Dhjetë ditë kanë kaluar që nga njoftimi i KFOR-it, misionit paqeruajtës të NATO-s në Kosovë, për nisjen e një “tranzicioni gradual të pranisë së tij të përhershme” në urën kryesore mbi lumin Ibër në Mitrovicë.

Ndryshimi vjen pasi përgjegjësia për sigurinë dhe administrimin e urës i është transferuar Policisë së Kosovës, ndërsa njësitë e KFOR-it po e pakësojnë hap pas hapi praninë e tyre të përhershme në këtë pikë.

Ky zhvillim po shihet si një mundësi për afrimin e dy pjesëve të Mitrovicës nga përfaqësues të shoqërisë civile dhe banorë të qytetit.

Betim Osmani, nga Iniciativa Qytetare në Mitrovicën e Veriut, e konsideron kalimin e përgjegjësive nga KFOR-i te institucionet vendore një hap të rëndësishëm drejt bashkimit më të madh mes veriut dhe jugut.

Osmani thotë se ky vendim është dashur të merrej edhe më herët, ndërsa vlerëson se veriu ka nevojë për investime pas mungesës së tyre për 27 vite. Sipas tij, nevojiten ndërhyrje për rikthimin e qytetarëve, veçanërisht të komunitetit shqiptar, si dhe për rindërtimin dhe integrimin e arsimit e shëndetësisë, shërbime cilësore nga të cilat, sipas tij, banorët e veriut kanë vuajtur për 27 vjet.

Për Osmanin, largimi gradual i KFOR-it është shenjë se përgjegjësia për sigurinë në urë po i afrohet gjithnjë e më shumë institucioneve të Kosovës.

Ai beson se procesi mund të çojë deri në fund të vitit edhe në rikthimin e qarkullimit të automjeteve. Sipas tij, kjo është një lëvizje graduale dhe fakti që tenda e përdorur më herët nga karabinierët është hequr tregon për ndryshimin e situatës. Osmani shton se, pas përfundimit të sezonit të verës, deri në fund të vitit mund të nisë lëvizja e veturave mbi urë.

Ai thekson se gjatë viteve të fundit nuk ka pasur tensione të rëndësishme në këtë zonë. Për këtë arsye, sipas tij, prania e vazhdueshme e forcave në urë nuk është e nevojshme, ndërsa do të mjaftonte rritja e numrit të policëve ose patrullave në veri, së bashku me praninë e KFOR-it.

Osmani kujton se në afërsi të lumit Ibër ndodhen edhe katër ura të tjera që lidhin veriun me jugun dhe thotë se nuk ka pasur probleme në përdorimin e tyre.

Ndryshe nga më parë, Skender Sadiku, po ashtu nga Iniciativa Qytetare në Mitrovicë të Veriut, shpreson që procesi të mos ndalet për shkak të presioneve apo interesave politike.

Sipas Sadikut, lëvizja e lirë është një e drejtë themelore dhe institucionet duhet t’ua garantojnë atë të gjithë qytetarëve. Ai shprehet se urat janë ndërtuar për të lidhur njerëz dhe kultura, ndaj të gjitha rrethanat duhet të çojnë në hapjen e tyre.

Sadiku nënvizon se në veri të Mitrovicës ekzistojnë probleme më urgjente se çështja e urës, veçanërisht në shërbimet shëndetësore dhe në infrastrukturë.

Ndërkohë, qytetarët që e përdorin urën kanë vërejtur ndryshime në siguri dhe në mënyrën e qarkullimit gjatë periudhës së fundit.

Sadri Imeri e cilëson urën si lidhjen kryesore mes dy pjesëve të qytetit dhe shpreson që së shpejti të lejohet edhe qarkullimi i veturave. Ai thotë se kalimi është bërë më i lehtë dhe më i lirshëm, por thekson se urat e tjera nuk e kryejnë të njëjtin funksion si ura në qendër të qytetit.

Imeri kujton se më herët kalimi në këtë pjesë ishte shumë i vështirë për shkak të bandave serbe, pengesave dhe mungesës së sigurisë. Sipas tij, sot situata është normalizuar dhe ai pret që brenda dy-tri javësh qarkullimi të lirohet.

Sylejman Curri e lidh ndryshimin e situatës me praninë dhe kontrollin e Policisë së Kosovës. Ai thotë se kjo ka bërë që qytetarët të lëvizin shumë më lirshëm dhe pa frikë, duke e konsideruar lehtësimin e qarkullimit 100 për qind.

Curri tregon se në të kaluarën persona të armatosur dilnin në zonën përreth furrës dhe policisë, ndërsa banorët nuk guxonin të kalonin në atë anë. Sot, sipas tij, një situatë e tillë nuk mund të ndodhë, pasi ajo pjesë kontrollohet nga Policia e Kosovës.

Më 20 gusht, një ditë para raportimit, presidenti i Serbisë, Aleksandar Vuçiq, i kërkoi sekretarit të përgjithshëm të NATO-s, Mark Rutte, që KFOR-i të mos e vazhdojë zvogëlimin gradual të pranisë në urën kryesore mbi Ibër.

Vuçiq deklaroi se tërheqja e KFOR-it në këtë moment mund të krijojë, siç u shpreh ai, “kushte për një përballje përfundimtare me popullsinë serbe” në veri të Kosovës.

NATO ka bërë të ditur se çdo vendim për hapjen e mundshme të urës për qarkullimin e automjeteve duhet të marrë parasysh nevojat e të gjitha komuniteteve lokale.

Një zyrtar i NATO-s i tha Radios Evropa e Lirë se KFOR-i do të vazhdojë të ofrojë mbështetjen e nevojshme të sigurisë, në mënyrë që përpjekjet diplomatike të Bashkimit Evropian të ecin përpara.

Aktualisht, ura kryesore mbi lumin Ibër përdoret vetëm nga këmbësorët. Qeveria e Kosovës kishte paralajmëruar në korrik të vitit 2024 se ura do të hapej edhe për automjetet, por kjo nismë shkaktoi tensione dhe reagime nga komuniteti ndërkombëtar.

The post Prania e KFOR-it në Urën e Ibrit po zvogëlohet, kërkohet rikthimi i automjeteve appeared first on Albeu.com.

Në një përgjigje për këtë çështje, BE-ja ka bërë thirrje që Policia e Kosovës të garantojë sigurinë për të gjitha komunitetet.

“Për qëndrimin e misionit të NATO-s në Kosovë i takon NATO-s të vendosë. Ne mund të konfirmojmë se BE-ja është njoftuar nga NATO-ja. Qëndrimi i BE-së për urën ka qenë gjithmonë i qartë dhe i mbështetur në nevojën për të siguruar se ajo u shërben të gjitha komuniteteve dhe komunave që i lidh, dhe të kontribuojë në bashkëpunim e raporte të mira mes tyre”, thuhet në përgjigjen e një zëdhënësi të BE-së për KOHËN.

Zyrtari i BE ka thënë se pas transferimit të pushtetit në komunat në veri, ka nevojë për përmirësim në bashkëpunimin mes komunave në fjalë dhe institucioneve të nivelit qendror.

“Është e rëndësishme që Policia e Kosovës të ofrojë siguri dhe mbrojtjen e të gjitha komuniteteve, në përputhje me parimet demokratike, të drejtat e njeriut dhe të sundimit të ligjit, në mënyrë që të gjithë të ndihen të sigurt”, thuhet në përgjigje.

“Të gjitha vendimet lidhur me urën duhet të marrin parasysh interesat dhe shqetësimet e të gjitha komuniteteve”.

The post KFOR njoftoi largimin nga ura e Ibrit, reagon BE: Jemi njoftuar, Policia e Kosovës të garantojë sigurinë për të gjitha komunitetet appeared first on Albeu.com.

Halil Geci ka reaguar me tone të ashpra ndaj opozitës, të cilën e akuzon se po përdor standarde të ndryshme për çështjet që lidhen me veriun e Kosovës dhe urën e Mitrovicës. Në një postim në Facebook, ai rikujton kritikat e mëparshme të opozitës ndaj Qeverisë së Albin Kurtit për vendosjen e autoritetit institucional në veri, duke theksuar se sot, kur zhvillimet rreth urës kanë ndryshuar, nga kundërshtarët e Kurtit nuk po dëgjohet e njëjta gjuhë kritike.

Sipas Gecit, kundërshtimi ndaj kryeministrit nuk lidhej gjithmonë me vetë vendimet, por me faktin se ato merreshin nga Kurti. Ai pretendon se opozita e ka justifikuar në të kaluarën tërheqjen ose mosveprimin me arsyetimin se këtë e kërkonte presioni ndërkombëtar, ndërsa të njëjtin shpjegim nuk e ka përdorur kur ka qenë në pushtet, përcjell “Bota sot”.

Duke iu referuar historisë politike të veriut dhe Mitrovicës, Geci kërkon që opozita të shpjegojë se cili është qëndrimi i saj aktual për praninë e institucioneve dhe autoritetin e shtetit të Kosovës në atë pjesë të vendit.

Ai e interpreton heshtjen e opozitës si tregues se, sipas tij, sulmi politik ndaj Kurtit është vendosur mbi interesin shtetëror.

OPOZITA DJE KËRKONTE TËRHEQJEN NGA VERIU, SOT HESHT PËR URËN E MITROVICËS!

Në vitin 1999, Thaçi fliste për Mitrovicën e ndarë. Edhe pas 27 vitesh, pyetja vazhdon të mbetet e hapur: kush ka punuar realisht për ta kapërcyer këtë ndarje?

Dje dëgjohej pretendimi se “Amerika nuk po na lejon”, ndërsa sot, kur realiteti ka marrë një tjetër drejtim, heshtja e opozitës, sipas Gecit, tregon se problemi nuk ka qenë gjithmonë politika shtetërore, por personi që e zbatonte atë.

Kur Kosova synonte të vendoste sovranitetin e saj në veri, opozita dhe disa përfaqësues ndërkombëtarë kërkonin largimin e Policisë së Kosovës. Sot, kur KFOR-i është larguar nga ura dhe Evropa e ka miratuar këtë hap, të njëjtët kritikë nuk po reagojnë.

A ju kujtohet? Për ata që mund ta kenë harruar, po e përsëris.

A ju kujtohet kur Hashim Thaçi zhvillonte konferenca për media dhe deklaronte: “Fatkeqësisht, Mitrovica është e ndarë”? Përkthyesja Vlorë e përcillte mesazhin, ndërsa Thaçi u kërkonte protestuesve të largoheshin nga ura, duke thënë se çështja ishte nën mbikëqyrjen e KFOR-it.

Pas kaq vitesh, sipas Gecit, shtrohet pyetja se përse pushteti i asaj kohe e pranonte në praktikë ndarjen e Mitrovicës nën administrimin dhe mbikëqyrjen ndërkombëtare.

Sepse vetë Thaçi ishte “agjent i francezëve”.

A ju kujtohet se të njëjtën qasje politike e ndiqte edhe LDK-ja e Isa Mustafës?

Por le të ndalemi te vitet e fundit. A e dini se çfarë presioni iu ushtrua Albin Kurtit nga faktorë ndërkombëtarë dhe nga opozita vendore për ta larguar Policinë Speciale nga veriu?

Në atë periudhë, opozita dhe disa prej partnerëve ndërkombëtarë kërkonin me këmbëngulje tërheqjen e Policisë së Kosovës. Për disa prej tyre, dukej se ruajtja e qetësisë së çastit ishte më e rëndësishme sesa vendosja e autoritetit shtetëror në çdo pjesë të Kosovës.

Kurti bëri një hap prapa në atë moment, por, sipas Gecit, nuk hoqi dorë nga ideja e bashkimit.

Ai zgjodhi të ndërtonte ura të tjera, duke përcjellë edhe një mesazh të qartë politik: “Unë jam për ura që lidhin, jo për barriera që ndajnë.”

Sot KFOR-i është larguar nga ura e Mitrovicës dhe ky zhvillim është pranuar edhe nga pala evropiane.

Çfarë po bën ndërkohë opozita? Hesht.

Geci vlerëson se kjo heshtje flet më shumë se gjithë zhurma e bërë prej saj në të kaluarën. Kur Kurti përpiqej të shtrinte autoritetin e shtetit, thirrja e opozitës ishte: “Largojeni Policinë!” Tani, kur një zhvillim i ri në urë është pranuar edhe nga partnerët ndërkombëtarë, thuajse nuk dëgjohet asnjë reagim.

Prandaj shtrohet pyetja: ku qëndronte problemi atëherë?

Sipas Gecit, çështja nuk lidhej vetëm me urën. Ai pretendon se problemi qëndronte te opozita, e cila, kur bënte gabime, justifikohej duke thënë: “Amerika s’po na lë.” Ndërsa çdo veprim i ndërmarrë nga Kurti kritikohej menjëherë.

Kur vepronte, e sulmonin. Kur tërhiqej për shkak të presionit, përsëri e kritikonin. Edhe kur ndërtonte ura dhe përpiqej ta lidhte Mitrovicën, kundërshtimi ndaj tij vazhdonte.

Pra, për opozitën, problemi nuk ishte gjithmonë ajo që bënte Kurti, por fakti se ishte pikërisht Kurti ai që e bënte.

Edhe kur Kosova fitonte hapësirë institucionale në veri, kritikat nuk mungonin. Në këto kushte, pyetja është se çfarë kërkonte në të vërtetë opozita: një Kosovë më të fortë apo thjesht një mundësi tjetër për të sulmuar Kurtin?

Mos harroni se për më shumë se dy dekada, ju që sot jeni në opozitë keni pasur mundësinë ta drejtoni këtë vend. Pos hajnis, asgjë tjetër nuk kemi parë nga ju.

Keni qeverisur, keni marrë vendime, keni negociuar dhe keni lidhur marrëveshje.

Sipas kritikëve tuaj, shumë prej atyre viteve u karakterizuan nga keqqeverisja, korrupsioni, privatizimet e kontestuara dhe keqpërdorimi i pushtetit.

Kur ju kërkohej llogari për atë që ndodhte, përgjigjja ishte: “Amerika e ka në dorë. Çfarë të dojë ajo, atë bëjmë.”

Por a ju kujtohet edhe një tjetër moment? Në qendër të Prishtinës, përmes zërit të Presidentit Bill Clinton, Kosova mori një mesazh të qartë: “Ne ua sollëm lirinë; ju ndërtoni shtetin dhe paqen.”

Kjo do të thoshte se liria nuk iu dha Kosovës për të mbetur përgjithmonë e varur nga të tjerët. Asaj iu dha mundësia që të ndërtonte shtetin e vet.

Sot duhet t’ju bëhen disa pyetje. Nëse dje kërkonit tërheqjen e Kosovës nga veriu me arsyetimin se “kështu kërkojnë ndërkombëtarët”, përse sot heshtni kur zhvillimet po marrin një drejtim tjetër?

Nëse atëherë e cilësonit të rrezikshme vendosjen e institucioneve të Kosovës në veri, përse sot nuk e pranoni se shteti duhet të jetë i pranishëm në të gjithë territorin e tij?

Dhe nëse sot nuk keni asgjë për të thënë, atëherë mos na tregoni nesër se keni pasur të drejtë, duke na rrëfyer përralla me tupan.

Politika nuk nënkupton të bërtasësh sa herë që vepron kundërshtari dhe të heshtësh kur realiteti e rrëzon kritikën tënde. Ajo kërkon vizion, përgjegjësi dhe kujtesë.

Geci i drejton edhe një këshillë opozitës: Lëreni djalin të punojë. Nëse nuk mund ta ndihmoni, të paktën mos e pengoni.

Nëse nuk keni një alternativë, mos e cilësoni çdo veprim të tij si tradhti. Dhe nëse besoni se dini më shumë për politikën se ai, atëherë dëshmojeni përmes një programi dhe jo me britma në televizione.

Kosovës i duhet një opozitë e fortë, por jo një opozitë që e gjykon çdo çështje vetëm në bazë të interesit të saj elektoral.

Vendi ka nevojë për njerëz që dinë të ndërtojnë ura politike, institucionale dhe kombëtare, jo për njerëz që ushqehen me ndarjet.

Ura e Mitrovicës nuk përfaqëson vetëm betonin dhe hekurin. Ajo është një simbol.

Historia do të tregojë se kush ka punuar për t’i lidhur shqiptarët me shtetin e tyre dhe kush ka bërë politikë duke i mbajtur ata të ndarë.

Kosova nuk ka nevojë për nostalgjikë të ndarjeve. Ajo ka nevojë për shtet, sovranitet, drejtësi dhe bashkim.

The post Geci akuzon opozitën për standarde të dyfishta ndaj veriut dhe urës së Mitrovicës appeared first on Albeu.com.

Viktor Buzhala ka reaguar pas zhvillimeve të fundit për hapjen e urës kryesore mbi lumin Ibër, e cila ka qëndruar e mbyllur dhe ka ndarë Kosovën nga Serbia për 27 vjet. Ai e ka interpretuar këtë zhvillim si një arritje në favor të kryeministrit Albin Kurti.

Përmes një postimi në Facebook, Buzhala ka komentuar me ironi marrëdhënien e Kurtit me Bashkimin Evropian, duke pretenduar se kryeministri ka arritur ta bindë edhe BE-në për hapjen e urës.

“Albini po get e ka kapë edhe Bashkimin Europian. Imagjinojeni arriti me i bindë që me e hapë pas 27 vjetësh një urë që ka qenë e dizajnuar deri me 2020 me qenë pikë kufitare ndërmjet Kosovës dhe Serbisë”, ka shkruar ai, përcjell “Bota sot”.

Reagimi i tij është bërë pasi Bashkimi Evropian konfirmoi se janë plotësuar kushtet e nevojshme për hapjen e urës kryesore mbi Ibër në Mitrovicë.

Ky konfirmim pasoi vendimin e KFOR-it për të nisur një tranzicion gradual të pranisë së tij të përhershme ushtarake në këtë lokacion.

The post Albini po e bind edhe BE-në” – Viktor Buzhala komenton hapjen e urës së Ibrit dhe raportin me Kurtin appeared first on Albeu.com.

Bashkimi Evropian ka bërë të ditur se janë plotësuar kushtet teknike dhe politike për hapjen e urës kryesore mbi lumin Ibër në Mitrovicë. Ky zhvillim vjen pasi KFOR-i ka vendosur të nisë një kalim gradual nga prania e përhershme ushtarake në këtë pikë.

Ura, e cila prej vitesh simbolizon ndarjen mes dy pjesëve të Mitrovicës, vazhdon të mbetet në qendër të diskutimeve për sigurinë, lëvizjen e lirë dhe normalizimin e situatës në veri të Kosovës.

Konfirmimi i BE-së ka ngritur pyetjen nëse hapja e urës tashmë është vetëm çështje kohe, si dhe nëse zvogëlimi gradual i pranisë së përhershme të KFOR-it mund të ndikojë në stabilitetin dhe sigurinë e zonës.

Për “Bota sot”, publicisti Emin Azemi dhe ish-deputeti Adem Salihaj kanë dhënë vlerësimet e tyre për domethënien e këtij procesi, ndryshimet në terren dhe ndikimin e mundshëm të tij në jetën e qytetarëve të Mitrovicës.

Azemi e sheh hapjen e urës si një kthesë me rëndësi historike dhe politike për rajonin. Sipas tij, fakti që BE-ja ka konfirmuar përmbushjen e kushteve të nevojshme tregon se ekziston një vullnet i qartë ndërkombëtar për të avancuar procesin dhe se periudha e gjatë e bllokimit po shkon drejt përfundimit.

Ai vlerëson se legjitimiteti i dhënë nga Brukseli e zhvendos debatin nga pyetja nëse ura duhet të hapet, te mënyra praktike se si do të realizohet hapja. Sipas Azemit, ky hap mund të riformësojë dinamikën e dialogut mes Kosovës dhe Serbisë, si dhe të sjellë një qasje të re për masat e sigurisë në terren.

Në aspektin diplomatik, Azemi konsideron se zhvillimet e fundit dëshmojnë një ndryshim të peshës së negociatave. Ai thotë se po kalohet nga diskutimet e pafundme për çështje teknike drejt krijimit të fakteve të reja lidhur me sovranitetin territorial.

Publicisti shton se qëndrimi i BE-së dhe lëvizjet e NATO-s tregojnë se vendimmarrja ndërkombëtare po e anashkalon veton historike të Serbisë për veriun dhe po e zvogëlon rolin e Beogradit në këtë proces. Megjithatë, ai thekson se rruga e Prishtinës drejt strukturave evropiane mbetet e lidhur ngushtë me koordinimin e hapave strategjikë me aleatët perëndimorë.

Sipas tij, në kohën kur Brukseli pritet t’i shtojë kërkesat ndaj Kosovës për zbatimin e Asociacionit, ky proces mund të shërbejë si balancë politike ndaj lëshimeve të fundit që lidhen me sovranitetin.

Për Azemin, vendimi i KFOR-it për tranzicionin gradual të pranisë së tij ushtarake ka rëndësi të veçantë strategjike. Ai e interpreton këtë veprim si pasqyrim të një vlerësimi të ri për gjendjen e sigurisë dhe si shenjë besimi te kapacitetet e autoriteteve vendore për ruajtjen e rendit.

Ai nënvizon se procesi po zhvillohet me kujdes, me synim shmangien e krijimit të një vakumi sigurie. Stabiliteti në veri, sipas tij, do të varet nga bashkëpunimi i ngushtë mes forcave vendore dhe atyre ndërkombëtare. Në këtë kuadër, Policia e Kosovës ka filluar të marrë përsipër sigurimin e urës, duke zëvendësuar pikat statike të KFOR-it.

Azemi e konsideron këtë zhvillim një hap të rëndësishëm drejt normalizimit të jetës dhe garantimit të lëvizjes së lirë në Mitrovicë. Ai thotë se ura po largohet gradualisht nga roli i saj shumëvjeçar si simbol i ndarjes etnike dhe mund të shndërrohet në një pikë normale lidhëse urbane.

Sipas tij, qarkullimi i lirë i qytetarëve dhe mallrave do të ndikonte në integrimin ekonomik të dy pjesëve të qytetit, do ta lehtësonte jetën e përditshme dhe do të krijonte mundësi për më shumë bashkëpunim shoqëror mes komuniteteve. Ai vlerëson gjithashtu se dobësimi i këtij simboli të ndarjes mund të sjellë stabilitet politik e psikologjik për vendin, të rrisë sigurinë për investimet e huaja dhe të hapë rrugë për zhvillim më të qëndrueshëm ekonomik.

Ndërsa Adem Salihaj thotë se largimi i KFOR-it nga ura dhe vendosja e Policisë së Kosovës aty përbëjnë një hap të madh, madje të fundit, drejt normalizimit të plotë të situatës në veri.

Sipas Salihajt, për gati tri dekada Ura e Ibrit ka funksionuar si simbol i kufirit dhe ndarjes. Për vite me radhë, ajo përcillte idenë se në njërën anë ndodheshin shqiptarët, ndërsa në anën tjetër serbët dhe Serbia.

Ai kujton se deri para pesë vjetësh kalimi i shqiptarëve në veri konsiderohej tejet i rrezikshëm dhe se askush prej tyre nuk guxonte të shkelte në atë pjesë. Salihaj vlerëson se ndërtimi i dy urave alternative dhe vendosja e kontrollit të Qeverisë së Kosovës në veri ia kanë zbehur Urës së Ibrit rolin si vijë ndarëse.

Salihaj thotë se strukturat serbe, të cilat i lidh me Rojet e Urës dhe Brigadat e Veriut, e kanë humbur gjithnjë e më shumë ndikimin. Sipas tij, veprimtaria kryesore e tyre tashmë konsiston në shkrimin e grafiteve antishqiptare gjatë natës.

Ai e përshkruan urën si një simbol famëkeq që kujton se ende ekzistojnë njerëz që shpresojnë ta përdorin atë për të penguar vendosjen e kontrollit të plotë në atë pjesë të Kosovës. Salihaj e cilëson atë si simbol të ndarjes së Kosovës, projekt për të cilin, sipas tij, ka punuar shumë Vuçiqi, bashkë me disa bashkëpunëtorë në Kosovë dhe Shqipëri.

Salihaj shprehet se normalizimi i plotë i jetës në veri tashmë është i sigurt dhe se ai pritet të ndodhë brenda muajsh. Megjithatë, ai thekson se për realizimin e këtij procesi ende mbetet punë për t’u bërë.

The post BE-ja konfirmon përmbushjen e kushteve, hapja e Urës së Ibrit mund të jetë pranë appeared first on Albeu.com.

Ish-presidentja e vendit, Vjosa Osman, e ka përshëndetur hapjen e urës kryesore mbi lumin Ibër në Mitrovicë, si dhe bartjen e përgjegjësive te Policia e Kosovës.

Përmes një postimi në Facebook, Osmani deklaroi se këto veprime shënojnë një hap me rëndësi për integrimin e plotë të të gjitha pjesëve të territorit të Kosovës dhe për fuqizimin e rendit dhe të ligjit.

Sipas saj, për më shumë se 27 vjet, ndarja e Mitrovicës nuk shkaktoi vetëm pasiguri dhe vështirësi në sundimin e ligjit, por krijoi mundësi edhe për spastrimin etnik të shqiptarëve dhe uzurpimin e pronave të tyre. Njëkohësisht, siç theksoi ajo, kjo situatë i shërbeu Serbisë si alibi për të vijuar synimet e saj hegjemoniste për ndarjen e Kosovës.

Osmani vlerësoi se lëvizja e lirë nëpër urën kryesore mbi Ibër, përtej afrimit të njerëzve, përfaqëson para së gjithash një moment historik në kundërshtimin e përpjekjeve të Serbisë për gllabërimin e territoreve.

Ajo shtoi se, megjithëse ky zhvillim ka ardhur pas vonesash të mëdha, do të ndikojë në ngritjen e nivelit të sigurisë dhe në forcimin e paqes së qëndrueshme në vend.

Në fund, Osmani shprehu mirënjohje për të gjitha institucionet që janë angazhuar ndër vite për të arritur deri në këtë pikë, duke veçuar Policinë e Kosovës, e cila, sipas saj, vazhdon të mbajë përgjegjësinë kryesore për sigurinë në çdo pjesë të territorit dhe për secilin qytetar të vendit.

The post Osmani: Hapja e Urës së Ibrit, moment historik përballë përpjekjeve të Serbisë për ndarjen e Kosovës appeared first on Albeu.com.

Nisja e një tranzicioni gradual të pranisë së përhershme të KFOR-it nga ura kryesore mbi lumin Ibër në Mitrovicë, si dhe përfshirja hap pas hapi e Policisë së Kosovës në arkitekturën e sigurisë së misionit në Manastirin e Deçanit, vlerësohen si zhvillime të rëndësishme për stabilitetin dhe sigurinë në Kosovë.

Ky proces pason vlerësimin se gjendja e sigurisë është përmirësuar dhe, njëkohësisht, shton përgjegjësinë e institucioneve kosovare për ruajtjen e rendit, sidomos në pjesën veriore të vendit. Ndryshimi i modelit të pranisë së KFOR-it në urën e Ibrit mbart gjithashtu domethënie politike dhe simbolike, pasi për shumë vjet ajo ka qenë një prej pikave më të ndjeshme që ka mishëruar ndarjen e Mitrovicës.

Sipas analistëve, lëvizja graduale e KFOR-it nga ura kryesore nuk nënkupton largimin e NATO-s prej Kosovës. Ata e interpretojnë atë si rritje të rolit të institucioneve vendore, forcim të sovranitetit institucional dhe një sinjal të rëndësishëm për konsolidimin e shtetit.

Në aspektin diplomatik dhe politik, ky hap shihet edhe si shenjë e besimit më të madh të partnerëve euroatlantikë ndaj institucioneve të Kosovës. Megjithatë, vlerësohet se procesi duhet të shoqërohet me masa konkrete dhe me një politikë ndërkombëtare më të qartë, ku përfshihet edhe përparimi i Kosovës drejt strukturave euroatlantike.

Tahiraj: Kosovës i duhen vendime të guximshme, jo “sheqerka”

Publicisti dhe veprimtari Saim Tahiraj, duke folur për “Bota sot”, e ka përshëndetur veprimin e fundit të NATO-s. Ai ka shprehur shpresën që nisma të jetë serioze dhe të përfaqësojë një nisje të mirë.

Sipas Tahirajt, megjithatë, vendimet dhe veprimet e ndërmarra më herët në të dyja rastet kanë qenë të dëmshme dhe i kanë kushtuar shumë Kosovës. Ai ka kritikuar veçanërisht ndarjen e Mitrovicës dhe vendosjen e KFOR-it francez në urën mbi Ibër, të cilat i ka lidhur me një varg gabimesh historike që, sipas tij, shqiptarët i kanë paguar me copëtim territoresh, masakra dhe gjenocide të njëpasnjëshme.

Tahiraj ka deklaruar se Traktati i Shën Stefanit i dëmtoi rëndë shqiptarët, ndërsa Kongresi i Berlinit, me shumë pak ndryshime, vazhdoi të njëjtën politikë. Sipas tij, pushtimet dhe spastrimet e shumta etnike kanë bërë që shqiptarët të jenë sot ndër popujt më të shpërndarë në botë.

Ai ka thënë se shumë territore shqiptare mbetën nën okupimin e shteteve fqinje, të cilat i ka cilësuar grabitqare dhe të mbështetura nga fuqitë evropiane e Perandoria Osmane. Në vlerësimin e tij, historia shqiptare dëshmon se fuqitë e mëdha shpesh kanë vendosur pa i pyetur popujt dhe në dëm të tyre.

Publicisti ka theksuar se ekzistenca e sotme e dy shteteve shqiptare u mundësua falë përkrahjes së fuqishme të Austrisë dhe, më vonë, të Shteteve të Bashkuara të Amerikës. Ai ka shtuar se një pjesë e gabimeve historike të Evropës u korrigjuan vetëm pjesërisht dhe kjo ndodhi falë mbështetjes së fortë amerikane.

Duke iu referuar ndërhyrjes së NATO-s në Kosovë, Tahiraj ka pohuar se disa vende që historikisht e kishin përkrahur Serbinë tentuan ta sabotonin atë. Në të njëjtën linjë, sipas tij, duhet të interpretohen edhe ndarja e Mitrovicës nga francezët dhe vënia e disa objekteve fetare nën mbrojtje të posaçme, duke krijuar një gjendje që ai e konsideron të papranueshme për një shtet sovran.

Ai ka vlerësuar se dislokimi i KFOR-it në urën e Ibrit nuk mund të trajtohet vetëm si masë teknike sigurie, sepse për vite të tëra ka prodhuar simbolikën e ndarjes, në vend të asaj të bashkimit.

Sipas Tahirajt, me kujdes të veçantë duhet trajtuar edhe prania e KFOR-it në pikat e kontrollit në hyrje dhe në dalje të rrugës përgjatë Manastirit të Deçanit. Masa të tilla, ka argumentuar ai, nuk duhet të kthehen në mekanizma të përhershëm që dëmtojnë sovranitetin dhe pengojnë funksionimin normal të shtetit të Kosovës.

Tahiraj ka thënë se shqiptarët i kanë ndërtuar, ruajtur dhe mbrojtur ndër shekuj trashëgimitë e tyre, ndaj ka ngritur pyetjen se përse sot konsiderohet e domosdoshme që këto objekte të ruhen nga struktura të huaja ushtarake. Nëse Kosova është shtet i lirë dhe sovran, sipas tij, institucionet e saj duhet ta kenë kapacitetin dhe përgjegjësinë për mbrojtjen pa dallim të çdo objekti të trashëgimisë kulturore dhe fetare.

Ai e ka quajtur të mirëpritur nismën e NATO-s, me kusht që synimi i saj të jetë transferimi gradual i përgjegjësive te institucionet kosovare. Tahiraj ka shprehur dëshirën që ky proces të vazhdojë dhe të zbatohet tërësisht.

Në përfundim, ai ka kërkuar që ura mbi Ibër të hapet plotësisht. Sipas tij, urat kanë për qëllim afrimin e njerëzve dhe jo ndarjen e tyre, prandaj një urë që ndodhet në zemër të qytetit nuk duhet të mbetet pafundësisht shenjë e ndarjes.

Tahiraj i ka bërë thirrje Bashkësisë Ndërkombëtare dhe Bashkimit Evropian që ta ndryshojnë politikën ndaj Kosovës. Ai ka thënë se vendit nuk i nevojiten më masa kalimtare, zgjidhje të paplota apo pengesa të tjera, por një perspektivë e përcaktuar politike dhe institucionale, si dhe integrim i shpejtë në strukturat euroatlantike.

Sipas tij, edhe NATO duhet ta afrojë Kosovën me anëtarësimin e plotë, pasi vendi nuk paraqet rrezik për stabilitetin e rajonit. Përkundrazi, Tahiraj ka vlerësuar se anëtarësimi i Kosovës në strukturat euroatlantike do të shtonte garancitë për paqen dhe qëndrueshmërinë rajonale.

Ai ka paralajmëruar se nismat që mbeten vetëm simbolike shndërrohen në “sheqerka” për qetësimin e përkohshëm të Kosovës. Sipas tij, vendi nuk ka nevojë për masa të tilla, por për vendime të guximshme, hapa konkretë dhe një politikë të qartë nga Bashkësia Ndërkombëtare. Tahiraj ka përfunduar për “Bota sot” se historia ka dhënë mjaftueshëm mësime dhe se ka ardhur koha që ajo të mos përsëritet.

Halili: Ndryshimi i pranisë së KFOR-it është sinjal i rëndësishëm për sigurinë

Analisti politik Nijazi Halili, në një prononcim për “Bota sot”, ka deklaruar se procesi nuk duhet të përshkruhet si tërheqje e NATO-s nga Kosova. Sipas tij, bëhet fjalë për një transformim gradual të mënyrës se si organizohen prania dhe përgjegjësitë në fushën e sigurisë.

Halili ka thënë se vendimi i KFOR-it për nisjen e tranzicionit gradual të pranisë së tij të përhershme nga ura kryesore mbi lumin Ibër në Mitrovicë duhet të kuptohet, para së gjithash, si një etapë me rëndësi në zhvillimin e arkitekturës së sigurisë në Kosovë dhe jo si largim i NATO-s.

Ai ka rikujtuar se vetë KFOR-i e ka cilësuar procesin si gradual, të varur nga situata në terren dhe të bashkërenduar me institucionet kosovare, Policinë e Kosovës, EULEX-in dhe aktorët e tjerë përkatës. Misioni ka bërë të ditur gjithashtu se do të vazhdojë ta ketë të dukshme praninë e tij në Mitrovicën e Veriut, Mitrovicën e Jugut dhe në zona të tjera të veriut.

Për këtë arsye, sipas Halilit, zhvillimet në urën e Ibrit nuk krijojnë “vakum sigurie”. Ato shënojnë një kalim të kujdesshëm nga prania statike ndërkombëtare drejt një modeli ku institucionet vendore të sigurisë marrin përsipër më shumë detyra.

Ai e ka cilësuar veçanërisht domethënës faktin që ndryshimi në urën e Ibrit po ecën paralelisht me përfshirjen graduale të pjesëtarëve të Policisë së Kosovës në sistemin e sigurisë së KFOR-it në Manastirin e Deçanit. Sipas tij, zhvillimet në këto dy vende me ndjeshmëri të lartë politike dhe ndëretnike tregojnë se NATO po e konsideron gjithnjë e më shumë Policinë e Kosovës si pjesë të strukturës që duhet të jetë e aftë të sigurojë rend dhe mbrojtje për të gjitha komunitetet.

Halili ka vlerësuar se tranzicioni në urën mbi Ibër përcjell një mesazh të rëndësishëm edhe në planin politik e diplomatik. Duke qenë për vite një prej simboleve më të ndjeshme të ndarjes së Mitrovicës, ndryshimi i pranisë së NATO-s në këtë pikë tregon, sipas tij, se kushtet e sigurisë janë përmirësuar në një nivel që lejon përshtatjen e modelit të angazhimit ndërkombëtar.

Në vlerësimin e analistit, kjo dëshmon edhe për një shkallë më të lartë besimi në aftësitë e institucioneve vendore për menaxhimin e sigurisë. Megjithatë, ai ka nënvizuar se duhet dalluar qartë tërheqja e NATO-s nga optimizimi i pranisë së saj, pasi bëhet fjalë për të dytën.

Halili ka theksuar se KFOR-i nuk po largohet nga veriu dhe as nuk po heq dorë nga detyrimi për të reaguar. Përkundrazi, misioni ka deklaruar se personeli është vendosur në mënyrë të tillë që të mund t’u përgjigjet zhvillimeve relevante, ndërsa angazhimi për krijimin e një mjedisi të sigurt për të gjitha komunitetet do të vazhdojë.

Sipas tij, këtu gjendet edhe porosia kryesore për Serbinë dhe për cilindo aktor që mund të përpiqet ta destabilizojë veriun. Prania ndërkombëtare nuk po pasohet nga mungesa e sigurisë, por nga forcimi i përgjegjësisë së institucioneve vendore nën mbështetjen e vazhdueshme të NATO-s. Halili e ka cilësuar këtë shumë më domethënëse sesa heqjen e një pike statike nga një urë.

Analisti ka deklaruar se procesi mund të ndikojë gjithashtu në narrativat politike dhe diplomatike për veriun e Kosovës. Sipas tij, zhvillimi e dobëson pretendimin se kjo pjesë e vendit është domosdoshmërisht një hapësirë ku institucionet kosovare nuk mund t’i ushtrojnë normalisht përgjegjësitë e sigurisë.

Përfshirja e Policisë së Kosovës në strukturën e sigurisë së KFOR-it në Deçan dhe kalimi gradual i përgjegjësive në pika të tjera të ndjeshme, sipas Halilit, krijojnë një precedent të rëndësishëm. Institucionet kosovare duhet të mbajnë përgjegjësinë kryesore për sigurinë, ndërsa NATO të vazhdojë të shërbejë si garanci e jashtme dhe faktor stabiliteti.

Halili e ka lidhur këtë zhvillim edhe me konsolidimin institucional të Kosovës. Ai ka thënë se besimi nuk dëshmohet vetëm përmes deklaratave politike, por edhe kur një mision ndërkombëtar si KFOR-i vlerëson se prania e tij statike mund të reduktohet në një prej zonave më të ndjeshme të vendit, pa e rrezikuar sigurinë dhe pa e humbur mundësinë për ndërhyrje.

Megjithatë, ai ka kërkuar që procesi të drejtohet me kujdes të madh. Zvogëlimi i pranisë statike të KFOR-it, sipas Halilit, nuk duhet të krijojë përshtypjen se problemet e sigurisë në veri janë zgjidhur përfundimisht.

Ai ka theksuar se stabiliteti në atë zonë vazhdon të jetë i brishtë dhe kërkon bashkërendim të pandërprerë ndërmjet Policisë së Kosovës, KFOR-it dhe EULEX-it. Përshkrimi i tranzicionit nga KFOR-i si “gradual” dhe “condition-based” dëshmon, sipas tij, se NATO nuk po vepron mbi një vlerësim politik të njëanshëm, por duke u mbështetur në kushtet reale të sigurisë në terren.

Në përmbyllje, Halili ka thënë se zhvillimi duhet pritur me optimizëm, por njëherësh edhe me përgjegjësi nga institucionet e Kosovës. Ai e ka cilësuar atë si tregues të përmirësimit të gjendjes së sigurisë dhe të zgjerimit të rolit institucional të Kosovës, por edhe si provë për pjekurinë e institucioneve të saj.

Sipas tij, rritja e përgjegjësive të institucioneve vendore duhet të shoqërohet me rritjen e aftësisë së tyre për të siguruar rendin, lëvizjen e lirë, sigurinë dhe mbrojtjen e barabartë për secilin komunitet.

Halili ka përfunduar për “Bota sot” se mesazhi strategjik i procesit është i qartë: Kosova nuk po lëviz nga siguria ndërkombëtare drejt pasigurisë. Ajo po kalon nga një skemë ku KFOR-i garantonte drejtpërdrejt sigurinë në pika të caktuara përmes pranisë statike, në një model ku institucionet e Kosovës marrin më shumë përgjegjësi, ndërsa NATO mban praninë, kapacitetin dhe mandatin për të ndërhyrë kur rrethanat e kërkojnë. Në thelb, sipas tij, ky është sinjal i konsolidimit të shtetit dhe i shtimit gradual të besimit të partnerëve euroatlantikë në institucionet kosovare të sigurisë.

The post Kalimi gradual i përgjegjësive nga KFOR-i, mesazh politik me peshë për Kosovën appeared first on Albeu.com.

Siguria në urën kryesore mbi lumin Ibër në Mitrovicë ka nisur të kalojë nën përgjegjësinë e Policisë së Kosovës. Në të njëjtën kohë, këtij institucioni po i besohen detyra të reja edhe në hapësirën përreth Manastirit të Deçanit.

Ndryshimet po realizohen si pjesë e kalimit gradual nga prania e përhershme e KFOR-it drejt një përfshirjeje më të madhe të Policisë së Kosovës në strukturën e sigurisë. Ky proces po vlerësohet si një hap i rëndësishëm në forcimin e institucioneve vendore që kujdesen për rendin dhe sigurinë.

Për peshën politike dhe institucionale të këtij zhvillimi, sinjalin që i dërgohet Beogradit dhe ndikimin e mundshëm në diskutimet e brendshme politike në Kosovë, avokati Gazmend Halilaj foli në një bashkëbisedim me “Bota sot”.

Halilaj vlerësoi se transferimi në etapa i përgjegjësive tek institucionet kosovare nuk përfaqëson dobësim të sigurisë ose të pranisë ndërkombëtare. Sipas tij, kjo tregon se institucionet e Republikës së Kosovës kanë shtuar kapacitetet dhe janë të gatshme të marrin më shumë përgjegjësi.

Duke iu referuar vendimit të KFOR-it për të ndryshuar gradualisht praninë e përhershme në urën kryesore mbi lumin Ibër në Mitrovicë, në përputhje me përmirësimin e gjendjes së sigurisë, ai e cilësoi këtë si një zhvillim veçanërisht të rëndësishëm për Kosovën. Sipas Halilajt, procesi dëshmon se strukturat e sigurisë dhe institucionet e Republikës së Kosovës po konsolidohen, duke marrë një rol gjithnjë e më të madh në garantimin e rendit dhe sigurisë në të gjithë territorin e vendit.

Ai nënvizoi se KFOR-i vazhdon të ketë rëndësi të madhe për qëndrueshmërinë në Kosovë dhe në rajon. Megjithatë, sipas tij, objektivi i çdo shteti demokratik është që institucionet vendore të kenë aftësinë t’i përmbushin në mënyrë efikase përgjegjësitë e tyre. Për këtë arsye, zhvendosja graduale e KFOR-it nga një prani e përhershme drejt një roli më fleksibil duhet kuptuar si tregues i stabilitetit më të madh dhe i fuqizimit të kapaciteteve vendore, e jo si cenim i sigurisë.

Avokati i dha rëndësi të veçantë edhe përfshirjes graduale të Policisë së Kosovës në arkitekturën e sigurisë së KFOR-it në Manastirin e Deçanit.

Në vlerësimin e tij, ky hap tregon se roli i Policisë së Kosovës po zgjerohet dhe besimi ndaj saj po rritet, sidomos në vende ku problematikat e sigurisë janë ndërthurur shpesh me tensione politike dhe etnike.

Halilaj tha se integrimi në etapa i Policisë së Kosovës në sistemin e sigurisë së KFOR-it në Manastirin e Deçanit ka peshë të konsiderueshme institucionale. Ai theksoi se Policia e Kosovës po trajtohet gjithnjë e më tepër si një institucion profesional dhe me rëndësi për sigurinë në Republikën e Kosovës, çka merr vlerë të posaçme në zonat ku siguria është shfrytëzuar shpesh si mjet për tensione politike dhe etnike.

Sipas Halilajt, zhvillimet e fundit përmbajnë gjithashtu një mesazh të drejtpërdrejtë për Beogradin: përgjegjësinë për sigurinë në Kosovë e mbajnë institucionet e Republikës së Kosovës.

Ai sqaroi se fuqizimi institucional nuk duhet paraqitur si një masë e drejtuar kundër ndonjë komuniteti. Përkundrazi, sipas tij, bëhet fjalë për forcimin e rendit kushtetues dhe të organizimit institucional të Kosovës.

Avokati deklaroi se Beogradi duhet ta kuptojë qartë se çdo hap që fuqizon institucionet përgjegjëse për sigurinë në Kosovë ndihmon stabilitetin afatgjatë. Ai përsëriti se procesi nuk është kundër ndonjë komuniteti, por synon konsolidimin e rendit kushtetues dhe institucional të vendit.

Për faktorët politikë brenda Kosovës që e kundërshtojnë ose e minimizojnë forcimin e institucioneve shtetërore, Halilaj tha se ky zhvillim duhet të shërbejë si dëshmi se ngritja e institucioneve profesionale dhe funksionale është në dobi të të gjithë qytetarëve, pa dallim përkatësie etnike ose politike.

Duke folur për efektin në planin politik, ai tha se Qeveria e Kosovës mund ta paraqesë këtë zhvillim edhe si arritje politike. Megjithatë, Halilaj theksoi se fuqizimi i institucioneve të sigurisë nuk mund të konsiderohet meritë vetëm e një qeverie ose partie të caktuar.

Sipas tij, çështja e sigurisë përbën interes shtetëror, ndaj çdo përparim i arritur në këtë drejtim duhet të vlerësohet si sukses i përbashkët i institucioneve të Kosovës.

Halilaj u shpreh se rritja e besimit në aftësitë vendore dhe forcimi i strukturave të sigurisë janë zhvillime pozitive për shtetin, prandaj është e natyrshme që Qeveria e Kosovës t’i konsiderojë edhe si sukses politik. Sidoqoftë, ai e quajti të padrejtë që një proces i tillë institucional të përvetësohet nga një qeveri apo forcë politike, pasi siguria e Republikës së Kosovës është interes shtetëror dhe rezultatet në këtë sektor u përkasin institucioneve të vendit në tërësi.

Në përmbyllje, Halilaj kërkoi që edhe opozita t’i qaset këtij zhvillimi me përgjegjësi shtetërore. Ai vlerësoi se kundërshtimet ndaj Qeverisë nuk duhet të kthehen në pengesë për proceset që fuqizojnë institucionet e sigurisë.

Sipas tij, përparësi duhet të kenë interesat e shtetit dhe jo përfitimet partiake, sepse qeveritë dhe partitë ndërrohen, ndërsa institucionet shtetërore vazhdojnë të ekzistojnë.

Ai theksoi se opozita mund ta kritikojë Qeverinë për shumë çështje, por përmirësimi i sigurisë, forcimi i Policisë së Kosovës dhe shtimi i përgjegjësive të institucioneve të Republikës nuk duhet të shndërrohen në një përplasje të zakonshme mes partive.

Gazmend Halilaj e përfundoi prononcimin për “Bota sot” duke rikujtuar se partitë hyjnë dhe dalin nga skena, qeveritë ndryshojnë, ndërsa institucionet e shtetit mbeten. Pikërisht për këtë arsye, sipas tij, ky është një rast në të cilin interesi shtetëror duhet të vendoset mbi interesin partiak.

The post KFOR-i nis transferimin e përgjegjësive te Policia e Kosovës në Urën e Ibrit dhe Manastirin e Deçanit, Halilaj shpjegon domethënien appeared first on Albeu.com.

Prania e përhershme e KFOR-it në urën kryesore mbi lumin Ibër, në Mitrovicë, do t’i nënshtrohet një tranzicioni gradual. Misioni e ka arsyetuar këtë vendim me përmirësimin e gjendjes së sigurisë në Kosovë.

Në kuadër të këtij procesi, Policia e Kosovës ka filluar të marrë përsipër sigurinë në urën kryesore mbi Ibër. Asaj po i kalojnë gradualisht përgjegjësi të reja edhe në hapësirën përreth Manastirit të Deçanit.

Kalimi i këtyre detyrave konsiderohet një zhvillim i rëndësishëm për fuqizimin e kapaciteteve të institucioneve të Kosovës në garantimin e sigurisë në të gjithë territorin. Njëkohësisht, ai shihet edhe si sinjal politik ndaj Beogradit dhe atyre që kundërshtojnë forcimin e institucioneve të Republikës së Kosovës.

Veprimtari shqiptar në SHBA, Agim Aliçkaj, duke folur për “Bota sot”, e vlerësoi njoftimin e KFOR-it si një lajm shumë pozitiv për shtetin e Kosovës. Sipas tij, ky hap dëshmon se institucionet shtetërore po vazhdojnë punën dhe po marrin gjithnjë e më shumë kompetenca në sektorin e sigurisë.

Aliçkaj tha se tranzicioni gradual i mbikëqyrjes së Urës kryesore të Ibrit nga KFOR-i, së bashku me përfshirjen graduale të Policisë së Kosovës në sigurimin e Manastirit të Deçanit, përbëjnë lajme shumë të mira për Kosovën. Ai theksoi se shteti po funksionon pavarësisht vështirësive në krijimin e institucioneve, të cilat, sipas tij, janë shkaktuar kryesisht nga bllokadat e humbësve të zgjedhjeve.

Ai shtoi se në raste të tilla shfaqen shumë zëra që përpiqen ta përvetësojnë një arritje të madhe, duke kujtuar shprehjen se suksesi ka shumë baballarë, ndërsa dështimi mbetet jetim. Megjithatë, sipas Aliçkajt, merita kryesore për këtë zhvillim i takon Kryeministrit Kurti dhe Policisë së Kosovës.

Duke analizuar rëndësinë simbolike të Urës së Ibrit, Aliçkaj e përshkroi atë si një pikë kyçe për bashkimin e Mitrovicës dhe për integrimin e veriut të Kosovës në funksionimin e shtetit.

Sipas tij, urat shërbejnë për t’i afruar njerëzit, ndërsa Ura e Ibrit simbolizon bashkimin e Mitrovicës dhe të Veriut të Kosovës, si dhe funksionimin e vendit si një shtet i fuqishëm dhe unik në të gjithë territorin e tij të njohur ndërkombëtarisht.

Aliçkaj kujtoi se, pas rrezikut për konfrontim me KFOR-in lidhur me urën kryesore mbi Ibër, Qeveria e Kosovës bëri një tërheqje strategjike. Ai e cilësoi si të matur dhe shumë të mençur vendimin për ndërtimin e urave të reja mbi lumin Ibër, duke shtuar se projekti u zbatua shpejt dhe në mënyrë profesionale.

Në vlerësimin e tij, urat e reja e kanë zbehur rëndësinë e urës së kontrolluar nga KFOR-i. Funksionimi i tyre, sipas Aliçkajt, ka treguar se lidhja dhe qarkullimi ndërmjet pjesëve të Mitrovicës mund të zhvillohen normalisht, pa krijuar asnjë rrezik për banorët e Veriut të Kosovës, përfshirë minoritetin serb.

Ai theksoi se këto ura janë në interesin e të gjithëve, pasi ua bëjnë jetën më të lehtë qytetarëve pa dallim nacionaliteti. Aliçkaj vlerësoi gjithashtu se Policia e Kosovës po dëshmon çdo ditë se është e organizuar, profesionale dhe e aftë për të garantuar sigurinë e popullit të Kosovës.

Sipas tij, puna e Policisë së Kosovës ia lehtëson ndjeshëm detyrat KFOR-it. Kjo i jep misionit mundësi të zvogëlojë numrin e trupave të angazhuara në sigurinë e brendshme dhe t’i orientojë ato drejt mbrojtjes së kufijve të shtetit të Kosovës.

Lidhur me Manastirin e Deçanit, Aliçkaj tha se marrja në mënyrë graduale e përgjegjësive nga Policia e Kosovës dëshmon rritjen e besimit ndërkombëtar ndaj institucioneve vendore dhe aftësisë së tyre për të mbrojtur objekte me rëndësi kulturore.

Ai deklaroi se Manastiri i Deçanit historikisht është ruajtur dhe mbrojtur gjithmonë nga shqiptarët, pasi përbën një vlerë kombëtare, pavarësisht se, sipas tij, është përvetësuar me forcë dhe në mënyrë ilegale nga Kisha Ortodokse Serbe. Aliçkaj shtoi se Policia e Kosovës ka fituar besimin e faktorit ndërkombëtar se mund t’i mbrojë vlerat kulturore të Kosovës.

Duke komentuar kundërshtimet e Listës Serbe ndaj vendimeve të KFOR-it, ai tha se një reagim i tillë ishte i pritshëm dhe se pasqyron kundërshtimin ndaj fuqizimit të institucioneve të Kosovës. Sipas tij, zhvillimi përçon një mesazh të qartë për Beogradin.

Aliçkaj e cilësoi Listën Serbe si një organizatë armiqësore, të instaluar dhe të kontrolluar nga regjimi serb me qëllim shkatërrimin e Kosovës. Ai tha se ëndrrat e Beogradit për ripushtimin e Kosovës nuk mund të realizohen. Sipas tij, sa më shpejt që minoriteti serb të largohet nga ndikimi i Listës Serbe dhe Serbisë, duke e pranuar dhe duke i shërbyer shtetit të Kosovës, aq më mirë do të jetë për të.

Ky proces pritet të përfshihet edhe në debatin e brendshëm politik, sidomos në raport me opozitën dhe qëndrimin e saj ndaj arritjeve të institucioneve të Kosovës. Aliçkaj vlerësoi se përplasjet mes palëve politike nuk duhet të pengojnë funksionimin e shtetit.

Ai akuzoi opozitën e Kosovës se po vazhdon bojkotimin e shtetit, si dhe mohimin dhe shpërfilljen e kësaj arritjeje dhe të çdo rezultati tjetër të Kryeministrit Kurti e koalicionit të tij. Aliçkaj theksoi se Kurti i ka marrë votat e qytetarëve për të qeverisur edhe për të tretën herë.

Sipas tij, opozita, në vend që të zbatojë vullnetin e popullit, të mundësojë qeverisjen normale dhe të votojë një president jopartiak konsensual, po vijon të njëjtat veprime destruktive, të cilat qytetarët i kuptojnë dhe i ndëshkojnë. Ai deklaroi se sa më shpejt që drejtuesit e opozitës të shkëputen nga Rama, Grenelli, oligarkët dhe shtypi i shitur tek armiqtë e Kosovës, aq më mirë do të jetë si për ta, ashtu edhe për Republikën e Kosovës.

Në përfundim, Aliçkaj kërkoi që zhvillimet në sektorin e sigurisë të vlerësohen përtej interesave partiake dhe si pjesë e procesit të forcimit të shtetit të Kosovës.

Ai përmbylli deklaratën për “Bota sot” duke thënë se votat e qytetarëve nuk mund të fitohen pa një program pozitiv dhe realist për qeverisjen. Sipas Agim Aliçkajt, shteti nuk duhet dëmtuar me shpresën se në këtë mënyrë dobësohet kundërshtari politik, sepse pa shtet nuk mund të ketë parti politike.

The post KFOR-i nis tërheqjen graduale nga Ura e Ibrit, Aliçkaj: Kurti dhe Policia e Kosovës kanë meritën kryesore appeared first on Albeu.com.

Policia e Kosovës ka filluar të marrë përsipër detyrat e sigurisë në urën kryesore mbi lumin Ibër në Mitrovicë. Njëkohësisht, asaj po i transferohen përgjegjësi të tjera edhe në hapësirën përreth Manastirit të Deçanit.

Procesi është pjesë e kalimit gradual nga prania e përhershme e KFOR-it drejt përfshirjes më të madhe të Policisë së Kosovës në arkitekturën e sigurisë. Ky ndryshim po vlerësohet si një hap i rëndësishëm në konsolidimin e institucioneve vendore të sigurisë.

Për peshën politike dhe institucionale të këtij zhvillimi, sinjalin që i dërgohet Beogradit dhe efektet e mundshme në diskutimet e brendshme politike në Kosovë, avokati Gazmend Halilaj foli në një bashkëbisedim me “Bota sot”.

Halilaj vlerësoi se transferimi në etapa i përgjegjësive tek institucionet kosovare nuk përfaqëson dobësim të sigurisë ose të rolit ndërkombëtar. Përkundrazi, sipas tij, ai tregon se institucionet e Republikës së Kosovës kanë zgjeruar kapacitetet dhe po marrin më shumë përgjegjësi.

“Për Kosovën ka rëndësi të veçantë vendimi i KFOR-it që, pas përmirësimit të gjendjes së sigurisë, ta ndryshojë gradualisht praninë e tij të përhershme në urën kryesore mbi lumin Ibër në Mitrovicë. Para së gjithash, ky zhvillim duhet kuptuar si dëshmi se strukturat e sigurisë dhe institucionet e Republikës së Kosovës janë duke u fuqizuar, ndërsa po marrin vazhdimisht më shumë detyra për ruajtjen e rendit dhe sigurisë në të gjithë territorin e vendit.

Roli i KFOR-it vazhdon të jetë jashtëzakonisht i rëndësishëm për stabilitetin e Kosovës dhe të rajonit. Megjithatë, objektiv i çdo shteti demokratik duhet të jetë aftësimi i institucioneve të veta për t’i përmbushur me efikasitet përgjegjësitë që kanë. Prandaj, kalimi në mënyrë graduale nga prania e përhershme e KFOR-it në një angazhim më fleksibil nuk nënkupton më pak siguri, por pasqyron një gjendje më të qëndrueshme dhe kapacitete më të mëdha vendore”, deklaroi Halilaj.

Avokati i kushtoi rëndësi edhe përfshirjes graduale të Policisë së Kosovës në arkitekturën e sigurisë së KFOR-it në Manastirin e Deçanit.

Sipas tij, ky proces tregon se është shtuar roli i Policisë së Kosovës dhe besimi ndaj saj, sidomos në zonat ku çështjet e sigurisë shpesh janë ndërthurur me tensione politike e etnike.

“Peshë të konsiderueshme institucionale ka gjithashtu integrimi hap pas hapi i Policisë së Kosovës në arkitekturën e sigurisë së KFOR-it në Manastirin e Deçanit. Ky ndryshim dëshmon se Policia e Kosovës po njihet gjithnjë e më tepër si një institucion profesional dhe i rëndësishëm i sigurisë në Republikën e Kosovës. Kjo merr rëndësi të posaçme në zonat ku siguria është shfrytëzuar shpesh si mjet për tensione politike dhe etnike”, tha ai.

Duke folur më tej, Halilaj theksoi se ngjarjet e fundit i dërgojnë edhe Beogradit një sinjal të qartë: institucionet e Republikës së Kosovës janë përgjegjëse për sigurinë në Kosovë.

Ai vuri në dukje se fuqizimi institucional nuk duhet perceptuar si një veprim i drejtuar kundër ndonjë komuniteti, por si forcim i rendit kushtetues dhe institucional të shtetit.

“Beogradi duhet ta marrë qartë mesazhin se përgjegjësinë për sigurinë në Kosovë e kanë institucionet e Republikës së Kosovës dhe se çdo hap që i fuqizon ato i shërben stabilitetit afatgjatë. Një proces i tillë nuk duhet interpretuar si veprim kundër cilitdo komunitet, por si konsolidim i strukturës kushtetuese dhe institucionale të Kosovës.

Ky zhvillim duhet të shërbejë si argument edhe për të gjithë faktorët politikë në Kosovë që e kundërshtojnë ose e relativizojnë fuqizimin e institucioneve shtetërore: krijimi i institucioneve profesionale dhe funksionale është në dobi të çdo qytetari, pa marrë parasysh përkatësinë etnike apo politike”, theksoi Halilaj.

Sa i përket efektit politik, Halilaj tha se Qeveria e Kosovës mund ta paraqesë këtë zhvillim si sukses politik. Sidoqoftë, ai nënvizoi se fuqizimi i institucioneve të sigurisë nuk duhet t’i vishet vetëm një qeverie ose një partie.

Në vlerësimin e tij, siguria përbën interes shtetëror, ndaj çdo përparim në këtë drejtim duhet konsideruar arritje e tërësishme e institucioneve të Kosovës.

“Për Qeverinë e Kosovës, ky proces natyrisht mund të vlerësohet edhe si arritje politike, sepse rritja e besimit në kapacitetet vendore dhe forcimi i institucioneve të sigurisë janë zhvillime të dobishme për shtetin. Megjithatë, nuk do të ishte e drejtë që një proces i këtij lloji institucional të përvetësohej vetëm nga një qeveri ose një subjekt politik. Siguria e Republikës së Kosovës është çështje e interesit shtetëror, ndërsa arritjet në këtë sektor duhet t’u njihen institucioneve të Kosovës në tërësi”, u shpreh ai.

Në përmbyllje, Halilaj i bëri thirrje edhe opozitës që ta trajtojë këtë çështje me përgjegjësi shtetërore. Ai tha se kritikat kundrejt Qeverisë nuk duhet të kthehen në kundërshtim të proceseve që fuqizojnë institucionet e sigurisë.

Sipas tij, interesi i shtetit duhet të vendoset përpara interesave partiake, sepse partitë dhe qeveritë ndërrohen, kurse institucionet shtetërore vazhdojnë të mbeten.

“Për këtë arsye, edhe opozita duhet t’i qaset kësaj teme me përgjegjësi shtetërore. Qeveria mund të kritikohet për shumë çështje, por forcimi i Policisë së Kosovës, ngritja e nivelit të sigurisë dhe shtimi i përgjegjësive të institucioneve të Republikës nuk duhet të shndërrohen në një përplasje të zakonshme partiake.

Në fund, qeveritë ndërrohen dhe partitë vijnë e largohen, por institucionet e shtetit vazhdojnë të ekzistojnë. Ky është pikërisht një rast në të cilin interesi shtetëror duhet të vendoset përmbi interesin partiak”, përfundoi Gazmend Halilaj për “Bota sot”.

The post KFOR-i nis transferimin e përgjegjësive te Policia e Kosovës për Urën e Ibrit dhe Manastirin e Deçanit, Halilaj shpjegon domethënien appeared first on Albeu.com.