Sipas njoftimit të Komisionit Qeveritar për Persona të Zhdukur, pas identifikimit të bërë përmes analizës shkencore të ADN-së dhe në përputhje me kërkesën e familjes, më 21 qershor 2026 do të kryhet rivarrimi i mbetjeve mortore të Hajdar Pepajt.

Ceremonia e rivarrimit është paraparë të zhvillohet në varrezat e fshatit Kodrali të Deçanit, duke nisur nga ora 16:00.

Në njoftim thuhet gjithashtu se para ceremonisë së varrimit, nga ora 15:00, do të mbahen homazhe te “Lapidari i Ri” në fshatin Kodrali të Deçanit.

Sipas të njëjtit njoftim, organizimin e ceremonisë së rivarrimit e bëjnë Shoqatat e dala nga lufta – Dega në Deçan dhe Komuna e Deçanit, me përkrahjen e Komisionit Qeveritar për Persona të Zhdukur.

Komisioni Qeveritar për Persona të Zhdukur i ka shprehur familjes Pepaj ngushëllimet më të sinqerta, duke ritheksuar njëherësh përkushtimin institucional për të vazhduar angazhimin në zbardhjen e fatit dhe vendndodhjes së të gjithë personave të zhdukur me forcë gjatë luftës në Kosovë.

The post Pas identifikimit me ADN, sot i jepet lamtumira e fundit dëshmorit Hajdar Pepaj appeared first on Albeu.com.