Me rastin e Ditës së Pavarësisë së Ukrainës, ushtruesja e detyrës së Presidentes së Republikës së Kosovës, Albulena Haxhiu, dhe kryeministri në detyrë, Albin Kurti, kanë pritur sot gazetarë ukrainas që po qëndrojnë në Kosovë.

Gjatë fjalës së saj, Haxhiu u shpreh se disa prej gazetarëve ukrainas e kanë konsideruar Kosovën një shtëpi të përkohshme gjatë viteve të vështira të luftës.

“Nga Kosova keni vazhduar të shkruani, të raportoni, të flisni dhe të punoni për vendin tuaj. Është kënaqësi që sot jeni këtu me ne, pasi prania juaj i jep kësaj dite një kuptim të veçantë”, deklaroi U.D. Presidentja Haxhiu.

Ajo tha se, ndonëse historia e Kosovës nuk është e njëjtë me atë të Ukrainës, përvoja e vendit ka bërë që kosovarët ta kuptojnë thellësisht koston njerëzore të luftës.

“Ne e dimë çfarë do të thotë të largohesh nga shtëpia pa e ditur se kur do të kthehesh. E dimë rëndësinë e mbështetjes nga të tjerët në momentet kur ke më së shumti nevojë dhe e dimë se liria, kur kërcënohet, duhet mbrojtur me gjithçka që kemi”, theksoi ajo.

Sipas Haxhiut, rezistenca e treguar nga Ukraina gjatë këtyre viteve përbën një shembull të jashtëzakonshëm qëndrueshmërie.

“Ukrainasit kanë vijuar të mbrojnë vendin, komunitetet dhe mënyrën e tyre të jetesës, pavarësisht trysnisë së jashtëzakonshme. Ata kanë mbajtur në funksion institucionet, qytetet dhe shkollat, duke ruajtur të gjallë të vërtetën edhe gjatë vazhdimit të luftës. Kjo vendosmëri respektohet thellësisht nga Republika e Kosovës”, u shpreh U.D. Presidentja.

Haxhiu nënvizoi se Kosova ka qenë në krah të Ukrainës që në ditët e para të pushtimit rus, për shkak të besimit në të drejtën e popullit ukrainas për të vendosur vetë për të ardhmen, për të mbrojtur territorin dhe për të jetuar i lirë.

Ajo përmendi edhe masat konkrete të ndërmarra nga Kosova, përfshirë vendosjen e sanksioneve ndaj Rusisë menjëherë pas nisjes së agresionit rus, harmonizimin e mëtejshëm me partnerët evropianë dhe transatlantikë, pritjen e gazetarëve ukrainas, pezullimin e përkohshëm të regjimit të vizave për qytetarët e Ukrainës dhe përgatitjet për të pritur njerëzit e detyruar të largohen nga shtëpitë për shkak të luftës.

Mbështetja, sipas saj, është dhënë edhe në fushën e mbrojtjes. Kosova është pjesë e Grupit të Kontaktit për Mbrojtjen e Ukrainës, ndërsa pjesëtarë të Forcës së Sigurisë së Kosovës kanë marrë pjesë në trajnimin e ushtarakëve ukrainas, përfshirë operacionin “Interflex”. Gjithashtu, Kosova ka ofruar dy pako ndihme ushtarake, të cilat përmbajnë 30 automjete ushtarake dhe 10 mijë predha mortajash.

Haxhiu tha se qëndrimi i gazetarëve ukrainas në Kosovë ka rëndësi të veçantë, pasi gjatë luftës së Kosovës u kuptua se sa e domosdoshme është dokumentimi i ngjarjeve dhe informimi i botës për atë që po ndodh.

“Për këtë arsye, ofrimi i një vendi të sigurt ku gazetarët mund të vazhdojnë punën e tyre ka qenë për ne shumë më tepër sesa thjesht sigurimi i strehimit”, tha ajo.

U.D. Presidentja e Kosovës deklaroi se vendi dëshiron paqe për Ukrainën, por një paqe që garanton pavarësinë, sovranitetin dhe tërësinë territoriale të saj. Sipas saj, kjo duhet të jetë një paqe ku ukrainasit vendosin vetë për të ardhmen dhe e rindërtojnë vendin e tyre në liri.

“Kosova do të vijojë të qëndrojë përkrah Ukrainës. Shpresoj sinqerisht që lidhjet e krijuara mes njerëzve gjatë këtyre viteve të vështira të shndërrohen me kalimin e kohës në një afërsi edhe më të madhe mes dy vendeve tona. Gëzuar Ditën e Pavarësisë Ukrainës dhe të gjithë ukrainasve!”, përfundoi Haxhiu.

The post Haxhiu: Kosova do të vazhdojë ta mbështesë Ukrainën që nga fillimi i pushtimit rus appeared first on Albeu.com.

Ushtruesja e detyrës së presidentes, Albulena Haxhiu, ka konfirmuar se të premten do të bëjë publike datën e mbledhjes konstituive të Kuvendit. Sipas paralajmërimeve të saj të mëparshme, kjo seancë pritet të mbahet në ditët e para të gushtit.

Për të dhënë detaje mbi këtë vendim, ajo ka thirrur një konferencë për mediat, e cila do të zhvillohet sot duke filluar nga ora 11:00.

Në një deklaratë të dhënë ditë më parë, Haxhiu kishte sqaruar arsyet e vonesës në caktimin e mbledhjes, duke theksuar nevojën që partitë politike të kenë hapësirën e nevojshme për të dialoguar mbi çështjen e zgjedhjes së presidentit të ri. “I kam përshëndetur dhe mbështetur diskutimet mes kryeministrit dhe kreut të Lëvizjes Vetëvendosje, Albin Kurti. Siç jeni në dijeni, ai zhvilloi dy takime, një me PDK-në dhe një tjetër me LDK-në. LDK-ja i ndërpreu bisedimet për shkak të dinamikave të brendshme. Pa dashur të ndërhyj në punët e brendshme të partive, mendoj se është thelbësore që këto takime të rifillojnë shpejt, në mënyrë që të ecim përpara dhe të arrihet një konsensus për presidentin,” deklaroi ajo.

Gjithashtu, ajo hodhi poshtë pretendimet për një marrëveshje të fshehtë mes Albin Kurtit dhe Lumir Abdixhikut për ndërtimin e institucioneve, përfshirë edhe postin e presidentit. “Nuk ka asnjë marrëveshje. Po të ekzistonte, do ta kishim bërë menjëherë publike. Në takim ishin të pranishëm Kryeministri Kurti dhe Ministri i Financave, z. Murati, ndërsa nga pala tjetër morën pjesë z. Abdixhiku dhe znj. Osmani Sadriu. U zhvilluan diskutime për hapat që do të ndërmerren në të ardhmen, por nuk u nënshkrua asnjë marrëveshje,” përfundoi ajo.

The post Haxhiu zbulon sot datën e seancës konstituive të Kuvendit të Kosovës appeared first on Albeu.com.

Gjatë adresimit të saj, U.D. Presidentja Haxhiu theksoi se abuzimi me drogat dhe trafikimi i tyre përbëjnë disa nga kërcënimet më të rënda për rininë dhe për sigurinë shoqërore në vend.

“Për drogat dhe pasojat e tyre duhet të flasim hapur, pa paragjykime dhe pa e fshehur rrezikun. Duhet të flasim në shkolla, me prindër, me mësimdhënës dhe me vetë të rinjtë, para se problemi të shfaqet në familje si krizë.t”, u shpreh U.D. Presidentja Haxhiu.

Ajo nënvizoi se shkollat meritojnë vëmendje të posaçme, veçanërisht pas raportimeve të vazhdueshme për praninë ose shitjen e substancave narkotike në afërsi të tyre.

Sipas saj, afrimi i këtij rreziku pranë oborreve të shkollave e kthen parandalimin në një obligim të menjëhershëm për familjen, shkollën, institucionet dhe gjithë komunitetin. U.D. Presidentja Haxhiu tha se ky proces nis me informim të drejtë, me psikologë e pedagogë, me mësimdhënës të trajnuar, me prindër të angazhuar dhe me një gjuhë që të rinjtë e kuptojnë. Ajo paralajmëroi se nëse të rinjtë për drogat informohen vetëm nga rruga, rrjetet sociale apo nga ata që përfitojnë prej tyre, atëherë institucionet nuk do të arrijnë të kenë ndikim të mjaftueshëm.

U.D. Presidentja Haxhiu tha gjithashtu se kjo çështje kërkon një mobilizim të gjerë të shoqërisë dhe përgjegjësi të qarta nga çdo institucion.

“Prandaj është e rëndësishme që sot në këtë tryezë janë bashkë ata që e njohin problemin nga afër: institucionet publike, profesionistët e shëndetit, Policia e Kosovës dhe organizata si Labyrinth, e cila për vite me radhë ka punuar me persona që kanë krijuar varësi dhe me familjet e tyre, duke shërbyer shpeshherë si adresa e parë ku kërkohet ndihmë. Me këtë rast dua t’ju falënderoj për punën e madhe dhe të gjatë në këtë fushë”, theksoi U.D. Presidentja Haxhiu.

Duke folur për varësinë, ajo u shpreh se një person i varur nga substancat narkotike nuk duhet parë si kriminel apo trafikant, por si një njeri që ka nevojë për trajtim, mbështetje dhe rehabilitim në shoqëri.

“Kriminel është ai që e shfrytëzon dobësinë e tij, që e furnizon, që e shtyn më thellë në varësi dhe që përfiton”, u shpreh U.D. Presidentja Haxhiu.

Ajo theksoi se ndaj trafikantëve duhet të ketë qasje të pakompromis, ndërsa ndaj personave që kanë nevojë për ndihmë duhet treguar kujdesi më i madh.

“Forca e një shoqërie shihet te aftësia për të parandaluar përfshirjen e të rinjve në këtë vorbull, për t’i trajtuar ata që kanë nevojë për ndihmë dhe për t’i kthyer në jetë me dinjitet”, tha U.D. Presidentja Haxhiu.

Në përmbyllje, U.D. Presidentja Haxhiu rikujtoi se Kosova tashmë e ka Strategjinë Shtetërore Kundër Drogave 2024–2028 dhe se janë ndërmarrë disa veprime, si edhe janë vendosur mekanizma të rëndësishëm. Megjithatë, sipas saj, kjo çështje nuk mund të zgjidhet me një dokument të vetëm, por kërkon punë të pandërprerë në parandalim, trajtim dhe zbatim të ligjit. “Kjo ditë është thirrje për më shumë përgjegjësi, më shumë koordinim dhe më shumë veprim. Të mos presim që varësia të trokasë në derën e familjeve tona për të reaguar. Ta mbrojmë secilin të ri nga kurthi i drogës, ta mbrojmë shoqërinë nga trafikimi dhe ta mbrojmë shtetin nga krimi i organizuar. Çdo jetë e shpëtuar nga varësia është fitore për familjen, shoqërinë dhe shtetin tonë”, theksoi U.D. Presidentja Haxhiu.

The post Haxhiu bën thirrje për mbrojtjen e të rinjve nga droga dhe të shtetit nga krimi i organizuar appeared first on Albeu.com.