Përtej këtyre risive, një nga temat që ka ndezur më shumë debat mes tifozëve janë çmimet e biletave, të cilat konsiderohen ndjeshëm më të larta krahasuar me Botërorin e fundit në Katar.

PLAY OFF- Shqipëria ende nuk e ka siguruar pjesëmarrjen në finalet e Botërorit, pasi më 26 mars do të luajë ndeshjen e parë të “Play-Off”-it ndaj Polonisë. Megjithatë, në shortin e fazës së grupeve të hedhur më 5 dhjetor, Kuqezinjtë janë parashikuar si “Play-Off B” në një grup me Holandën, Japoninë dhe Tunizinë. Në rast se Shqipëria do të arrijë të kualifikohet, tifozët që dëshirojnë të ndjekin nga afër të tre ndeshjet e fazës së grupeve do të duhet të përballen me kosto të konsiderueshme vetëm për biletat e stadiumit.

BILETAT- Sipas çmimeve zyrtare të FIFA-s, për secilën ndeshje janë në dispozicion dy kategori biletash. Ndeshja e parë e Shqipërisë, ajo ndaj Tunizisë, që do të zhvillohet në Monterrey të Meksikës, ka një çmim prej 450 dollarësh për biletën e Kategorisë së Parë, ndërsa Kategoria e Dytë kushton 380 dollarë. Takimi i dytë, përballja me Holandën në Houston të SHBA-së, rezulton edhe më i shtrenjtë. Biletat e Kategorisë së Parë arrijnë në 600 dollarë, ndërsa ato të Kategorisë së Dytë kushtojnë 430 dollarë. Ndeshja e tretë dhe e fundit e fazës së grupeve, ajo kundër

Japonisë që luhet në Dallas, ka një çmim prej 500 dollarësh për Kategorinë e Parë dhe 400 dollarë për Kategorinë e Dytë. Në total, një tifoz shqiptar që dëshiron të ndjekë të tre ndeshjet e Shqipërisë në fazën e grupeve do të duhet të paguajë 1.550 dollarë për biletat e Kategorisë së Parë, ose 1.210 dollarë në variantin më të lirë, pa përfshirë këtu shpenzimet për udhëtim, akomodim apo shërbime të tjera.

Natyrisht, përpara se të mendohet për koston e një aventure të tillë, Shqipëria duhet fillimisht të fitojë të drejtën për të qenë pjesë e këtij Botërori historik. Në të kundërt, të gjitha këto mbeten vetëm një skenar i mundshëm për tifozët kuqezi.

POLEMIKAT- Ndërkohë, pas reagimeve të forta dhe kritikave nga tifozë në mbarë botën, FIFA ka bërë një tërheqje të pjesshme nga politikat fillestare të çmimeve. Organizatori ka njoftuar krijimin e një kategorie të re biletash me çmim 60 dollarë, të quajtur “Kategoria e veçantë për tifozët besnikë”, të cilat do të jenë të disponueshme për çdo ndeshje të Botërorit, përfshirë edhe finalen. Këto bileta do t’u kalojnë federatave kombëtare të ekipeve pjesëmarrëse, të cilat më pas do t’i shpërndajnë për tifozët më besnikë, kryesisht ata që kanë ndjekur ekipin e tyre në ndeshje brenda dhe jashtë vendit. Megjithatë, numri i këtyre biletave do të jetë i kufizuar, vetëm disa qindra për ndeshje, çka do të thotë se shumica e tifozëve do të vazhdojnë të përballen me çmime të larta, pavarësisht këtij lehtësimi simbolik.

BOTËRORI I KATARIT– Botërori i FIFA-s 2022, i zhvilluar në Katar, u shoqërua me çmime biletash që ndryshonin ndjeshëm në varësi të fazës së kompeticionit dhe kategorisë së ulëseve në stadium. FIFA aplikoi një sistem me disa kategori, ku vendet më të lira ishin më larg fushës, ndërsa ato më të shtrenjta ofronin pamje më të mirë dhe akses më të privilegjuar. Në fazën e grupeve, çmimet për tifozët ndërkombëtarë nisnin nga rreth 250 rialë katarian (afërsisht 69 dollarë amerikanë) për kategorinë më të lirë, ndërsa biletat e kategorisë më të shtrenjtë arrinin deri në rreth 800 rialë (220 dollarë). Me avancimin e turneut, çmimet u rritën gradualisht.

Për ndeshjet e raundit të 16-s, biletat varionin nga rreth 96 deri në 275 dollarë. Në çerekfinale, çmimet shkonin nga rreth 205 dollarë për kategorinë më të lirë deri në rreth 425 dollarë për kategorinë më të shtrenjtë. Gjysmëfinalet ishin edhe më të kushtueshme, me bileta që nisnin nga rreth 357 dollarë dhe arrinin deri në afro 955 dollarë. Finalja e madhe e Botërorit 2022 ishte ndeshja me biletat më të shtrenjta.

Çmimet për tifozët ndërkombëtarë fillonin nga rreth 605 dollarë për kategorinë më të lirë dhe shkonin mbi 1,600 dollarë për vendet e kategorisë së parë. Ndërkohë, për banorët e Katarit dhe personat me rezidencë lokale, FIFA ofroi edhe një kategori të veçantë me çmime dukshëm më të ulëta, e cila nuk ishte e disponueshme për tifozët e huaj. Në përgjithësi, Botërori i Katarit u konsiderua një nga turnet me çmimet më të larta për fazat finale, veçanërisht për finalen, krahasuar me edicionet e mëparshme të Kupës së Botës. Nëse një tifoz do të donte të ndiqte të gjitha ndeshjet e një përfaqësueseje deri në finale (7 ndeshje), kostoja vetëm për bileta do të ishte e konsiderueshme.

Duke llogaritur çmimet mesatare për fazën e grupeve dhe rritjen graduale në fazat me eliminim, shpenzimi total për bileta do të varionte afërsisht nga 2,000 deri në mbi 5,000 dollarë, në varësi të kategorisë së vendeve të zgjedhura. Nëse përfshihej edhe finalja me bileta të kategorisë së lartë, shuma mund të rritej edhe më shumë. Këtyre kostove u shtoheshin edhe shpenzimet për udhëtim, akomodim dhe ushqim, duke e bërë ndjekjen e plotë të Botërorit një investim të madh financiar për tifozët.

The post Botërori për rekord, FIFA ul çmimin e biletave/ “Tifozët besnikë” do të përfitojnë ulje të madhe appeared first on Albeu.com.

Sipas raportit më të fundit të Pasqyrës Ekonomike Globale të tetorit, të sapopublikuar, ekonomia shqiptare parashikohet të zgjerohet me 3.4%, nga 3.8% që ishte pritshmëria në raportin e pranverës.

Në të kundërt, është rishikuar me rritje të lehtë pritshmëria për vitin 2026, ku ekonomia vendase parashikohet tashmë të zgjerohet me 3.6%, nga 3.5% në raportin e pranverës.

Inflacioni mesatar vjetor pritet të rritet lehtë në 2.3%, nga 2.2% që ishte në 2024-n dhe të kërcejë në 2.8% në 2026-n.

Në rajon, rritjen më të lartë pritet ta ketë Kosova, me 3.9% në 2025-n dhe 4% në 2026-n.

Maqedonia e veriut pritet të ketë të njëjtën rritje si Shqipëria me 3.4% në 2025-n. Në Mal të Zi performanca pritet në 3.2% në 2025-n.

Ekonomia e Bosnjë Hercegovinës do të zgjerohet me 2.4% në 2025 dhe 2.7% në 2026. Në të njëjtat nivele prej 2.4% në 2025-n pritet edhe Serbia.

FMN: Ekonomia botërore po tregon qëndrueshmëri përballë tarifave të Trump, por perspektiva mbetet “e zymtë”

Fondi Monetar Ndërkombëtar, paralajmëroi se ekonomia botërore po tregon shenja presioni nga tarifat e gjera amerikane dhe proteksionizmi, edhe pse deri tani ka rezistuar më mirë se pritej.

Sipas raportit të fundit World Economic Outlook, publikuar të martën nga institucioni me qendër në Uashington, ekonomia botërore pritet të rritet me 3.2% këtë vit, nga 3% që ishte parashikimi në korrik.

Në vitin 2026, rritja parashikohet të ulet lehtë në 3.1%.

FMN tha se përmirësimi i parashikimit për këtë vit vjen kryesisht nga faktorë të përkohshëm, si një rritje e aktivitetit ekonomik, ndërsa kompanitë dhe familjet u nxitën të furnizohen përpara tarifave të larta, si dhe një dobësim i dollarit që ka ndihmuar tregtinë globale.

Megjithatë, perspektiva përpara mbetet me “pritshmëri të zbehta”, si në afat të shkurtër ashtu edhe të gjatë.

“Nuk është aq keq sa kishim frikë, por është më keq se sa prisnim një vit më parë — dhe më keq se sa do të duhej”, tha kryeekonomisti i FMN-së, Pierre-Olivier Gourinchas, në një deklaratë për mediat.

Ministrat e Financave dhe drejtuesit e bankave qendrore po mblidhen këtë javë në Uashington për takimet vjetore të FMN-së dhe Bankës Botërore, nën kërcënimin e rinovuar të një lufte tregtare mes ekonomive më të mëdha të botës.

Pas një periudhe relative qetësie në muajt e fundit, tensionet janë rritur sërish, me presidentin amerikan Donald Trump që tha javën e kaluar se do të vendosë një tarifë shtesë prej 100% ndaj Kinës, duke filluar nga 1 nëntori — një përgjigje ndaj kufizimeve të fundit të Pekinit për eksportet e elementeve të rralla.

Që atëherë, të dyja palët kanë sinjalizuar se bisedimet mbeten të mundshme për të shmangur çdo përshkallëzim.

Në SHBA, rritja ekonomike do të ngadalësohet në 2% këtë vit, duke shënuar një rënie të ndjeshme krahasuar me vitin 2024, dhe pritet të mbetet e qëndrueshme në 2.1% në vitin 2026, sipas FMN-së.

Në zonën e euros, rritja pritet të rritet në 1.2% këtë vit dhe në 1.1% vitin e ardhshëm, ndërsa zgjerimi i Kinës parashikohet të ulet në 4.8% në 2025 dhe në 4.2% në 2026.

Për të shmangur luhatjet në parashikimet e këtij viti dhe për të eliminuar shtrembërimet e shkaktuara nga importet e parakohshme që nxitën aktivitetin në gjysmën e parë të vitit, FMN analizoi rritjen e njëpasnjëshme nga gjysma e dytë e vitit 2025 deri në 2026.

Kjo analizë parashikon që ekonomia botërore të rritet me një mesatare vjetore të përafërt prej 3% gjatë kësaj periudhe 18-mujore — një ulje prej 0.6 pikë përqindjeje krahasuar me normën mesatare 3.6% të vitit 2024.

FMN shton se inflacioni po stabilizohet mbi objektivat e bankave qendrore në disa vende të tjera, ndërsa perspektiva për çmimet mbetet e pasigurt, duke e vështirësuar punën e politikëbërësve monetarë.

Një tjetër arsye shqetësimi është rritja e huamarrjes. Qeveritë do të duhet të shkurtojnë shpenzimet, veçanërisht në Europë, për shkak të kostove shtesë të lidhura me plakjen e popullsisë, rritjen e shpenzimeve për mbrojtjen dhe sigurinë energjetike./Monitor

The post FMN ul ndjeshëm parashikimin për rritjen ekonomike të Shqipërisë në 2025-n appeared first on Albeu.com.

Në raportin e fundit të pasqyrës ekonomike globale, të publikuar në prill, FMN ka rishikuar me ulje ecurinë ekonomike të vendit për këtë vit.

Fondi pret që ekonomia shqiptare të rritet me 3.1% në vitin 2024, nga 3.3% që kishte qenë vlerësimi fillestar në raportin e tetorit 2023.

Shqipëria renditet në këtë mënyrë ndër vendet që do të kenë rritjen më të ulët, e katërta nga gjashtë shtete gjithsej.

Rritjen më të lartë pritet që ta ketë Kosova, me 3.8%. Edhe për Kosovën, FMN ka bërë një rishikim të lehtë në ulje, nga 4% që ishte vlerësimi i tetorit.

Mali i Zi pritet të ketë një ecuri prej 3.7%, i njëjtë me tetorin. Rishikimi më i ndjeshëm në rritje është për Serbinë, që tashmë pritet të zgjerohet me 3.5%, nga 3% që ishte vlerësimi fillestar.

Për Maqedoninë e Veriut pritet rritje prej 2.7% (0.2 pikë përqindje më shumë) dhe për Bosnjë-Hercegovinën është bërë rishikimi më i fortë në ulje, nga 3% në 2.4%.

FMN pret që inflacioni të ulet në 3.5%, pas një mesatareje prej 4.8% në 2023, për të zbritur pas vitit 2025 në 3%, që është dhe objektivi i Bankës së Shqipërisë.

Deficiti i llogarisë korente (që mat transaksionet e mallrave dhe shërbimeve me vendet e tjera), pritet të përkeqësohet lehtë në -3.8% të prodhimit të Brendshëm bruto (PBB), nga 3.7% në 2023.

Për vitin 2023, rritja ekonomike e vendit shënoi një rritje me bazë vjetore prej 3,44%, sipas vlerësimeve paraprake të INSTAT.

Në krahasim me vitin 2022, kur PBB-ja u rrit me 4.85% u shënua një ngadalësim, ndërtimi, pasuritë e paluajtshme dhe administrata publike kanë qenë kontribuesit më të mëdhenj të rritjes në 2023, ndërsa industria dhe bujqësia shënuan tendencë negative.

Ndonëse Shqipëria shënoi vitin më të mirë turistik në 2023, me më shumë se 10 milionë shtetas të huaj që hynë në vend, konsumi ishte mjaft i dobët.

Konsumi i popullatës u rrit me vetëm 2.96% në 2023, nga 7.37% vitin e mëparshëm, duke shënuar nivelet më të ulëta që nga koha e pandemisë.

Madje në gjysmën e dytë të vitit, kur kulmon turizmi, konsumi u rrit me ritme shumë të ngadalta (2.21% në tremujorin e tretë dhe 1.55% në të katërtin).

Vlerësohet se niveli i lartë i emigracionit, sidomos i të rinjve dhe shtrenjtimi i çmimeve kanë ulur konsumin vendas, që nuk është arritur të kompensohet nga turistët e huaj, që qëndrojnë në Shqipëri për pak ditë dhe janë të prirur të shpenzojnë pak./Monitor

The post FMN ul parashikimin për rritjen ekonomike të Shqipërisë në 2024 appeared first on Albeu.com.