Universiteti i Tetovës ka bërë të ditur se është shpallur konkursi për afatin e dytë të pranimit të studentëve në ciklin e parë të studimeve për vitin akademik 2026/27. Përmes këtij afati, kandidatët do të kenë një mundësi tjetër për të përzgjedhur programin e studimit dhe për të nisur përgatitjen drejt profesionit që dëshirojnë.

Paraqitja e aplikimeve do të bëhet nga 9 deri më 11 shtator 2026. Në programet që parashikojnë verifikim të njohurive dhe aftësive, provimet pranuese janë caktuar për 12 shtator.

Lista me rezultatet preliminare do të publikohet më 14 shtator, kurse vendimi përfundimtar për pranimin e kandidatëve do të bëhet i ditur më 15 shtator.

Në këtë afat mund të aplikohet në disa programe studimore. Oferta përfshin gjuhë dhe letërsi, drejtësi, gazetari, shkenca politike, ekonomi, informatikë, matematikë, shkenca natyrore dhe shkenca të aplikuara. Kandidatët kanë gjithashtu mundësi të zgjedhin programe nga shkencat mjekësore, bujqësia dhe bioteknologjia, pedagogjia, psikologjia, administrimi i biznesit, teknologjia ushqimore, kultura fizike dhe artet.

Një përzgjedhje e gjerë programesh ofrohet veçanërisht në drejtimet shkencore dhe profesionale. Në Fakultetin e Shkencave Matematike-Natyrore zhvillohen studime në biologji, kimi, fizikë, informatikë, matematikë dhe fusha të tjera. Fakulteti i Shkencave të Zbatuara, ndërkaq, ofron arkitekturë, dizajn dhe enterier, inxhinieri të komunikacionit, mekatronikë dhe ndërtimtari.

Në Fakultetin e Shkencave Mjekësore, kandidatët mund të përzgjedhin mes farmacisë, fizioterapisë, infermierisë, mamisë, kozmetikës me estetikë dhe mjekësisë dentare.

Programe të posaçme ka edhe Fakulteti i Arteve, ku përfshihen arti dramatik, arti figurativ dhe arti muzikor. Në Fakultetin e Kulturës Fizike mund të ndiqen studime në kulturë fizike dhe shëndetësi, si dhe programe për përgatitjen e trajnerëve në sporte të ndryshme.

Sipas njoftimit të Universitetit të Tetovës, aplikimi realizohet në mënyrë elektronike përmes platformës apply.unite.edu.mk, ndërsa dokumentacioni i nevojshëm duhet të dorëzohet në administratën e Universitetit brenda afatit të caktuar. Kandidatët që kanë hapur profil gjatë afatit të parë mund ta përdorin të njëjtën llogari edhe për aplikimin në afatin e dytë./Telegrafi/

The post Universiteti i Tetovës hap më 9 shtator afatin e dytë të regjistrimit për vitin akademik 2026/27 appeared first on Albeu.com.

Kuvendi Studentor i Universitetit të Tetovës i është drejtuar Ministrisë së Drejtësisë së Republikës së Maqedonisë së Veriut me kërkesën që provimi i jurisprudencës, provimi për noter, provimi për përmbarues dhe provimet e tjera shtetërore profesionale të mund të zhvillohen edhe në gjuhën shqipe.

Në kërkesën e dorëzuar sot në Ministrinë e Drejtësisë, drejtuar ministrit të Drejtësisë Jeton Shasivari, studentët bëjnë të ditur se këtë çështje e kanë ngritur disa herë gjatë dy viteve të fundit pranë kësaj ministrie dhe institucioneve të tjera përgjegjëse, por ende nuk është gjetur një zgjidhje konkrete.

Kuvendi Studentor kërkon që në shqip të jenë të disponueshme jo vetëm provimet, por edhe materialet për përgatitje dhe të gjitha pjesët e tjera të procesit. Sipas studentëve, zhvillimi i tyre vetëm në gjuhën maqedonase krijon pabarazi dhe vështirësi shtesë për shqiptarët që ndjekin studimet në gjuhën shqipe.

Kryetari i Kuvendit Studentor, Gent Kurtishi, thekson se çështja lidhet drejtpërdrejt me të drejtën e përdorimit të gjuhës shqipe, si dhe me parimet e barazisë e të mosdiskriminimit. Për këtë arsye, studentët kërkojnë zbatimin e plotë të Ligjit për përdorimin e gjuhëve, veçanërisht të nenit 23, paragrafëve 4 dhe 5.

“Nuk është e pranueshme që studentët që studiojnë në gjuhën shqipe të përballen me kushte të ndryshme gjatë përfundimit të procesit të tyre profesional. Gjuha e studimit duhet të jetë edhe gjuha në të cilën studenti ka mundësi të japë provimet profesionale shtetërore”, thuhet në kërkesën e Kuvendit Studentor.

Sipas Kuvendit Studentor, zhvillimi i këtyre provimeve edhe në shqip do t’u siguronte të gjithë kandidatëve kushte të barabarta, do t’ua lehtësonte përgatitjen për ushtrimin e profesioneve juridike dhe do të krijonte mundësi të njëjta për punësim e avancim profesional.

Studentët vlerësojnë se janë të pranishme edhe bazat ligjore, edhe mundësitë praktike për organizimin e provimit të jurisprudencës dhe provimeve të tjera shtetërore në gjuhën shqipe dhe maqedonase, si në pjesën teorike, ashtu edhe në atë praktike.

Në përfundim, Kuvendi Studentor i Universitetit të Tetovës i kërkon Ministrisë së Drejtësisë të marrë masat e nevojshme dhe të ofrojë një zgjidhje konkrete, me qëllim që të gjithë studentët dhe kandidatët të kenë trajtim të barabartë dhe mundësi të njëjta në rrugëtimin e tyre profesional.

The post Kuvendi Studentor i UT-së kërkon që provimet profesionale shtetërore të mbahen edhe në shqip appeared first on Albeu.com.

Prokuroria Themelore Publike në Tetovë ka pranuar një kallëzim penal nga Policia Financiare, në të cilin akuzohet një punonjës i Universitetit të Tetovës për shpërdorim të detyrës dhe falsifikim dokumentesh.

Sipas autoriteteve, i pandehuri A.Z., i punësuar si bashkëpunëtor i lartë për logjistikë dhe punë në terren, dyshohet se në periudhën nga marsi 2020 deri në shkurt 2023 ka përvetësuar paratë e studentëve që i ishin besuar për participim, bashkëfinancim dhe shpenzime të tjera studimore.

Në vend që t’i depozitonte këto mjete në llogarinë bankare të universitetit përmes platformës E-pay, ai akuzohet se i ka futur në xhepin e tij, duke përfituar në mënyrë të paligjshme rreth 3.362.272 denarë. Sipas kallëzimit, po kjo shumë i është shkaktuar si dëm financiar Universitetit të Tetovës.

Për të fshehur gjurmët e veprës, dyshohet se ai përgatiste dëshmi të falsifikuara pagese, të cilat ua dorëzonte studentëve si vërtetime se pagesa ishte kryer.

Hetimet kanë zbuluar se për të falsifikuar dokumentet, ai ka marrë të dhënat dhe kodin QR nga një dëshmi e vërtetë pagese përmes E-pay dhe pastaj ka ndryshuar emrin e paguesit, shumën dhe datën. Studentët, duke besuar në origjinalitetin e dokumenteve, i kanë ngarkuar ato në sistemin elektronik të universitetit dhe i kanë paraqitur në shërbimin studentor.

The post Kallëzim penal ndaj një punonjësi të Universitetit të Tetovës, i dyshuar për përvetësimin e mbi 3.3 milionë denarëve nga pagesat studentore appeared first on Albeu.com.