për objektivat e skuadrës së kuqe në sezonin e ri të Superiores, derbin e ardhshëm me Dinamon dhe ndryshimet që ka sjellë trajneri Florin Bratu. 30-vjeçari ka vlerësuar gjithashtu forcën e grupit dhe mbështetjen e tifozëve.

Murataj u shpreh se një nga veçoritë kryesore të trajnerit Bratu është modestia dhe afërsia që ka krijuar me lojtarët.

“Mendoj se trajneri Bratu të veçantë ka modestinë e tij dhe e mban sa më afër grupin. Çdo ditë është me ne, jo vetëm në stërvitje, por edhe në hotelin tonë. Jemi shumë afër me të dhe mund të them se e kemi si shok skuadre”, deklaroi mesfushori.

Duke folur për derbin me Dinamon, ai theksoi rëndësinë e kësaj sfide pas rezultateve jo të mira ndaj Teutës dhe Laçit.

“Pas rezultateve jo të mira ndaj Teutës dhe Laçit, ndeshja me Dinamon është një ndeshje po aq e rëndësishme për ecurinë e kampionatit sa ajo ndaj Vllaznisë. Duhet të ruajmë vazhdimësinë dhe të marrim pikët e plota, pasi kampionati sapo ka filluar dhe të gjitha skuadrat janë të etura për pikë”, tha Murataj.

Sa i përket objektivave të Partizanit, 30-vjeçari beson se ekipi ka potencialin për të luftuar deri në fund për trofe.

“Partizani i ka të gjitha mundësitë të shkojë sa më larg, sepse çdo vit dihet që hyn për të fituar trofe. Mendoj se edhe këtë vit Partizani është ndërtuar për të fituar trofe. Ka kontingjentin e duhur për ta bërë këtë”, u shpreh ai.

Murataj veçoi grupin si pikën më të fortë të skuadrës në këtë sezon, duke nënvizuar rëndësinë e bashkimit mes lojtarëve.

“Mendoj që në këtë sezon pika më e fortë do të jetë grupi. U them gjithmonë çunave që të jemi sa më të bashkuar. Partizani nuk ka yje, ndaj duhet të jemi të gjithë bashkë që të shkojmë përpara”, deklaroi mesfushori.

Në prag të derbit, ai pati edhe një mesazh për tifozët e Partizanit, të cilët sipas tij kanë qenë gjithmonë pranë skuadrës.

“Në çdo ndeshje tifozët na kanë mbështetur. Edhe në derbin ndaj Dinamos besoj që do të jenë aty dhe do të na mbështesin. Besoj që do të japim një ndeshje të bukur dhe ta fitojmë”, përfundoi Murataj.

The post Murataj: Partizani synon trofetë, grupi është forca jonë për sezonin e ri appeared first on Albeu.com.